Leemiso 9

Cincatethi, Eratethinne Eeyatethi

1Cincatethi ba keethaa keexasu;

laapun tuussata ba keethaas essasu.

2Iya ba giigisiya gibiras modho mehe shukasu;

woyne aggasu; gayta asaa sinthe aathasu.

3Asaa xeeganaw ba aylleta kiittasu;

oosanchoti katamaa dhoqa bessan eqidi, 4Hinteno, eri pacidaysato haa gelite! Eeyatako haysada yaagasu. 5“Haa yiite; ta kathaa miite;

ta aggida woyniya uyite. 6Hinte eeyatethi aggidi de7on de7ite;

akeekidi hemetite” yaagasu.

7Qelqisiya uraa seeriya asi cashshe ekees;

iita uraa zoriya asi baw qohetees.

8Qelqisiya uraa zoropa; I nena ixana;

cinca uraa zora; I nena dosana. 9Cincatethi uraa tamaarsa; I cinca gidana;

Xillo uraa tamaarsa; I era gujana.

10Godaas yashshi cincatethas doomethi, Geeshsha Godaa eroy akeeka.

11Ta gaason ne laythay darana;

ne de7o laythay aduqana.

12Ne cinca gidiko, go7etey nena;

Ne qelqisiya asi gidiko nena qohaasa.

13Eeyo maccasi waaso darawusu;

iw yeelli baawa; iya aykoka eruku.

14Iya ba karen woyko katamaa dhoqa bessan uttawusu. 15Banta ogiya biya asaa xeegada, 16“Hinteno, eri pacidaysato

taako haa yiite” yaagasu. Eri baynaysatako, 17“Kaysidi uyaa haathi mal7ees;

geeman miya kathi lo77ees” yaagasu.

18Shin hayqida asay yan de7eysa,

I imathatika duufon de7eysa I erenna.