Leemiso 14

1Cinca maccasi ba keethaa keexawusu;

shin eeya maccasiya ba keethaa ba kushen laallawusu.

2Suure hemetiya asi Godaa yayyees;

shin ba oge geellayiya asi Godaa kadhees.

3Eeya odi iya zokuwas xam7a ehees;

shin cincata inxarsay enta naagees.

4Boori bayna ixiko shaaley kaysi gidees;

shin goshsha boori de7iko, ne shaaley kathan kumees.

5Ammanetiya marki ubba wode tuma odees;

shin wordo marki wordo xalaala odetees.

6Qelqisiya asi cincatethi koyees, shin demmenna;

akeeki de7iya asi eratethi demoy waaysenna.

7Eeya asape haaka;

neeni iya odape eratethi demmaka.

8Cinca asi cinca gidiya ba oothiyaba erees;

shin eeya asa eeyatethay iya balethees.

9Eeyati nagara oothishe, qiirotanaysa aggidi qelqisoosona;

shin suureti banta nagaray atto geetetanaw koyoosona.

10Issi issi wozani ba azzanuwa erees;

iya ufaysa oonika iyara koxenna.

11Iitata keethay laaletana;

shin suureta keethay minnidi daana.

12Asas like daaniya ogey de7ees;

shin iya wursethay hayqoko gathees.

13Miicha wodeka wozanan azzanoy de7ees;

ufaysa wursethay azzano gidanaw danda7ees.

14Iita asi ba iita oosuwa gate ekana;

lo77o asika ba lo77o oosuwa gate ekana.

15Eeya asi ubbaba ammanees;

shin cinca asi akeekidi tangees.

16Cinca asi Godaa yayyees; iitape haakees;

shin eeya asi eesotesinne iitape naagetenna.

17Elle hanqetiya asi eeya ooso oothees;

shin cinca asi danda7ancho.

18Akeeki bayna asi ba eeyatetha gatiya ekoosona;

shin cinca asi eratethi kallachada goxoosona.

19Iitati lo77ota sinthan gulbatana;

nagaranchati xillota pengen hokana.

20Manqoy ba shooruwan ixetees;

shin duretas daro laggeti de7oosona.

21Ba shooruwa kadhiya asi nagara oothees;

shin manquwa maaddiya asi anjetidaysa.

22Iitabaa maqeteysati baloosona gidokona?

shin lo77oba oothanaw halcheysati

ammanetethinne siiqo demmoosona.

23Minnidi oothiya ooso ubban wodhey de7ees;

shin coo odi manqotethi ehees.

24Cincatas enta duretethay entaw kallacha;

shin eeyati guji guji eeyoosona.

25Tuma marki shempo ashshees;

shin wordo marki balethees.

26Godaa yayiya asas mino miixay de7ees;

iya naytas baqatidi attiya bessi de7ees.

27Godaa yashshi de7o pulto;

hayqo xihepe ase ashshees.

28Kawo gitatethi I haariya asaa darotethaana;

shin haaretiya asi dhayiko ika pathenna.

29Danda7ancho asas gita akeeki de7ees;

shin elle hanqetiya asi ba eeyatetha qoncisees.

30Saro wozani asatethas payyatethi immees;

shin qanaatey asatethas ajaaje harge mela.

31Manqota naaqiya asi enta medhidaysa cayees;

shin metootanchotas keehiya asi Xoossaa bonchees.

32Iitati banta iita ooson kundana;

shin xillotas hayqope attiya miixi de7ees.

33Akeekancho asa wozanan cincatethi kumis;

shin eeyati cincatethi aybeko erokona.

34Xillotethi issi kawotetha dhoqu dhoqu oothees;

shin nagari ay asika kawushshees.

35Erancho aylletanan kawoy ufaytees;

shin yeellaya aylley kawa hanqethees.