Geeshsha Mexaafa
Mazamure Maxaafa 96
GODAAS ooraththa
mazamure yexxite;
sa7an de7iza asawu!
Ubbay GODAAS yexxite.
GODAAS yexxite;
iza sunththaa sabbite;
izi ashshizayssa hach hach yootite.
Kawoteththata giddon
iza bonchcho qonccisite;
asa ubbaa giddon malalisiza
iza ooso awajjite.
GODAY gita;
gita galataykka izas bessees;
ubba xoossatappe aadhdhidi
izi yayettanaas bessees.
Dere asay goynniza xoossati
ubbay eeqa xoossata;
gido attiin GODAY
salota medhdhida Xoossa.
Bonchchoynne teemay
iza yuushon dees;
minoteththaynne puulay
iza Keeththan dees.
Intteno biitta bolla diza
dere ubbatoo!
GODAA bonchcho gishshassinne
iza wolqqa gishshas galatite.
Iza sunththas bessiza bonchcho
GODAAS immite;
Yarsho ekkidi iza Keeththa zago gelite.
Iza geeshshateththa puulan GODAAS goynnite;
biittan de7iza as ubbay
iza sinththan kokkorite.
Kawoteththata giddon,
«GODAY kawotides!
Sa7ay minni eqqides;
mulekka qaaxxenna;
izi as ubbaas
issi gina pirdana» giite.
Saloynne sa7ay ufayetetto!
abbaynne iza giddon diza
ubbati guummetto!
Goshsha gadeynne iza bolla diza
ubbay ufayetto!
Woran diza mith ubbay
iza sinththan ufayssan yexxana.
Ays giikko GODAY yaana;
izi sa7a bollan pirdanaas yaana;
izi ha sa7a bolla xilloteththan,
asa bollaka
tumateththan pirdana.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.