Ɛstɛr 1

Yenga yɔngamɔ pɛ kongapora Assierus

1Kasiwen ɛngɛ bahɔ ha ngimɔ pɛ Assierus. Wɛnɛ badung nɛ̂ kongapora ha zu hio kandɔnu gɔmmay ndang nɛ bhuzebwa zanga mɔrkɔ gbala bwa (127), angiri ha Inde gbo ha Etiopi. 2Ha ngimɔ ɛngi, kongapora Assierus dungɔ ha zu solowan pɛa ha zang kin, ha le Suze. 3Ha zetar bɛlɛ ka wɛnɛ dungɔ nɛ̂ kongapora, a dungɔ ha zu ma fada ka wɛnɛ haa ha hio gasa wi mɔ zu tom pɛa hinɛ hio wantom pɛa, ha zugili hio wan-bibulo mɔ Perse hinɛ Medi1, ha hio zio wi hinɛ hio gasa wi mɔ gɔvɔrɔma mɔ hio kandɔnu. 4Wɛnɛ osa ha hio wi ndɔng fɛt long hio lɛkɛ lɛkɛ kpaamɔ nɛ hio dede mɔ fɛt ka ɛ lɛm kpaa ha ma bhandi na, nɛ ka de ngaya mɔ kongakandɔ pɛa. Yenga yɔngamɔ ɛngi baa ngimɔ nɛ dɔka, fioze mɔrkɔ zanga ndang. 5Ha kpogio yala mɔ yenga ɛngi, kongapora haa ma gasa yɔngamɔ mɔ yala mɔrkɔ zanga bwa ha zang dɛl kin mɔ kongapora pɛa ka ɛ gunɔ hio te ang, ha hio wi fɛt ka badung ha le Suze, angiri ha tɛ hio wan kpamɔ gbo ha tɛ hio fabha wi. 6Ɛ bhɔngara zang kina nɛ hio dede bu la mɔ lɛn hinɛ hio bumɔ tɛ hio sami ka dafua lɛma may nɛ lîswe. Ɛ sanga yo ha ngɔn nɛ pɛl la ka dung nɛ gbɛa. Ɛ sanga yo ha tɛ mbanzia ka ɛ dea nɛ bolo mboli nɛ ɛ sanga yo ha tɛ hio nzɔng gasa te twa ka ɛ dea nɛ ta mɔ marbrɛ. Ɛ dea hio dede gasa kiti2 ka ɛ yɛfifi tɛ ang yɔng nɛ mɔ, ka ɛ dea nɛ ɔr hinɛ hio wi mɔ bolo mboli. Nu zang kina nɛ hio ta ka dung nɛ gbɛa, hio ma nɛ bua, hio ma ha duo we, nɛ hio ma nɛ tua. 7Ɛ kapana dɔkɔ ha hio wia ha zang hio kɔpɔ nɛtɛ nɛtɛ ka ɛ doya nɛ ɔr. Gbɛ lî dɔkɔ pɛ kongapora ha sɛa tuka li ka ɛ ku ha hio wi lɛm nɛ dede sila pɛ kongapora. 8Wi ndang ndang nɔ mɔ tuka sila wa ngoya, bo nɛ wal nɔsasamɔ na. Kongapora haa nû nɛ ngaya ha hio wantom mɔ twa pɛa, mɔ de ɔ lɛm nɛ hɛl sila wi ndang ndang. 9Ko pɛ kongapora, Vasti, nɛ bhalkɔa, haa ma fada ha hio bhoko ha zang kin pɛ kongapora Assierus.

