Leemiso 16

1Asi ba wozanan halchees;

shin like zaaroy Godaape bentees.

2Asi oothiya ooso ubbay iyaw like daanees;

shin Goday dendo qofaa be7ees.

3Ne ooso ubbaa Godaas hadara imma;

neeni qopidabay poletana.

4Goday ubbabay qopidaysatho bana mela oothees;

hanikoka, makallanchota wursethay dhayo.

5Goday otoranchota ixees;

enti seerettonna attokona.

6Siiqoninne ammanetethan nagari atto geetetees;

Godaas yayyidi asi iitabaape attees.

7Asa hemethi Godaa ufaysiyabaa gidiko,

I ba morketara saro daanada oothees.

8Xillotethan bentiya guuthabay,

wordon demmiya daro wodhepe lo77o.

9Asi wozanan ba oothanaba halchees;

shin halchoy Godaa maaden poletees.

10Kawoy Xoossaafe ekida maatan pirdees;

iya inxarsay suure pirdees.

11Gina mizaanetinne maka miisheti Godaaba;

bayziyaba ubban geney doonna mela Goday koyees.

12Kawoti iita ooso ixoosona;

enta araatay xillotethan eqees.

13Kawoti xillo inxarsan ufaytoosona;

tumaa haasaya uraa dosoosona.

14Kawa hanqoy hayqo kiitancho mela;

shin cinca asi hanquwa irxisees.

15Kawa som7oy poo7iko de7oy de7ees;

Iya lo77otethay ira ehiya shaara mela.

16Cincatethi demoy worqa demope aadhees;

akeeka demoy bira demope lo77o.

17Suureta ogey iitape haako;

ba hemethaa naagiya uray ba shempuwa naagees.

18Otoroy dhayo kaalethees;

ceeqetethi kundethi ehees.

19Otoranchotara di7o shaaketanaape,

ashke gididi manqidi de7eysi lo77o.

20Zore si7iya uraas I oothiyaba ubbay injetana;

Godan ammanetiya uray anjetana.

21Ba qofan cinca gidida asi akeekancho geetetees;

lo77o qaali eratethi gujees.

22Cinca asas eratethi de7o pulto mela;

shin eeyata seeroy coo wode wursees.

23Cinca asi odetanaape sinthe qopees;

iya mettershay eratethi gujees.

24Lo77o qaali eessa ililoda mal7ees;

shempos mal7o; meqethas paxo gidees.

25Asas suure daaniya ogey de7ees;

shin wursethan hayqoko gathees.

26Asi minnidi oothana mela oothey katha amo;

koshi minnidi oothana mela denthethees.

27Kawusha asi iitabaa halchees;

iya oday tamada xuuggees.

28Wobe asi ooshshi denthethees;

zigirsi ammanetiya laggeta shaakees.

29Gene asi ba shooruwa cimmees;

lo77o gidonna oge kaalethees.

30Ba ayfen qam7otiya asi geellaba qopees;

ba mettersha saxidi mandiya asi iitabaa oothees.

31Puulumida huuphey boncho kallacha;

hessika bentey xillo de7o de7ina.

32Wolqaama asi gidanaape danda7a asi gidoy lo77o,

daro katamata olidi oykanaape bana haaroy aadhees.

33Asi saama yeggees;

shin wursetha zaaroy Godaape bentees.