Leemiso 10

Solomone Leemisota

1Haysati Solomone leemisota.

Cinca na7i ba aawa ufaysees;

shin eeya na7i ba aayiw azzanthees.

2Nagaran demmida miishey go77enna;

shin xillotethi hayqope ashshees.

3Goday xillota koshaysenna;

shin nagaranchota amuwa polisenna.

4Azallatethi manqisees;

shin minnidi oosoy dureyees.

5Cinca asi ba kathaa bone shiishees;

shin kathi cakiya wode dhiskiya asi kawuyees.

6Xillo asi anjetees;

shin nagarancho asi

ba makallatethaa doonan genthees.

7Xilluwa sunthay anjon xeegetishe de7ees;

shin nagaranchota sunthay elle dogetees.

8Cinca asi kiittidaba oothees;

shin eeya asi dhayoko bees.

9Suure asi saro de7ees;

shin geella asi ba gomen oyketees.

10Gene ayfen qam7otiya asi meto ehees;

shin yayyonna seeriya asi sarotethi medhees.

11Xillo asa odi de7o pulto;

shin nagarancho asa odi makalla genthees.

12Ixoy palama denthethees;

shin siiqoy bala ubbaa kammees.

13Wozanaama asi cincatethan odees;

shin eeya asa zokoy xam7as attees.

14Cincati eratethi dagayoosona;

shin eeyata doonay dhayo dafees.

15Dure asa miishey diretida katamada naagees;

shin manqotethi manqota dhaysees.

16Xillo asa oosoy iya de7o;

shin iita asa wursethay dhayo.

17Seerin simmiya asi de7o ogen hemetees;

shin seerin ixiya asi balees.

18Ixo kammiya asi wordancho;

zigirsi laaliya asi eeya.

19Daro haasaya giddon nagari dhayenna;

shin ba doona shiishiya asi cinca.

20Xillo asa inxarsi geeshsha bira mela;

shin iita asa wozani iitaban kumis.

21Xillo asa odi daro asaa go77ees;

shin eeyati banta paca wozanan hayqoosona.

22Godaa anjoy dure kessees;

he duretetha bolla meto gujenna.

23Eeya uraas iitabaa oosoy kaassa mela;

shin wozanaama asi cincatethan ufaytees.

24Iita asi hirgidabay iya bolla gakana;

shin xilloy amotidabay imetana.

25Gotey aadhiya wode nagaranchoy bentenna;

shin xilloti merinaw minnidi daana.

26Caalabay ache, cuyi ayfe qoheysada,

azalla asi kiittidaysa yiloyees. 27Godaas yashshi laythi adussees;

shin nagaranchota laythay qaammees.

28Xillo asi ufaysi yaana gidi naagees;

shin nagaranchota ufaysay dhayana.

29Godaa ogey xillotas baqatidi attiya besse;

shin iita oothiya asaas dhayo.

30Xilloti ubba wode qaaxokona;

shin iitati biitta bolla dookona.

31Xillo asi cincatethan odees;

shin geellaba odetiya inxarsi qanxetana

32Xillo asa inxarsi bessiya haasaya erees;

shin iita asaa oday wobbe.