Ɛstɛr 3

Haman hinɛ Mardose tɛ bo nɛ̂ hio ngana ha soko may

1Ha pata hio wi mɔ ndɔng, kongapora Assierus haa ziomɔ pentɛ ha Haman, bewei pɛ Hammedata, mɔ nam pɛ Agag1. Kongapora gdea wɛnɛ tuka bosi gasa wi mɔ gɔvɔrɔma pɛa ha zu hio olo bewan fɛt. 2Hio wantom pɛ kongapora fɛt ka de tom ha nû kin, ha hilo nɛ gɔm zu ha si Haman hazu haa ziomɔ ha wɛnɛ. Kongapora ba haa nû mɛgi. Tangere, Mardose tɛ̂ hil nɛ gɔm zu wa ha si Haman na. 3Hio wantom pɛ kongapora fɛt ka dung ha nû kin, tɔa ha Mardose nde: «Ha wen ge mɛ pen nɛtɛ ha haanû pɛ kongapora ge nde?» 4A kiforo wen ha mbwa nde ɛ nɛ̂ Zuif. Mɛgi mbwa dungɔ ha ana wɛnɛ yala ndang ndang ha wena, maa, a ze mbwa na. Mɛgi, mbwa tɔa pata wena ha Haman, mɔ zɔk mana Mardose ka batɔ ha mbwa nde ɛ nɛ̂ Zuif, bebhɔn ha zu deamɔ pɛa nde? 5Haman zɔka nde Mardose tɛ̂ hil nɛ gɔm zu ha si wa hazu haa ziomɔ ha wɛnɛ na, nɛ gasa ngambi dea Haman pentɛ. 6A tɛ̂ zɔk nɛ dedea mɔ de gdangamɔ ha tɛ Mardose gbatɛ na, nɛ ɛ gbasa ha wɛnɛ kandɔ pɛ Mardose. Mɛgi Haman kio wal mɔ bhondisi hio Zuif ka dung nɛ̂ hio wi pɛ Mardose ha zang kongakandɔ pɛ Assierus fɛt. 7Ha bosi ze ka ɛ sa nde Nisan, ha bhukɔ gbala bwa bɛlɛ mɔ konga pɛ Assierus, ɛ gɔsa ha lî Haman, ma mɔ nde pur ka dung tuka zeke, ha zu yala ndang ndang mɔ hio ze bhukɔ gbala bwa mɔ bɛlɛ ndang. Nɛ zekea osa bhukɔ gbala bwa ze ka ɛ sa nde Adar2.

Haman bheka mɔ gbɛ hio Zuif

8Haman tɔa ha kongapora Assierus: «Ma kandɔ ang nɛtɛ. Mbwa ha bhandi fɛt, mbwa lea ha soko hio kandɔ fɛt ha zang konga kandɔ mɔ kandɔ pɛ mɛ. Hio mbonga pɛ mbwa gbaa soko mbwa nɛ hio olo kandɔ fɛt. Nɛ mbwa ngoy dea mɔ lɛm nɛ pata hio mbonga pɛ kongapora na. Lɛm nde kongapora a gde mbwa mɛgi na. 9Kongapora, mɛ gde kɔ̂ ha si ma mbonga ka ha wal ha ɔ mɔ gbɛ mbwa fɛt, nɛ mi begɛsi zio bolo mbɔli ka lɛm nɛ mɔ gɛsimɔ kilo tomay gɔmmay tar (300 000) gde ha kɔ̂ hio wan-pammboli mɔ gɔvɔrɔma, hazu gɔsi yo ha zang kubha mbɔli pɛ kongapora.» 10Kongapora kpɔsa konga3 pɛa ha bhanzakɔ̂ wa yu nɛ̂, nɛ ha yo ha Haman ngana pɛ hio Zuif, bewei pɛ Hammedata, mɔ nam pɛ Agag. 11Kongapora tɔa ha Haman nde: «Mbɔlia abhɔn ha kɔ̂ mɛ, mɔsoykisi nɛ kandɔ ɛngi, mɛ de mɔ ka sila mɛ ngoya ha tɛ mbwa!»

12Ɛ saa hio wan-ngɛrikimɔ pɛ kongapora fɛt ha yala bhukɔ gbala tar mɔ bosi ze. Ɛ ngɛraka hio haanû pɛ Haman fɛt ha ma takarata ha hio kɔmanda pɛ kongapora, ha hio gasa wi mɔ gɔvɔrɔma mɔ hio kandɔnu ndang ndang, hinɛ hio bewan mɔ kandɔ ndang ndang, ha kandɔnu ndang ndang ha zang ngɛrakamɔ pɛa, nɛ hio kandɔ ndang ndang ha zang nûle pɛa. Ɛ ngɛraka yo nɛ ling kongapora Assierus, nɛ Haman gdea dafu kɔ̂ kongapora ha tɛa nɛ wal konga ka wɛnɛ yola ha bhanzakɔ̂ wa. 13Ɛ tomsa hio ngɛrakamɔ ndɔng ha kɔ̂ hio wan-nɛ̂tom mɔ kapini yo ha zang hio kandɔnu pɛ kongapora fɛt: Dungɔ nde ɛ bhondisi, ɛ gbɛ nɛ ɛ bisi hio Zuif fɛt yu nɛ̂ angiri ha hio pɔlɔmbɔ wi gbo ha tɛ hio gbɛla wi, hio bhobem tuka hio bhoko, ha zang ma yala ndang, ha yala bhukɔ gbala tar, mɔ bhukɔ gbala bwa zea, ka dung nɛ̂ ze Adar. Ɛ lɛma kaya hio wi mɔ pɛ mbwa nɛ ngambanzi. 14Takarata ka gbasi mbonga ɛngi, ɛ tomsa yo ndang ndang ha zang hio kandɔnua fɛt. Ɛ tɔl yo ha hio wi mɔ le fɛt kade mbwa adung sanga ha yala ka ɛ osa. 15Hio wan nɛ̂ tom pena nɛ hasa, ha si nga wen nû kongapora, nɛ ɛ tɔla mbonga ɛngɛ ha hio wi mɔ le Suze. Kongapora hinɛ Haman dungɔ nu ha nɔa mɔ pɛ mbwa. Maa, zu hio wi mɔ le Suze tɛ bo yembele yembele.