Geeshsha Mexaafa
Mazamure Maxaafa 97
GODAY kawotides;
sa7an de7iza asay ufayetto;
abba giddon de7iza
haruroti ufayetetto.
Shaaraynne sakkanna dhumay
iza yuuyi aadhdhides;
xilloteththinne tumateththi
iza kawoteththa
araataas yochcha.
Tamay izappe sinththara bees;
iza yuushon diza
morkketakka xuuggees.
Iza wolqqanththi sa7a poo7isees;
biittay hessa be7idi qaaxxees.
GODAA sinththan,
sa7a ubbaa Godaa
sinththan zumati
muqaadda mala seerida.
Saloti iza xilloteththaa awajjeettes;
asay ubbay iza bonchcho be7ees.
Misletas goynnizaytinne
eeqa xoossatan ceeqettizayti
ubbay yeellatetto!
eeqa xoossati Ubbay
GODAAS gulbatetto!
Abeet GODAWU!
Xiyoone asay ne xillo pirda
siyidi ufayettees;
Yuhuda katamatikka,
«Hashshu» geettes.
Abeet GODAWU!
Neni sa7a ubbaafe dhoqqaasa;
xoossata ubbaafe neni gitataasa.1
GODAA dosizaytoo! Iita ixxite;
izi baas ammanettizayta
shemppo naagees;
qasseka iitata kusheppeka
ashshees.
Xillotas poo7oy poo7i poo7i baana;
wozina suuretas ufayssi daana.
Intteno xillotoo!
GODAAN ufayettite;
geeshsha sunththa
izayssa galatite.
Source notes (1)
- Cross-reference Maza 29:1-2
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.