Leemiso 3

Godan Ammaneta

1Ta na7aw, ta timirtiya dogopa;

ta kiitaa ne wozanan wotha.

2Enti ne laytha adussana;

injenne sarotethi new gujana.

3Siiqoynne tumatethi neepe haakofo;

enta ne qoodhen qacha; ne wozanan xaafa.

4Hessa oothiko ne Xoossanne asa sinthan

sabetananne nashetana.

5Ne kumetha wozanan Godaa ammaneta;

ne akeekan zempofa.

6Ne ooso ubban iya sinthaya;

I nena suure oge kaalethana.

7Nena ne huuphen cinca oothofa;

Godaa yayya; iitape haaka.

8Hessi ne asatethaas payyatethi ehana;

ne meqethaaka xaalisana.

9Ne shaluwan Godaa boncha;

koyro ayfida kathaafe

bayraa immada iya boncha.

10Hessa ne oothiko, ne shaaliyan kathi kumana;

ne daalloy woyne ushshan kumidi palahana.

11Ta na7aw, Godaa seera kadhopa;

I nena seeriya wode lancofa.

12Aaway ba dosiya na7a seereysada,

Goday ba dosiya uraa seerees.

13Cincatethi demmeynne,

akeeka baw miishe oothiya uray anjetidaysa.

14Cincatethi birape aadhidi go77ees;

worqafe aadhidi maaddees.

15Cincatethi worqafe aadhidi al7o;

ne demmanaw amotiya ubbay cincatethara ginenna.

16Cincatethi ushacha kushen adussa laythi,

haddirsa kushen duretethinne boncho oykasu.

17I ogeti ufaysiya ogeta;

I horogay saro horoga.

18Iya bana oykeysatas de7o mithi;

iyo minthidi oykiya ubbay anjetidaysata.

19Goday ba cincatethan sa7aa medhis;

ba akeekan salota minthis.

20Iya eratethan shaafati goggoosona;

shaaratape iri bukees.

21Ta na7aw, suure pirdanne

shaakidi ero minthada oyka

enti neepe shaaketofo.

22Enti new de7o gidana;

injenne ufaysi immana.

23He wode ne hirgi bayna hemetana;

ne tohoy dhubetenna.

24Neeni zin7iya wode yayyaka;

qamma kumethi mal7o dhisko dhiskana.

25Akeekona gakiya gados yayyaka;

iitati dhayiya dhayuwan dagammaka.

26Goday new zempo gidana;

ne tohoy xihen oyketonnaada I naagana.

27New wolqi de7ishin,

metootida uraas lo77oba ooso aggofa.

28Ha77i maaddanaw danda7ashe ne shooruwa,

“Simmada ya; ta new wonto immana” yaagopa. 29Nena ammanetidi, ne matan de7iya,

ne shooruwa bolla gene oothofa.

30Nena qohonna de7ishin,

ase coo mootopa.

31Gene oothiya asata qanaatopa;

enta iita oosuwa kaallofa.

32Goday iita oothiya asata ixees;

shin suureta dosees.

33Goday iita oothiya asaa keethaa baaddees;

shin suureba oothiya asaa keethaa anjees.

34Otoron qelqiseyisata Goday qelqisees;

shin bantana kawusheyisata sabbees.

35Cincati boncho demmana;

shin eeyati kawuyana.