Ɛstɛr 6

Ziomɔ ka ɛ haa ha Mardose hinɛ foe pɛ Haman

1Ha zɛ ɛngi, la hɔ ha lî kongapora na. A ana nde ɛ ku takarata mɔ hio kasiwen mɔ bɛlɛ ndang ndang mɔ le tɛ̂ nɛ̂ ha wɛnɛ. Takarata ka ɛ ngɛraka hio gasa zuwen mɔ lea ang. Nɛ ɛ tɔla yo ha lî kongapora. 2Ɛ tɔla bhandi wen ka Mardose gbasa ha zu Bigtan hinɛ Ters, hio wantom bwa pɛ kongapora ka pam nûtwa kin ka kio lîwal mɔ gbɛ kongapora. 3Kongapora tɔa: «Ngete zio kɛamɔ ka Mardose kpaa ha dea mɔ ɛngi ge?» Hio wi ka de tom ha kongapora kiforo wen: «Ɛ tɛ̂ haa ma mɔ ndang ha wɛnɛ na.» 4Mɛgi, kongapora tɔa: «O ha lîdɛl o nde?» Yo dungɔ nɛ̂ Haman ka hɔa ha lîdɛl kin pɛ kongapora, hazu tɔ ha kongapora nde ɛ gɛsi Mardose ha te ka wɛnɛ bhɔngara ha zu Mardose. 5Hio wantom pɛ kongapora kiforo wen: «Yo nɛ̂ Haman ha yol ha lîdɛl kin.» Kongapora tɔa: «Wɛnɛ ale twa!» 6Haman lea twa, nɛ kongapora tɔa ha wɛnɛ: «Ɛ be de nɛ̂ ge ha ma wi ka kongapora ngoy mɔ baa wɛnɛ nɛ zio ge nde?» Haman tɔa ha zang sila wa: Ma wi ka kongapora lɛma ha ziomɔ ha wɛnɛ mɔ pen mi bona? Gan, yo ka nɛ mi!» 7Haman kiforo wen ha kongapora: «Kongapora ngoya baa ma wi nɛ zio? 8Ɛ ku ma gasa latɛ ka kongapora yola kari, nɛ ma yanga ka kongapora danga zua kari, nɛ ɛ gde ndutu konga ha zu wa. 9Ɛ ha gasa latɛ, mɔsoykisi nɛ yanga ka ma zio wi ndang ha soko hio gasa wantom pɛ kongapora baa. Ɛ yol laa ha wei ɛngɛ ka kongapora ngoy mɔ ba nɛ zio, ɛ ngbɔsi wɛnɛ ha zu yanga nɛ nɛ̂ ha gasa bhandi wesiri may, ɛ gbasi ha lî wa: Zɔk, ɛngɛ nɛ̂ mɔ ka ɛ de ha tɛ wi ka kongapora ngoy ba nɛ zio.

10Kongapora kiforo wen ha Haman: «Nɛ dedea, nɛ nɛ̂ hasa mɛ ku gasa latɛ hinɛ yangaa tuka mɛ tɔa, nɛ mɛ de mɛgi nɛ Zuif Mardose, ka dung nu ha nûtwa kin pɛ kongapora. Mɛ lakgde ma bebe mɔ ka mɛ tɔa ndang na. 11Haman kuo gasa latɛ yol ha tɛ Mardose, nɛ wɛnɛ kuo yangaa ngbɔsi nɛ Mardose nɛ nɛ̂ ha zang bhandi mɔ gasa bhandi wesiri may, nɛ gbasa ha lî wa: «Zɔk, ɛngɛ nɛ̂ mɔ ka ɛ de ha tɛ ma wi ka kongapora ngoy baa nɛ zio!

12Hapata, Mardose kiforo ha nûtwa kin pɛ kongapora, nɛ Haman hasa tɛ mɔ si ha nûtwa pɛa nɛ foe, wɛnɛ goka lî wa nɛ la mɔ wusi nɛ foe pɛa. 13Haman baa kasi mɔ ka hɔa ha tɛ wa ha ko pɛa Zeres, hinɛ hio dan wa fɛt, hio wan-hambɔla pɛa, hinɛ ko pɛa Zeres tɔa ha wɛnɛ: «Ka wɛnɛ nɛ̂ kandɔ Zuif, Mardose ɛngɛ ka mɛ angara teka ha si wa kari, mɛ lɛm mɔ zati ha lî wa fin na, mɛ lɛm mɔ baa liaa ha Sɔngsi wa fin na.» 14Ka mbwa bhɔna ha wola mɔ ha wɛnɛ, hio napam kin pɛ kongapora hɔa. Mbwa kuo Haman nɛ hasa nɛ nɛ̂ ha yɔngamɔ ka Esther bhɔngara.