1 ቆሮንቶሳ 4

ክርስቶሳ ሀዋረታ

1አሳይ ኑና ክርስቶሳ አይለዳነ ፆሳ ፁራ ቆንጭሳናዉ ሀዳር እመትዳ አሳዳ ኦድ ቆፖ። 2ሀዳራ ኤክዳ አሳት ባንታ ጎዳስ አማነትዳይሳታ ግዳናዉ በሴስ። 3ሽን ህንተ ዎይኮ ሀር ታና ፕርድኮ፥ ታዉ አይኮካ ግደና። ሀር አቶሽን፥ ታካ ታ ቦላ ፕርድከ። 4ታ ካሀይ ጌሽ፥ ሽን ሄስ ታኒ ፖሎ ፅሎ ግደይሳ በሰና። ታ ቦላ ፕርዳናይ ጎዳ ፃላላ። 5ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።

6ታ እሻቶ፥ ህንተ ግሾ፥ ታናነ አጵሎሳ፥ ህንተዉ ሌምሶ ኦዳ ኦዳስ። ሄሳ ታ ኦዳይ፥ “ፃፈትዳይሳፈ አፋ” ግያ ዞርያ ህንተ ኑፐ ታማራና መላሳ። ሄሳ ግሾ፥ ኦንካ እሱዋ ሳብድ ሀንኩዋ ካናዉ በሰና። 7ነ ሀራታፐ አይብን አይ? ኔኒ ኤካቦናባይ አይብ ደኢ? ኔኒ ኤክዳባ ሀራ አሳፐ ኤክዳ ግድኮ፥ ያትን፥ ኤክቦና አሳዳ አይስ ጬቀታይ?

8ሀእ ህንተ ካልደታ። ሀእ ህንተ ዱረትደታ። ኑኒ ባይና ህንተ ፃላላ ካዎትደታ። ህንተ ቱማ ካዎትዳባ ግድያኮ፥ ኑካ ህንተራ ካዎታናሽን። 9ታዉ፥ ፆሳይ ኑና ሀዋረታ፥ ሀይቆስ ፕርደትዳ አሳዳ፥ አሳ ኡባፈ ኑና ጉየ አዳ ዳኔስ። ኑኒ ሀ አላምያስ፥ ኪታንቾታስነ አሳስ ካሳባ ግድዳ።

10ኑኒ ክርስቶሳ ግሾ ኤያ ግድዳ፥ ሽን ህንተ ክርስቶሳን ጭንጫታ ግድደታ። ኑኒ ዳቡራንቾ፥ ሽን ህንተ ምኖ ግድደታ። ህንተ ቦንቸትደታ፥ ሽን ኑኒ ቶሸትዳ። 11ሀእ ጋካናዉ ኑ ኮሻቶስ፥ ሳሞቶስ፥ ካሎቶስ፥ ዋቶስ፤ ዳና ሶ ይድ ቶይላቶስ። 12ኑኒ ኑ ኩሸን ኦድ አቆስ። ኑና አስ ባድያ ዎደ አንጆስ፤ ኑና ጎድያ ዎደ ዳንዳኦስ።1 13ኑ ቦላ ኢታባ ኦደትያ ዎደ ሎኦ ቃላ ዛሮስ። ኑ ሀእ ጋካናዉ ሀ አላምያ ፕቶነ ዎራ የገትያ ቡረ ግድዳ።

14ታኒ ሄሳ ፃፍዳይ፥ ታ ዶስያ ናይታዳ፥ ህንተና ዞራናዉ ፃፋስፐ አትሽን፥ ዬላያናዉ ግደና። 15ክርስቶሳን ህንተና ድችያ ታይቦፐ ቦላ ግድዳ ካለይሳት ደእኮካ፥ ህንተዉ ዳሮ አዋት ዶኮና። ታ ህንተና ክርስቶስ የሱሳ ዎንገላን የላስ። 16ህዛ፥ ህንተ ታና ሌምሶ ኦድ ካላና መላ ህንተና ዎሳይስ።2 17ሄሳ ግሾ፥ አማነትዳ፥ ታ ዶስያ፥ ጎዳን ታ ናአ፥ ፅሞትዮሳ ህንተኮ ኪታይስ። እ ዱማ ዱማ በሳን ደእያ ዎሳ ኬን ታኒ ታማርስዳ፥ ክርስቶሳ የሱሳን ደእያ፥ ታ ኦግያ ህንተና ሀሳይሳና።

18ታኒ ህንተኮ ዮናባ ዳንን፥ ኦቶርትያ እስ እስ አሳት ደኦሶና። 19ሽን ጎዳይ ጊኮ፥ ማታ ዎደ ታኒ ህንተኮ ባና። ሄ ዎደ ኦቶራንቾታ ሃሳያ ፃላላ ግዶናሽን፥ ኤንታ ዎልቃካ ኤራና። 20ፆሳ ካዎተይ ኦዳ ግዶናሽን፥ ዎልቃ። 21ታኒ ህንተኮ ፃምአራ ቦየ ዎይኮ ሲቆራነ አሽከ አያናራ ቦ? አዉሳ ዶረቲ?