Zozue 24:15

Hio wi mɔ Israel mɛkara ha sila mbwa mɔ detom pɛ Wankpoo

1Zozue wesara hio kandɔ mɔ Israel fɛt ha Sisem. Wɛnɛ saa hio kotowi, hio wan, hio wan gɔn kita, nɛ hio kagama bulo mɔ Israel nɛ mbwa tɛa tɛ osi tɛ mbwa ha sɔngsi Sɔ.

2Mɛgi Zozue tɔa ha kandɔ fɛt: «Wen ka Wankpoo, Sɔ mɔ Israel tɔa: ‘‘Hio ngbabafa ɛnɛ nɛ nam pɛ Tera, bafa mɛ Abraham nɛ bafa mɛ Nahor badung sɔngsi ha kuli li mɔ Efrat. Hio ngbafaba ɛnɛ bagɔ sɔngsi nɛ hio ma mbing sɔ. 3Mi baku ngbabafa ɛnɛ Abraham gbonɛ ha le ka dung ha kuli li mɔ Efrat; mi ba wɛnɛ yalnɛ hazang le mɔ Kanaan fɛt. Mi dea nde bezang wa ayɛbhi nɛ mi bahaa Izaak ha wɛnɛ. 4Mi haa a Izaak, Zakob nɛ Ezau. Mi bahaa ha Ezau kandɔnu zu ngari mɔ Seir nde wɛnɛ aɔnu ang, maa Zakob nɛ hio bem pɛa bazil ha Ezipte. 5Hapata, mi tomso Moize nɛ Aaron nɛ mi tomsa hio gdanga zɛlɛ ha le mɔ Ezipte sɔngsi nde mi a gbosisi ɛnɛ. 6Ka mbwa guotɛ ha le mɔ Ezipte mɔ hɔa ha nana li tɔng mɔ hio Sisongo. Maa hio wi mɔ Ezipte banak pata mbwa gbo ha ki nɛ hio puspus mɔ yanga nɛ hio wan bayanga. 7Mɛgi, hio ngbabafa ɛnɛ gdɔra ha Wankpoo, nɛ mi gdea ma nzɔng tutum ha soko ɛnɛ nɛ hio wi mɔ Ezipte. Hapata mi gɔsa nana li hazu mbwa nɛ lia gulo mbwa. Ɛnɛ ingɔ nɛ dedea mɔ ka mi dea nɛ hio wi mɔ Ezipte. Hapata mɔ ɛngi ɛnɛ ɔanu ha kpɛnu ngimɔ nɛ dɔka pentɛ. 8Hapata mi kuo ɛnɛ nɛ̂nɛ hazang le pɛ hio wi mɔ Amori ka ɔnu ha wal gutɛ swe mɔ Zurdain. Mbwa babi se bulo nɛ ɛnɛ, maa mi gdea mbwa ha kɔ ɛnɛ, nɛ ɛnɛ baa le pɛ mbwa, hazu mi gbɛa mbwa fɛt ha sɔngsi ɛnɛ. 9Balak, bem pɛ Sipor, kongapora mɔ Moab, bagutɛ fin bibulo nɛ ɛnɛ. Wɛnɛ saa fin Balaam, bem pɛ Beor nde wɛnɛ atɛ fom ɛnɛ. 10Maa mi tɛ mɛkiri mɔ ze Balaam na; nɛ mi dea nde wɛnɛ awol dedewen hazu ɛnɛ nɛ mi kpasasa ɛnɛ ha kɔ̂ Balak. 11Ɛnɛ baku Zurdain nɛ ɛnɛ hɔa ha Zeriko. Hio wi mɔ le mɔ Zeriko babi bulo sungiri nɛ ɛnɛ, gbesi nɛ hio wi mɔ Amori, hio wi mɔ Perizi, hio wi mɔ Kanaan, hio wi mɔ Het, hio wi mɔ Girgasi, hio wi mɔ Hivi nɛ hio wi mɔ Yebus. Mi bagde mbwa hasi ngaya pɛ ɛnɛ. 12Mi batomsi hio nabhatɔng ha sɔngsi ɛnɛ mɔ yin hio kongapora bwa mɔ Amori. Hio gbapa pɛ ɛnɛ nɛ hio ndoro pɛ ɛnɛ lɛm mɔ yin mbwa na. 13Mɛgi, mi bahaa ha ɛnɛ ma le ndang ka ɛnɛ lɛm mɔ ze bonɛ mɔ gɔm fɔ ang na. Mi bahaa ha ɛnɛ hio le ka bonɛ ɛnɛ abhɔngiri yo na, maa ɛnɛ ɔa ang. Mi bahaa ha ɛnɛ hio vigne nɛ hio olive bo nɛ ɛnɛ agun na, maa ɛnɛ yɔnga hio waya.’’››

