Geeshsha Maxaafa
Leemiso 15
Liiqo inxarsi hanqo zarbisees;
shin dom7ethiya qaali hanqo denthethees.
Cincata inxarsay era puulayees;
shin eeyata doonay eeyatethi pultisees.
Godaa ayfeti ubba bessi xeelloosona;
iitatanne lo77ota shaakidi be7oosona.
Lo77o odi de7o mitha mela;
shin geella odi ayyaana menthees.
Eeyi ba aawa seera kadhees;
shin ba aawa seera ekiya asi cinca.
Xillo uraa keethan daro miishey de7ees;
shin iitata soo geliya miishey meto ehees.
Cincata doonay era zerees;
shin eeyata wozanay hessa mela gidenna.
Goday iitata yarshuwa ixees;
shin suureta woosan I ufaytees.
Goday iita asata ogiya ixees;
shin xillotethi kaalleyisata I dosees.
Like ogiya aggida asi pirdi naagees;
seera ixiya asi hayqees.
Duufoynne dhayoy Godaa sinthan qonce;
yaatin, asa wozana qofay waani iyape geemmanee?
Qelqisiya asi seera dosenna;
cincatape zore oychenna.
Wozani ufaytin, som7oy poo7ees;
shin wozani azzaniko, ayyaani meqees.
Akeeka wozani de7iya asi eratethi koyees;
shin eeyati banta eeyatethan ufaytoosona.
Manqota de7oy ubba wode baaxe;
shin ufaytiya asi ubba wode alees.
Ooshshara de7iya gita aqope
Godaa yashshara de7iya guuthabay keeha.
Ooshshi de7iya bessan modho asho maanape
siiqoy de7iya bessan santhi keeha.
Hanqoy ooshshi kessees;
shin danda7i ooshshi irxisees.
Azalla asa ogey agunthan diretis;
shin suure asa ogey giiga.
Cinca na7i ba aawa ufaysees;
shin eeya na7i ba aayiw kadhees.
Wozani bayna asi ba eeyatethan ufaytees;
shin wozanaama asi bessiya ba oothees.
Zorey dhayiko, qopidabay haddirees;
daro zorey de7iya bessan qopidabay poletees.
Oyshas bessiya zaaro imoy he uraa ufaysees;
ba woden odetiya odi ay mela ufaysi!
Garsan de7iya si7oolepe attana mela
de7o ogey akeeka uraa pude kaalethees.
Goday otoranchota keetha laallana;
shin am7e zawa naagees.
Goday iitata qofaa ixees;
shin geeshsha qaalan I ufaytees.
Wordon wodhe demmanaw aaliya asi
ba soo asaa bolla meto ehees;
shin wodhaafe ixiya asi de7on daana.
Xillo asi odetanape sinthatidi qopees;
shin iitata inxarsaape iitabay pultees.
Goday iitatape haakees;
shin xillota woosa si7ees.
Som7oy pashkin wozani ufaytees;
mishiraachoy meqethi minthees.
De7o immiya zore si7iya asi
cincatethara issife daana.
Seera ixiya asi bana qohees;
shin seera ekiya asi akeeka demmees.
Godaas yashshi cincatethi tamaarsees;
ashketethi bonchofe sinthatees.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.