Mazamure Maxaafa 63

Yuhuda Bazzon Diza Wode Dawite Mazamure

1Abeet Xoossawu!

Neni ta Xoossa;

ta nena wozinappe koyays;

ta ashoykka nena amottees.

Haaththi baynda mela biittay

haath koyza mala ta asateththay

nena saamettees.

2Tani nena geeshshasohon xeelladis;

ne wolqqanne ne bonchcho

tani be7adis.

3Ne mernaa siiqoy de7oppe lo7ees;

ta inxarsay nena galatees.

4Ta de7o layththankka

tani nena galatana;

ne sunththan ta kushe

pude neekko denththana.

5Asi lo7o kath mi kallidi

ufayettiza mala

ta shemppoya nenan ufayettana;

tani ta inxarsan ufayssa yeththan

nena galatana.

6Tani ta hiixan dashe

nena hassa7ays;

omarsa kumeth

ne ooso yuushsha qoppays;

7Neni tana maaddiza gishshas

tani ne qefe kuwan uttada

ufayssan yexxays.

8Ta shemppoya shiphphi ga kaalladus;

ne ushachcha kusheykka

tana minththi oykkides.

9Gido attiin tana wodhana koyzayti

biitta garsan ciimma ollan

moogettana.

10Istti mashshas aadhdhi imettana;

istti godare kawo gidana.

11Gido attiin kawoy

Xoossan ufayettana;

Xoossa sunththan caaqqiza ubbay

iza galatana;

wordo haasayzayta

doonay gidikko gordettana.1