Mazamure Maxaafa 28

Dawite Mazamure

1Abeet GODAWU! Ta Zaallawu!

Tani nena xeygishin

taas sissi ixxofa;

ta waassishin ne co7u giikko

tani duufon geliza

asata mala gidana.

2Ta kusheza ne Geeshsha

aqoso miccada woossishinne

tana maaddarkki gaada

ta waassishin ne siya.

3Ba wozinan iita qoppishe

ba laggetara saroteth haasayza

iita ooththizaytara

tana isttara gaththa efoppa.

4Ne isttas istta iitateththaa malanne

istta ooso mala imma;

isttas istta kushe

ooso mala zaara;

istti ooththida iita oosozas

halo kessa.1

5Istti GODAA oosos wudu gontta

ixxida gishshas,

iza kushe oosotas soho

immontta aggida gishshas,

izi istta laallana;

zaaridikka keexxenna.

6Ta woosa siyida gishshas,

GODAY galatetto.

7GODAY taas wolqqanne gondalle;

ta wozinay izan ammaneettes;

hessan tani maadettadis;

hessa gishshas

ta wozinay izan ufayettees;

tani iza yeththan sabbana.

8GODAY ba deraas wolqqa;

izi ba tiyda kawoza

ashshiza miixa.

9GODAWU! Ne deraa ashsha;

nees gidizayta anjja;

istta heenththanchchay

nena gida;

neni istta mernaaskka tookka.