Zonas 1

Zonas ngoy mɔ yumɔ ha pɛtɛ Wankpoo

1Ma swe, Wankpoo haanu mɛgɛ ha Zonas, bewei pɛ Amitai: 2«Gutɛ! Mɛ nɛ ha ngbale Ninive1. Mɛ hembela hazu hio wi mɔ lea nde: “Tɛ Wankpoo kata hatɛ zɔka hio gdangamɔ pɛ ɛnɛ.”» 3Zonas guotɛ mɔ pen, maa wɛnɛ yuomɔ mɔ nɛ ha le Tarsis ha pɛtɛ Wankpoo. Wɛnɛ hɔa ha Zafa. Haki, wɛnɛ kpa ma kuga ka ngoy mɔ pen ha Tarsis. Ka wɛnɛ futo mboli kuga pɛa kari, a danga hazang kugaa mɔ pen hinɛ hio wan kuga ki mɔsoykisi ha Tarsis, yunɛ li Wankpoo.

4Maa, Wankpoo pio ma gasa kolo gbabok hazu nanali tɔng sungiri nɛ kuga ki, nɛ yo ngoy mɔ nɔli. 5Gasa ke baa hio wan kuga ɛngɛ. Nɛ wi ndang ndang angara gdɔra nɛ gɛl saa nɛ hio Sɔ pɛ mbwa. Mbwa kaya hio ma toy gɛnɛ ka dung hazang kuga ɛngɛ gɔsi ha li kade kugaa ale li na. Ha ngimɔ ɛngi, Zonas tɛbo pɛa ha wusotɛ wa ha gdɔk kuga. Wɛnɛ dung pɛa haki yɛfifi nɛ tɛ wa sɛmkpa, ɔ nɛ̂ la. 6Kagama kuga ɛngɛ zilo nɛ sanga nɛ Zonas nɛ tɔ ha wɛnɛ nde: «Ngetɛmɔ ha kpa mɛ ge? Mɛ ɔ nɛ̂ la! Gutɛ nɛ mɛ gdɔri ha Sɔ pɛ mɛ! Mana a bede kobhetɛ ɔ, nɛ ɔ lɛm kpa fio na.»

7Hapata, hio wan kuga tɔa hasoko may nde: «Mɔ ing wi ka dung hagdɔng hio ngay mɔ ka kpamay hinɛ ɔ, lɛma nde ɔ mɛli sasa nɛ ling wi ndang ndang.» Mbwa mɛla sasa nɛ kpa nde yonɛ hawenzu Zonas ka ngayamɔ kpamay hinɛ mbwa. 8Mɛgi, hio wan kuga ɛngɛ tɔa ha Zonas: «Ngayamɔ ɛngɛ kpamay hinɛ ɔ hawenzu mɛ. Tɔ ha ɔ: Mɛ dea nɛ ngete mɔe nde? Mɛ gutɛ ha ndo? Mɛ nɛ wi mɔ ngete le? Mɛ nɛ nge kandɔ ge?» 9Zonas kiforowen nde: «Kandɔ pɔm nɛ hebru. Nɛ yo nɛ Sɔ ka mi lukisi, Sɔ ka dung ha kuso ngɔn, wi ka dea nanali tɔng banɛ nu.» 10Hapata, Zonas uso ha hio wi ndɔng pata hio wi mɔ ka hɔa ha wɛnɛ. Ka mbwa ingɔ nde, Zonas ba yumɔ nisi haki ha pɛtɛ Wankpoo, sila mbwa fɛt nɛ gasa ke nɛ mbwa ana wɛnɛ mbwa tɔa: «Mɛ dea kandɔ mɔ ɛngɛ hawenzu ge?» Nɛ mbwa ana wɛnɛ: 11«Ɔ bede nɛ ngete mɔ nɛ mɛ nde kade nanali tɔng aga hatɛ ɔe nde?» Dada li tɛbo nɛ ngaya pentɛ fin. 12Zonas kiforowen ha hio wan kuga nde: «Ɛnɛ dɔl mi pi ha nanali tɔng. Mɛgi, nanali-tɔng bega hatɛ ɛnɛ. Ɛy, mi ingo nde yonɛ hawenzu mi ka gasa gbabok kolo ɛngɛ de ngaya hinɛ ɛnɛ.» 13Hio wan kuga ɛngɛ ngayatɛ mbwa mɔ nɛ nɛ kuga pɛ mbwa ha nukolo gan, mbwa kpa wal na. Hazu dadali tɛa nɛ ngaya pentɛ sungiri mbwa. 14Hio wan kuga ndɔng gɔa Wankpoo nɛ mbwa tɔa: «Ah! Wankpoo, mɛ gbɛ ɔ hawenzu wei ɛngɛ na! Mɛ gde wen fio pɛ ma dede wei hazu ɔ na. Yo nɛ mɛ Wankpoo ka demɔ tuka sila mɛ ngoya.»

15Hapata, mbwa dɔla Zonas nɛ pi wɛnɛ ha nanali tɔng. Suu, ngaya dadali tɔng kara sɛɛ. 16Hapata fin, sila hio wei ka dung hazang kuga ɛngi dona nɛ ke pɛ Wankpoo. Mbwa haa sadaka ha wɛnɛ, nɛ mbwa gɔna nu hali wa.