Skip to content
BibleKenya

Projet de traduction en Gbaya-Bianda

Zonas 2

Gɔa Sɔ pɛ Zonas

Wankpoo tomsa ma gasa kɔyɔ, nɛ wɛnɛ tɛa gul Zonas. Zonas ɔa hazang kɔyɔ yala tar nɛ zɛ tar. Zonas gɔa Wankpoo, Sɔ pɛa, hazang kɔyɔ. Wɛnɛ tɔa:

«Mi ha gdɔra ha mɛ,

ha ngimɔ ka ngayamɔ kpamay hinɛ mi.

Wankpoo gding mɛ kiforowen ha mi.

Mi saa mɛ mɔ haa kɔ ha mi, hazang ngaya ngimɔ fio,

nɛ mɛ zea gɛl mi.

Mɛ pio mi hazang gduko nanali tɔng,

tɛ mɛ pio mi hatɛ bingsila nanali tɔng.

Hio gbabok kolo ka demɔ hali li,

pen ka pen hazu mi.

Mi tɔa ha sila mi tɔa:

“Wankpoo, mɛ pio mi nɛ nyan nɛ li mɛ kari!

Maa, hɛl zɔka twa gɔ mɛ bhɔna fin ha sila mi,

gasa twa gɔ mɛ nɛtɛ nzɔya.”

Li gulo mi hɔ ha gɛl, nanali tɔng zikoro mi fɛt.

Nɛ hio bɛlɛ libhoko zu mi fɛt.

Mi zilo gbo ha nanga hio ngari.

Mi dung hazang kɔ fio.

Nɛ hio nu kɔ fio ndɔng gdɔka nɛ ngaya mɔsoykim

nɛ Sɔtɛ hazu mi, kpo nɛ kpo.

Maa mɛ, Wankpoo, Sɔ pɔm, mɛ gbosara mi

yunɛ nɛ zutunɔ hazang kɔ fio ɛngɛ.

Wankpoo, Sɔ pɔm, mi tɛbo sanga ha Fea.

Mɛgi, mi bhɔna takaramɔ hazu mɛ, Wankpoo,

nɛ gɔamɔ danga hɔ ha

pɛ mɛ hazang nzɔy twa pɛ mɛ.

Hio wi ka gɔ hio fabha Sɔ zunu,

mbwa kafa dede sila ka mɛ dea nɛ mbwa.

Maa mi, mi belukisi mɛ,

mi be haa sadaka ha mɛ.

Mi beyol hazu gɔna nu ka mi haa ha mɛ.

Kpasa wen, yo nɛ mɛ Wankpoo

ka be kpasisi wi nɛ tunɔ!»

Mɛgi Wankpoo haa nu ha gasa kɔyɔ ki nde: «Mɛ ɔy Zonas ha kpɛnu ha nukolo!» Nɛ kɔyɔ ki deamɔ mɔsoykisi tuka Wankpoo ana wɛnɛ mɔ de.

Projet de traduction en Gbaya-Bianda. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.