Geeshsha Mexaafa
Mazamure Maxaafa 62
Dawiti Zammareta Kaabbo Edotaanes Yexxida Mazamure
Ta shemppoya Xoossan xalla
shemppo demmawus;
taas atoteththi izappe yees.
Izi xalla taas zaallanne
tana ashshizayssa;
ta qotetta attizaso gidida gishshas
mulekka hirgike.
Cimmidi kundana matida
goda malanne
musida lasha mala
wolqqay baynda as
dhayssanawu sugishe
awude gakkanaas de7andetii?
Istti iza bonchcho sohoppe
kawushshanaas xalla koyeettes;
istti wordon ufayetteettes;
bantta doonan anjjeettes;
gido attiin
bantta wozinan qanggeettes.
Ta shemppoyee!
Woppu gaada Xoossa xalla naaga;
taas hidotay izappe yaana.
Izi xalla taas zaallanne
tana ashshizayssa;
ta qotetta attizaso gidida gishshas
mulekka hirgike.
Taas atoteththinne
bonchchoy beettiday Xoossafe;
izi ta qotetta attizasonne
taas mino zaalla.
Asoo! Ubbaa wode
Xoossan ammanettite;
izi nuus
qotetti attizaso gidida gishshas
intte wozina qofa izas yootite.
Bonchchosoppe
yeleteththi maaddenna;
kadhettidasoppe yeleteththika
ubbay hada.
Istti meezaane denththontta
carko mala;
istti issi bolla
carko mala kawushsha.
Bonqqan ammanettofte;
kaysi shiishshida dureteththan
hidota ooththofte.
Inttes dureteththi darikkoka
intte wozina iza bolla woththofte.
Xoossay issito haasaydes;
tani nam7u yo7ota siyadis;
heytikka, «Wolqqay Xoossassa;
mernaa siiqoy Xoossassa.»
Abeet Godawu!
Neni as ubbaas
iza ooso ooso mala immana.1
Source notes (1)
- Cross-reference Iyo 34:11; Er 17:10; Mato 16:27; Oro 2:6; Ajju 2:23
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.