Mazamure Maxaafa 64

Dawiti Zammareta Kaabbos Yexxida Mazamure

1Abeet Xoossawu!

Ta magana neni siya;

ta shemppoyo

wodhanaas mandiza

ta morkketappe tana ashsha.

2Pala asata maqqofenne

makkallanchchata duulatappe

tana genththa.

3Istti bantta inxarsaa

mashsha mala leefida;

qasse marze qaalata

wondafe yiishsha mala

dukkanaas giigsida.

4Istti qotettidi bantta wondafen

xillo as dukkeettes;

asi akeekontta dishin

dukkanaas guye geettenna.

5Istti iita ooththanaas

issoy issaara maqetteettes;

geemara woximade

woththanaas zoretteettes;

istti, «Nuna

ooni be7anee?» geettes.

6Istti gene maqettishe,

«Nuni lo7o maqqo

maqettidos» geettes;

hessika asa wozinaynne kahay

iitan kumidayssa bessees.

7Gido attiin Xoossay

istta ba yiishshan dukkana;

istti akeekontta madunththana.

8Izi istti haasayda qaala

istta bolla zaarana;

isttaka bashshan gaththana;

istta be7ida ubbay

aamusidi hu7e qaaththana.

9He wode asay ubbay

Xoossas yayyana;

Xoossa ooso qonccen yootana;

izi ooththidayssaka

yuushshi qoppana.

10Xilloti GODAAN ufayetetto;

izakka baas baqati

attizaso ooththetto;

wozina suureti ubbay

iza galatetto.