Leemiso 4

Cincatethi Ubbaafe Bolla

1Ta nayto, hinte aawa zoriya si7ite;

loythi si7ite; hinte akeeka demmana.

2Ta hintew lo77o timirte immiya gisho,

ta timirtiya kadhopite.

3Taka ta aawas na7a;

ta aayes iya dosiya issi na7a.

4Ta aaway tana haysada yaagidi tamaarsis;

“Ta oday new gelo; ta kiita naaga;

neeni hessa oothiko de7on daana.

5Cincatethinne akeeka demmanaw minna;

ta new odiyaba dogopa; iyape kare keyopa.

6Cincatethas zoko zaaropa; iya nena ashshana;

iyo dosa; iya nena naagana.

7Cincatethi aadhiya gisho iyo demma;

new de7iyaba wursidi ekikoka akeeka demma.

8Ne iyo boncha;

iya nena dhoqu dhoqu oothana;

ne iyo oykiko, iya nena bonchana.

9Iya ne huuphiyas saba gidana;

boncho kallacha immana” yaagis.

10Ta na7aw, si7a; ta odeysa eka;

ne laythay aduqana.

11Taani nena cincatetha oge kaalethana;

suure horoga bessaana.

12Ne hemetiya wode dhubiyabay deenna;

woxiyakoka dhubetaka.

13Ta timirtiya loytha naaga; yeddofa;

timirtey new de7o immiya gisho loytha naaga.

14Nagaranchota ogiyara boopa;

iita asata ogiyan hemetofa.

15Iyape haaka; iyan hemetofa;

guye simma; ne ogiyan ba.

16Enti iitaba oothonna de7ishin dhiskoy ekenna;

enti ase dhubbonna de7ishin dhiskoy efenna.

17Enti nagara kathada moosona;

geellatethi ushshada uyoosona.

18Xillota ogey seeta gallas gakanaw,

guji guji poo7iya wonta xalqe mela.

19Shin geellata ogey sakana dhuma mela;

enti aybin dhubetiyakoka erokona.

20Ta na7aw, ta odeysa si7a;

ne haythaa taako zaara.

21Ne ayfiya sinthafe haassofa;

ne wozanan naaga.

22Enta demmiya ubbaas enti de7o;

enti asatethas payyatethi immoosona.

23De7oy iyape pultiya gisho,

ubbaafe aathada ne wozanaa minthada naaga.

24Ne doonape iita haasaya digga;

wordo haasaya ne matape haassa.

25Sitti gada sinthe xeella;

ne ayfey ne sinthan de7iyaba

tishshi oothidi xeello.

26Ne tohuwa ogiya giigisa;

suure oge xalaalan hemeta.

27Suure ogepe ushachi haddirsi goopa;

ne tohoy iita oge boonnada naaga.