Kongapora pensa ko pɛa Vasti

10Ha yala mɔrkɔ zanga bwa mɔ yenga ɛngi, ha zang totɛ nɔa gbɛlî dɔkɔ, Assierus tɔa ha hio napam wɛnɛ mɔrkɔ zanga bwa tuka: Mehuman, Bizta, Harbona, Bigta, Abagta, Zetar banɛ Karkas ka ɛ gba mbwa nɛ mala, nɛ ka dung gdunge gdunge ha pɛtɛ wa, 11mɔ nɛ̂ nɛ ku Vasti tɛ̂ nɛ̂ ha lî kongapora, nɛ ndutu kongapora pɛa fɛt, hazu osi lɔkatɛ wa ha lî hio wi gasa hinɛ hio wi ka ɛ saa fin, hazu wɛnɛ dungɔ nɛ tɛ̂ lɔka pentɛ. 12Maa, Vasti kafa tɛa ha haanû pɛ kongapora ka wɛnɛ tomsa nɛ wal hio wei mala ndɔng. Kongapora zɔka nde Vasti fingsa ɛ. Mɛgi, a dea ngambi nɛ gdanga. 13Kongapora zea may hinɛ hio wan-mbarimɔ. Hazu hio wen zang kin pɛ kongapora fɛt, ɛ bhɔngiri yo ka hinɛ hio wi ka ingɔ mɔ ha zu mbonga banɛ hio ndɔkitɛ mɔ le nɛ ka tɛ̂ sanga nɛ wɛnɛ: 14Kasena, Setar, Admata, Tarsis, Meres, Marsena, hinɛ Memukan nɛ̂ hio gasa wi mɔrkɔ zanga bwa pɛ kongapora mɔ le Perse hinɛ Medi3 Kongapora, nɛ ka mbwa dung ha hio bosi bhandi ha zang kongakandɔ. 15Kongapora tɔa ha mbwa nde:« ngetɛ mbonga ha lɛm nɛ tili deamɔ ɛngɛ ka Vasti dea kafi nɛ haanû pɛ kongapora nɛ wal hio wei mala ndɔng ge nde?»

16Memukan tɔa wen ha lî kongapora hinɛ hio gasa wi mɔ si wa : «Gdanga deamɔ pɛ Vasti bo Sɔna sungiri nɛ kongapora na, maa yo nɛ̂ sungiri hio gasa wi mɔ si wa fɛt banɛ hio wi fɛt ha zang hio kandɔnu pɛ kongapora, Assierus. 17Hazu, ka hio bhoko fɛt be ing wen kafamɔ pɛ Vasti ha haa nû pɛ kongapora Assierus, mbwa be angiri bhesara hio wei pɛ mbwa, ka ɛ beba kasia ha mbwa nde kongapora Assierus haa nû nde, ɛ ku ko pɛa tɛ̂ nɛ̂ ha lî wa, nɛ Vasti kafa nɛ̂a. 18Sising, hio bhoko mɔ Perse hinɛ mɔ Medi beze wen kafa haanû pɛ ko pɛ kongapora ɛngɛ, mbwa betɔ ndangtɛ wen mɔsoykisi ha tɛ hio wei pɛ mbwa fɛt. Mɛgi, hio bhoko lɛm zisi hio wei pɛ mbwa na, nɛ sila hio wei pɛ mbwa beyim sungiri mbwa. 19Ka sila Kongapora ngoya, ɛ begbasi wen ka kongapora tɔa, ka ɛ kpalsi na, nɛ ka ɛ gdea ha zang hio mbonga mɔ Perse hinɛ Medi nde Vasti lɛm tɛ fin ha lî kongapora Assierus na. Nɛ kongapora be ha ziomɔ mɔ kongakandɔ pɛa ha ma Sɔy danwa bhoko ka dung nɛ dedea pen wɛnɛ. 20Ka hio wi fɛt ha zang kongakandɔ pɛ mɛ, be ing zio wen gɔnanû ɛngɛ, hio bhoko fɛt bezisi hio wei pɛ mbwa, angiri ha wan kpamɔ gbo ha tɛ hio fabha wi.»

21Gbasamɔ ɛngɛ baa sila kongapora hinɛ hio wi ka mbwa saa, nɛ kongapora dea mɔ lɛm nɛ wen ka Memukan batɔ. 22A tomsa hio takarata ha zang hio kandɔnu pɛa fɛt, nɛ ɛ ngɛraka takarataa ha zang kandɔnu ndang ndang fɛt nɛ wal ngɛraka mɔ pɛa nɛ nû lea. Nɛ kandɔ ndang ndang nɛ nûle pɛa tuka nde hio wei ndang ndang fɛt ka dung wan ha twa pɛa, nɛ wɛnɛ atɔ wen nɛ nûle pɛa.