Geeshsha Maxaafa
Leemiso 11
Goday wordo mizaane ixees;
shin like mizaanen ufaytees.
Otoroy yaa wode kawushatethi yees;
shin ashketethan cincatethi yees.
Xillota enta suuretethay kaalethees;
shin iita asata enta geellatethay dhaysis.
Hanqo gallas duretethi go77enna;
shin xillotethi hayqope ashshees.
Borey bayna uraa ogiya xillotethay suurisees;
shin iita uray ba iitatethan kundees.
Suureta enta xillotethay ashshees; shin ammanetonayisata enta amoy xihe gididi oykana.
Iita asi hayqiya wode, I naagiya ufaysay iyara issife hayqees; I ba wolqan ceeqetiyabay ubbayka dhayees.
Xilloy metope attees; iya gisho iitaa bolla metoy yees.
Xoossaa kaddida asi ba doonan asa dhaysis; shin xilloti eran kessi ekoosona.
Xilloti bonchetiya wode, katamay ufaytees; qassi iitati hayqiya wode, hashshu gees.
Xillota anjuwa gaason katamay diccees; shin iita uraa odi katamaa dhaysis.
Ba shooruwa kadhiya uraas wozani baawa; shin akeekancho uray si77i gees.
Zigiriya asi xuuraa laallees; shin ammanetiya asi xuuraa genthees.
Kaalethiyabay dhayiko, kawotethay kundees; shin daro zoreysati de7iko, saroy de7ees.
Erenna uraas waase gidiya asi tumape metootana; hessafe waase gidonna ixeysi lo77o.
Ulo keeha maccasi bonchetawusu; shin iita asi duretetha xalaala duretees.
Keeha asi baw lo77oba oothees; shin wozana mino asi bana qohees.
Iita asi demmiya miishey cimo; shin xillotethaa zeriya uray tuma woyto cakana.
Xillotethan minnidi de7iya uray paxa de7ana; shin iitatethaa kaalliya uray hayqana.
Goday iita qofay de7iya asata ixees; shin suure hemeteysatan ufaytees.
Iita asi seerettonna attenna; shin xillota kochay attana.
Qofi bayna mala lo77o macca puulatethay
guduntho sidhen aathida worqaa mela.
Xillota amuwas poloy lo77o xalaala; shin iitata amuwas poloy hanqo xalaala.
Issi issi asati banta miishe asas coo keehosona; shin enta aqoy haa darees. Hara asati qassi banta miishas pala uuzettoosona; shin enta aqoy yaa pacees.
Keeha asi duretana; harata maaddiya asi maadetana.
Kathi al77in bayzanaw minjiya uraa asay baaddees. Shin ba kathaa asay koyiya wode bayziya uraa anjees.
Lo77oba minthidi koyiya uray ufaysaa demmees; shin iitabaa koyiya uraa iitabay demmees.
Ba duretetha ammanetiya asi kundana; shin xilloti balgo mithada.
Ba soo asaa bolla buqethi denthiya uray go7etiyabay aybika baawa. Eeyatika cincatas aylle gidana.
Xillo asi de7o ayfe ayfiya mitha mela; shempo ashsheysati cincata.
Xilloti sa7an banta ooso gate ekiyaba gidiko, iitatinne nagaranchati banta oosuwas ekana gatey waanidi darandeesha!
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.