Geeshsha Mexaafa
Mazamure Maxaafa 29
Dawite Mazamure
Intteno salon diza medhetatoo!
«Bonchchoynne wolqqay
GODAASSA» giidi yootite.
GODAA bonchcho
sunththaa galatite;
Iza geeshshateththa teemas
GODAA goynnite.1
GODAA cenggurssay
haaththata bollan siyettees.
Bonchcho Xoossay
dada mala guummees;
GODAY gita haaththata bollan
guummees.
GODAA cenggurssay wolqqama;
GODAA gunththay,
«Nees hoola!» giissizaaza.
GODAA cenggurssay
ziga miththa menththereththees;
Libaanoose zigatakka
GODAY menththereththees.
Libaanoose zumaa
galo mara mala buraqissees;
Siriyoone zumaakka
menththa mala xikisees.2
GODAA cenggurssay
wolqqanth popol7u gees.
GODAA cenggurssay
bazzo qaaththees;
GODAY Qaadeese Bazzo qaaththees.
GODAA cenggurssay
wolata qaaththees;
miththa hayththika qoqofees.
Iza Keeththan de7izayti,
«Bonchchoy
GODAAS gido» geettes.
GODAY di7o haaththa bolla
ba araata woththidi uttides;
GODAY ba kawoteththa
algan uttidi
mernaas haarees.
GODAY ba deraas wolqqa immees.
Ba asaakka saroteththan anjjees.
Source notes (2)
- Cross-reference Maza 96:7-9
- Footnote Sidoona qaalara Siriyoone gizayssi Hermoone bessees.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.