Leemiso 13

1Erancho na7ay ba aawa seera si7ees; shin qelqiseysi seera ekenna.

2Asi ba doonape keyiya qaalan lo77oba ekees; shin ammanetonaysati makallaba amottoosona.

3Ba doona naagiya uray ba shempuwa naagees;

shin eeson haasaya uray bana dhaysees.

4Azallay amottees; amotikonne aybaka demmenna; shin minnidi ootheysati kallana.

5Xillo asati wordo oda ixoosona. Shin iita asata odi yeellayeesinne kawushshees.

6Suure de7uwa de7iya uraa iya xillotethay naagees; shin nagarancho iya nagaray ongees.

7Bana dure daanisiya asi de7ees; shin iyaw aybinne baawa; qassi bana manqo daanisiya asi de7ees; shin iyaw daro aqoy de7ees.

8Asi ba miishen ba shempo wozanaw danda7ees; shin manquwa yashisiyabay baawa.

9Xillota poo7oy phoolees;

shin iitata xompey to7ana.

10Otoroy ooshshi yelees; shin zore ekeysati cincata.

11Daaburi bayna demmida miishey eeson dhayees; shin minni oothidi demmida aqoy, dari daridi bees.

12Koyiyabay poletonna gam7eysi azzanthees; shin amotidabay poleteysi ufaysees.

13Zore kadhiya uray meton gelees; shin kiita bonchiya uray saro de7ana.

14Cincatethi immiya timirtey de7o pulto; higgey ase hayqo xihepe kessi ekanaw maaddees.

15Akeeki de7iya uray bonchetees; shin ammanetona ixoy qohos gathees.

16Cinca asi ubbay eran oothees; shin eeyi ba eeyatetha qoncisees.

17Iita asati kiitetidi, meton geloosona; shin ammanthiya asati kiitetidi, sarotethi ehoosona.

18Seera ixiya asi manqeesinne yeellatees;

shin seera ekiya uray bonchetees.

19Amotidabay poleteysi daro ufaysees;

shin iitati iitabaape haakanaw koyokona.

20Cinca asara hemetiya asi cinca gidees;

shin eeya asara hemetiya asi meton gelees.

21Nagaranchota iita qaaday kaallees;

shin duretethi xillota woyto.

22Lo77o asi ba nayta nayta laatisees;

shin nagaranchuwa aqoy xilluwas dagayetees.

23Manquwa goshshay daro kathi ayfenaw danda7ees;

shin suure pirda pacan dhayees.

24Pircon seeranaw dosonna asi ba na7aa ixees;

shin ba na7aa siiqiya uray minnidi seerees.

25Xilloy, uloy kallana gakanaw mees;

shin nagaranchoy ubba wode koshatana.