Ɛstɛr 4

Mardose ana Esther mɔ al nû ha kongapora

1Ka Mardose zea wen mɔ ndɔng fɛt ka hɔa, a gbaa hio latɛ wa yu nɛ̂ a tɛ wa, wɛnɛ yola la-zimmɔ, a aa bokwe1 ha zu wa, nɛ wɛnɛ nɛa nɛ yo ha zang le. A gdɔra nɛ ngaya nɛ ngɔtɛ. 2Mɛgi, a hɔa ha nû kin pɛ kongapora, a yola, hazu yo dungɔ nɛ ngaya nde ma wi ale ha kin pɛ kongapora nɛ la zim-mɔ. 3Ha zang hio kandɔnua ndang ndang, ha bhandi fɛt ka haanû pɛ kongapora hɔa ang, hio Zuif tɛ bo nɛ gasa ngɔtɛ: Mbwa ha zimɔ yɔngamɔ, mbwa ha hea kwa, nɛ mbwa ha lokatɛ, hio ma nɛ dɔka ha ɔa nu ha zu hio la-zimmɔ nɛ ha zang bokwe.

4Hio bhoko wantom pɛ Esther hinɛ hio wei ka ɛ gbaa mbwa nɛ mala tɛa tɛ tɔ pata hio wi mɔ ka mbwa zɔka nɛ sila Esther bhunzoko. A tomsa hio ma la ha Mardose mɔ tɔ nde wɛnɛ ha kpɔsi yol ha bhandi la mɔ zimmɔ ka yo ha tɛ wa. Maa, Mardose kafa. 5Mɛgi, Esther saa Hatak, ma ndang ha soko hio wei mala ka kongapora sala mɔ de tom ha si Esther. Wɛnɛ haa nû ha Hatak ha zu Mardose, mɔ ing mɔ ka hɔa, nɛ goto wena nɛ ge mɔ ka ngbɔsi Mardose ha deamɔ ɛngi. 6Hatak gboa nɛ kpa may hinɛ Mardose ha gasa bhandi kpamay ka zɔk may hinɛ kin pɛ kongapora. 7Mardose kiforo pata wen hio wi mɔ ka hɔa ha wɛnɛ, nɛ hio wen mbɔli fɛt ka Haman gɔna nû mɔ gɔsi ha zang hio kubha mbɔli pɛ kongapora hazu bhondisi nɛ hio Zuif. 8A haa fin ma takarata mɔ mbonga ka ɛ gbasa ha Suze ha Hatak, nɛ ka ha nû mɔ bhondisi hio Zuif. Mardose tɔa ha Hatak mɔ osi yo ha Esther, mɔ kifiri pata wena fin ha wɛnɛ, nɛ mɔ ha nû ha wɛnɛ mɔ nɛ̂ ha pɛ kongapora hazu ani dede sila nɛ al nû ha wɛnɛ hazu kandɔ pɛa. 9Hatak tɛa tɛ tɔ ha Esther pata wen fɛt ka Mardose tɔa ha wɛnɛ. 10Esther tɔa ha Hatak, nɛ wɛnɛ haa nû ha wɛnɛ nde wɛnɛ atɔ ha Mardose: 11«Hio wantom pɛ kongapora fɛt, nɛ hio wi mɔ kandɔnu pɛa fɛt ingɔ nde, hio wi fɛt, wei mana bhoko, ka le ha zang kin pɛ kongapora, ka ɛ tɛ̂ sa wɛnɛ na, ɛ begbɛ wɛnɛ lɛm nɛ ma mbonga ka dung ha zu wi fɛt. Wi ka bebhɔn nɛ zutunɔ, bedung Sɔna nɛ̂ wi ɛngɛ ka kongapora beyɛfifi tongolo pɛa mɔ ɔr ha tɛ wa. Maa, pɔm, dea yala bhukɔa tar ka ɛ tɛ̂ sa mi fin mɔ nɛ̂ ha pɛ kongapora na.» 12Ɛ tɔa pata wen nû Esther ha Mardose. 13Mardose kiforo wen ha Esther: «Mɛ takiri pɛ mɛ nde, mɛ ndang Sɔna bekpɔy ha soko hio Zuif fɛt hazu mɛ ha zang twa pɛ kongapora nde? 14Ka mɛ bhɔna ha dungɔ sɛm ha mɔ ɛngɛ, gaamɔ hinɛ kpasi pɛ hio Zuif betɛ nɛ ma wal nɛtɛ? Way, mɛ hinɛ nam pɛ mɛ, ɛnɛ befe. Maa o ha be ing o nde? Mɛ tɛ bo nɛ̂ ko pɛ kongapora, ɔ ing na mana yo nɛ̂ hazu kpasisi ɔ ha zang ngamɔ ɛngɛ.» 15Mɛgi, Esther kiforo wen ha Mardose nde: 16«Mɛ nɛ̂, nɛ wesiri hio Zuif fɛt ka dung ha le Suze. Ɛnɛ zim yɔngamɔ nɛ ɛnɛ gɔ Sɔ ha wen zu mi, ɛnɛ yɔng mɔ nɛ nɔ mɔ na, swe nɛ zɛ, kanɛ̂ yala tar. Mi fin, mi bezim mɔ mɔsoykisi hinɛ hio bebhoko wantom pɔm. Hapata hio wi mɔ ndɔng, mi benɛ ha pɛ kongapora ngase mbonga ang ka gdɔki wal mɔ nɛ ha pɛ kongapora nɛ tum. Ka yo nɛ nde mi afe, mi befe! 17Tuka ɛngi Mardose pena nɛ de mɔ ka Esther haanû ha wɛnɛ mɔ de.