Geeshsha Mexaafa
Mazamure Maxaafa 98
Mazamure
GODAAS ooraththa
mazamure yexxite;
gaasoykka izi malalisiza
miish ooththides;
iza ushachcha kusheynne
iza geeshsha qesey
izas xoono immides.
GODAY ba ashshizayssa erisides;
izi ba xilloteththaka
kawoteththas qonccisides.
Izi Isra7eeleta siiqizayssanne
isttas ammanettizayssa
hassa7ides;
sa7a gaxa gakkanaas diza
asay ubbay
nu Xoossay ashshizayssa be7ides.
Sa7a bollan diza as ubbay
GODAAS ufayssan yexxite;
qaala dhoqqu ooththidi
ufayssa yeththan galatite.
Bagana diixxishe
mazamuren GODAA galatite;
Dinkenne zaye punnishe
nu kawaa GODAA sinththan
ufayssan ililite.
Abbaynne abba giddon kumida
ubbay guummo!
sa7aynne sa7a bollan diza
ubbay yexxo!
Shaafati issife
bantta kushe baqqetto!
zumati GODAA sinththan
issife ufayssan yexxetto!
GODAY sa7a bollan pirdanaas yaana;
izi ha sa7a bolla xilloteththan
asa bollaka
suureteththan pirdana.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.