Ɛstɛr 7

Fio pɛ Haman

1Kongapora hinɛ Haman nɛ̂a dea fada ha pɛ Esther, ko pɛ kongapora. 2Ha zebwa yala ɛngi fin, ha ngimɔ ka ɔ anɔa vin, kongapora tɔa ha Esther: «Mɛ ani nɛ̂ ge Esther, ko pɛ kongapora? Ɛ beha yo ha mɛ. Mɔ ka mɛ ngɔy nɛ̂ ge? Ngase yo adung nɛ̂ kongakandɔ nu pɔm mi behaa mɛ.» 3Esther, ko pɛ kongapora kiforo wen: «Ka mi kpa dede sila pɛ mɛ, kongapora pɔm, nɛ ka kongapora ngoya, zɔk, anamɔ pɔm nɛ̂ ɛngɛ: Mi adung nɛ zutunɔ nɛ kandɔ pɔm fin adung nɛ zutunɔ. 4Hazu ɛ gdonga ɔ, mi nɛ kandɔ pɔm, nde ɛ bhondisi ɔ, ɛ gbɛ ɔ, nɛ ɛ hɔn ɔ! Fin, ɛ baa gdongi ɔ, hio wei hinɛ hio bhoko, tuka hio bala, mɛgi, mi bedung sɛm, hazu badung nɛ̂ ma mɔ ka ɛ lɛma gbazu ang hinɛ kongapora na.» 5Kongapora Assierus kuo wen nɛ ani nɛ Esther, ko pɛa nde: «Nɛ̂ o, mana nɛ̂ ge wi ka sila wa dona nɛ hio takaramɔ ɛngi ge?» 6Esther kiforo wen: «Kɔmbɛ ɔ, ngana pɛ ɔ, nɛ̂ Haman, wɛnɛ nɛ̂ gdanga sila!» Mɛgi, gasa ke baa Haman ha lî kongapora nɛ ko pɛa Esther. 7Ngambi baa kongapora, aguotɛ ha bhandi dea fadaa, a nɛ̂a ha zang kin pɛa ha bhandi ka hio dede dote ang. Nɛ Haman bhɔna haki mɔ baa nanga Esther, ko pɛ kongapora, nde wɛnɛ akpasisi ɛ ha fio, hawenzu kongapora betɛ gbɛ wɛnɛ. 8Kongapora guotɛ ha zang kin ha bhandi ka dote ang, nduki ha bhandi ha bhandi fadaa, ha ngimɔ ka Haman tekala ha zang gasa kiti ka Esther yɛfafa tɛ ang. Mɛgi kongapora gdɔra: «Ha zua fin, ɛ ngoy mɔ ɔnu nɛ ko pɔm ha lî mi nɛ ngaya ha zang kin pɔm!» Ka wɛnɛ bo ka ha tɔa wena mɛgi, ɛ hɛla lî Haman.1 9Harbona, ma ndang ha soko hio na pam kin pɛ kongapora, tɔa ha lî kongapora: «Zɔk, ma kuso te ang ka Haman bhɔngara ha pɛa ha wenzu Mardose ka tɔa dede wen pɛ kongapora. Kuso tea lɛma nɛ mɛtɛrɛ bhuzebwa zanga mɔrkɔ.» Kongapora tɔa: «Ɛ gɛsi wɛnɛ ang.2» 10Ɛ gɛsa Haman ha tɛ te ka wɛnɛ bhɔngara ha wenzu Mardose. Hapata, ngambi pɛ kongapora gaa.