14Zozue tɔa fin: ‹‹ Ɛnɛ yu ke Wankpoo nɛ ɛnɛ detom pɛa nzeng nɛ sila ɛnɛ fɛt. Ha ngimɔ ka hio ngbabafa ɛnɛ badung ha wal kuli Efrat mana ha Ezipte, mbwa bagɔ hio ma mbing sɔ. Ɛnɛ lak hio sɔ ndɔng gde nɛ ɛnɛ detom pɛ Wankpoo. 15Ka tom pɛ Wankpoo hefi ha sila ɛnɛ na, mɛgi ɛnɛ sal hio sɔ ka ɛnɛ lɛma nɛ̂a ha gɔa mbwa mɛsɛ. Ɛnɛ sal hio ɛndɔng ka hio ngbabafa ɛnɛ bagɔ yo sweki ha wal kuli Efrat mana hio sɔ pɛ hio wi mɔ Amori hazu ɛnɛ ɔnu hazang le pɛ mbwa. Maa nam pɔm nɛ mi, ɔ bede tom pɛ Wankpoo.››

16Mbwa kiforo wen ha wɛnɛ: ‹‹ Way! Ɔ lɛm mɔ kafi Wankpoo mɔ gɔ hio ma mbing sɔ na. 17Hazu, yo nɛ Wankpoo Sɔ pɛ ɔ agbosisi ɔ nɛ hio ngbabafa ɔ ha ngimɔ ka ɔ bhɔna hasi bala ha Ezipte. Wɛnɛ dea hio gasa mɔ kifi, ɔ ingɔ nɛ dedea. Wɛnɛ bapam ɔ ha ngimɔ fɛt ka ɔ baa gbabɔya wal mana ɔ nɛ̂a nɔ ha soko hio kandɔ fɛt ha bhandi ka ɔ pena ang. 18Wankpoo yinɔ ha sɔngsi ɔ hio kandɔ fɛt, gbesi tuka hio wi mɔ Amori ka ba ɔ hazang lea. Yo nɛ ɛngi ɔ fin, ɔ bede tom pɛ Wankpoo, hazu wɛnɛ nɛ Sɔ pɛ ɔ.››

19Mɛgi Zozue tɔa ha kandɔa: ‹‹Ɛnɛ lɛm mɔ detom pɛ Wankpoo na, hazu, yo nɛ Sɔ ka dung nɛ nzɔya, nɛ wɛnɛ ngoya mɔ dung nɛ Sɔ pɛ ɛnɛ ndang sɔna. Wɛnɛ lɛm mɔ mɛkiri hio guozu nɛ hio sɛmbɔ pɛ ɛnɛ na. 20Ka ɛnɛ ela Wankpoo gde mɔ gɔ hio ma mbing hio sɔ, wɛnɛ bekifiri sungiri ɛnɛ nɛ wɛnɛ bede gdanga nɛ ɛnɛ nɛ wɛnɛ begdangsi hapata dedemɔ ka wɛnɛ bade ha ɛnɛ.››

