Leemiso 5

Laymatethafe Haaka

1Ta na7aw, ta cincatetha hayza si7a;

ne haythaa ta timirtiyako zaara.

2Hessi nena wozanaama oothana;

ne oday ne eratethaa qoncisana.

3Layma maccasa inxarsafe ililo eessi xokees;

I oday oysape aadhidi looxikees.

4Shin wursethan iya godare uthada cammawusu;

nam7u baggara qanxiya mashshada qara.

5I tohoy hayqoko bees;

I tangoy duufo gathees.

6Iya de7o oge qopuku; I ogey geella;

shin geella gideysa iya eruku.

7Ta na7aw, tana si7a;

ta odeysafe keyopa.

8Layma maccasa heera boopite;

I keetha pengiyako shiiqopite.

9Hessi hanonna ixiko hinte bonchuwa harati ekana;

na7atethan wozana mino asa kushen hinte hayqana.

10Hinte aquwa allagati ekana;

hinte daaburadi shiishidabay hara asas gidana.

11Wursethan hinte ashoynne

hinte asatethay wurin hinte yeekana.

12Hinte yaagana; “Ta ayis timirte ixadina?

Ta wozanay seera ayis kadhidee?

13Taani ta astamaareta si7abike;

tana zoreyisata zoriya ekabike.

14Hesaa gisho, ta asay shiiqida shiiquwan,

kawuyanaw matas” yaagana.

15Neeni ne pultuwafe haathe uya;

ne mache xalaala siiqa.

16Ne pultuwa dabaaban,

ne olla haatha denban ayis gussay?

17Enta new buzo ootha;

hara allaga uraara koxofa.

18Ne pultoy new anjeto;

ne na7atetha machera ufayta.

19Lo77iya gaaredaninne ufaysiya gen7eda

I dhanthay ubba wode nena alo;

ubba wode I siiqoy nena di77o.

20Ta na7aw, layma maccasan ayis di7etay?

Hara asa macho ayis qoommay?

21Asi oothiyaba ubbaa Goday be7ees;

I hemetiya horoga ubbaa xeellees.

22Nagaranchuwa I oothida nagaray oykees;

Iya nagaraa gitey iya qachees.

23I ba eeyatethan dhayis;

bana naagiboonna gisho hayqis.