Skip to content
BibleKenya

Gedeo Bible

Iyyoobikaa Maxaafa 19:25

Verse 25 is marked below, with the whole chapter around it. Read from the start

Iyyoobii'i

Ookkoneechchi uduma Iyyoobinna hiyye hiissee haaso'ee qici:

«Haan qico'n micco anka enqitina'n

yaaneti anee rakkissina'n hexxinna?

Higgina'ni anee yowwitinaa wodda

shookkinabaa?

Balleessonnolenna

balleessa itti anende miitaa malee ha'notebaan.

Ee ha'no ifi saaddine'e

rakko tinni iso'ni gelteechchi isixxe balleessa'aten hitinoolenna,

Yaane kinni tennee rakko duuchcha ane'ni geessiseekinna

anee abido'a fonixoro fayeeki Magenoken.

«Rakkatennen hiyye'e ku'lennele ane'e afaak hedhebaan;

hafuura gikki asse'e raarenen dhuga'a alfebo'no.

Mageni ora duuchcha duuchcheemmaxxee

sa'annob hedhebaan;

tarkaafatannobanna dukkanseen.

Karra anxa duuchcha anenaa'n mulqe'e

gurra ankanna balleessen.

Duuchchin darree'ni anee mikite bireen;

addete'e edi'a kaddaan hiyyannalchchi haqichchinsha anenaa'n fotoqaashsha asseen.

Mageni mufate anee gane;

naaphiinshanna anee uude.

Anee gano'a sannachcha ifika ergee'na'a,

mine anki bira riphe anee buqe.

«Mageni dayyuwwi anki duuchchi anenaa'n bayyataashsha asse;

ege'neek duuchchinna anee keessummatishsha uude.

Firi anenaa'n bayyateen;

jaaluwwikinna anee dedhe.

Keessumma adhdhee mine galchedhenneki duuchchi anee dedhe;

ani'a ergattammaxxi dubarte duuchchi anee mannake assite;

alagiinshanna uudde.

Erganjo anka ye'onnole cuqqi hiyyaba'a,

kadhate'e nu'u hiyyonnolenna anxa laqaba'a.

Are anxi foole anka diqatte,

dayyuwwi aningiri anee boshshedhe.

Oose midde anee tuffatteen;

anee uudda woddanna osoldeen.

Lubbotik anki jaaluwwi duuchchi anee boshshedheen;

yo'oshsha eyyaannakir duuchchi qophphi hiyye'e ane'n ke'e.

Maali mudee'naa'a miqete kade'e,

dhikke calla gatenne.

«Koo anke firaa! Anee ganeeki Magenoken,

maganneten ani'a marrarre! Meenn ani'a jabaatte!

Magenonge anee rakkiseeni ha'no maayee anee rakkissina?

Ta'i qico'ni anee geebbineexxi geltabaata?

«Ta'i qico'ni haaso'ennexxa yaane qaabbateexxi

maxaafake'n borreessaak hedheele,

hittata eyyanna'a!

Silaan sibliinke mi'inninna irsaaseti borreessende'e

yookaan boo'etika kinjo bocati hana borreessende'e

duuchchi woddi'a hexxaashsha assendeele

hittatta eyyanna'a!

Yaane kinni anee wodaaki iima hedheexxanna

udumixxe yaanna'n anee gargaaro'a

buttate'n dageexxi uurraaxxa ege'neennen.

Goga anka dhukkubi ite biroolenna

konne bisinninni hedhe'e Mageno uudannoxxa ege'neennen.

Isoo umoo aningenninni ani uudannoken

Ille anxinna isonde uuddaan; welekebaan;

ettene barra yo'oshsha halcha'eennen.

«Anke firaa!, ‹anee aallattinee rakkisatee,

tenne rakkoxxi buuto isondeni hitine› haasotinoole,

Mageniinxi mufe wolaantichchiinxa mura woxxisa iyyedaggammaxxee

wolaantichchiki muddinabaashsha heqqedhdhe;

Mageni muraake kadeexxanna ege'ne.»

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.