21Kandɔ ɛngi kiforo wen ha Zozue: ‹‹Way! Ɔ bede nɛ tom pɛ Wankpoo.›› 22Zozue tɔa ha mbwa: ‹‹ Ɛnɛ bedung wan kɛmɔ sungiri ɛnɛ wantɛ nde ɛnɛ sal Wankpoo mɔ detom pɛa nde? ›› Mbwa kiforo wen: ‹‹ Ɛy! Ɔ bedung wan kɛmɔ.›› 23Mɛgi, Zozue tɔa: ‹‹ Ɛnɛ lak gde sising hio ma mbing sɔ ka dung hazang le pɛ ɛnɛ nɛ ɛnɛ hɛl sila ɛnɛ fɛt ha tɛ Wankpoo Sɔ mɔ Israel.›› 24Mbwa tɔa ha Zozue: ‹‹ Ɔ bede tom pɛ Wankpoo Sɔ pɛ ɔ nɛ ɔ beze nu wa!››

25Ha yala ɛngi ha Sisem Zozue dea mbon hinɛ kandɔ ɛngi nɛ wɛnɛ haa mbwa hio mbonga nɛ hio mɔ osi wal. 26Zozue ngɛrka hio wen ndɔng fɛt hazang takarata mɔ mbonga pɛ Sɔ. Hapata, wɛnɛ baa ma gasa ta, wɛnɛ yolsa hasi ma te, hapɛtɛ Twa pɛ Wankpoo ka dung nɛ nzɔya.

27Hapata, Zozue tɔa ha hio wi mɔ Israel: ‹‹ Ɛnɛ zɔk ta ɛngɛ nɛ dedea: yo bedung nɛ mɔ kɛmɔ hazu wen pɛ ɔ, hazu ta ɛngɛ zea hio wen fɛt ka Wankpoo tɔa ha ɔ. Ɛy! Ta ɛngɛ bedung mɔ kɛmɔ sungiri nɛ ɛnɛ nde ha gdɔki wal ha ɛnɛ mɔ tɛ hio kalbho-kalbho wi ha li Sɔ pɛ ɛnɛ.›› 28Mɛgi, Zozue tɔa ha kandɔ ɛngi nde wi ndang ndang anduki ha le ka ɛ haa ha wɛnɛ.

Zozue fea

29Hapata mɔ ɛngi, Zozue bem pɛ Nun, wantom pɛ Wankpoo fea. Wɛnɛ nɛ bɛlɛ gɔmmay ndang zu bhukɔ. 30Ɛ gunɔ wɛnɛ hazang nu ka ɛ bahaa ha wɛnɛ ha Timnat-Sera, hazang kandɔnu mɔ zungari mɔ Efraim, ha wal kala mɔ ngari Gaas. 31Hio wi mɔ Israel dea tom pɛ Wankpoo ha ngimɔ fɛt ka Zozue bhɔna nɛ nɛ zutunɔ. Mbwa bhɔna ka adea tom fin hapata fio pɛa gboa ha ngimɔ ka hio kotowi fɛt bhɔna nɛ zutunɔ, mbwa bazɔk hio mɔ ka Wankpoo bade ha wal pɛ hio kandɔ mɔ Israel na. 32Hio wi mɔ Israel bagun ha Sisem hio gbala tɛ Zozɛf ka mbwa baku ha Ezipte tɛnɛ. Zakob bahɛ ma bhal fɔ ndang nɛ faranga gommay ndang mɔ mbɔli ha kɔ hio bem pɛ Hamor wan le mɔ Sisem. Fɔ ɛngi sising tɛ bonɛ pɛ hio wi mɔ nam pɛ Zozɛf. Yo nɛ hazang fɔ ɛngi ka mbwa bagun gbalatɛ Zozɛf ang.

33Elazar bem pɛ Aaron fea fin. Ɛ gunɔ wɛnɛ hazu bebe ngari ka ɛ bahaa ha bem pɛa Pinas, hazang kandɔnu mɔ zu ngari mɔ Efraim.