Mazamure Maxaafa 27

Dawite Mazamure

1GODAY taas poo7onne

tana ashshizayssa;

histtiin tani oonas yayyanee?

GODAY ta shemppoys

attiza miixa;

histtiin tani oonas babbanee?

2Iita asati, ta morkketinne

ta balgaarati

tana wodhanawu

taakko hordofi yiza wode,

istti baas dhuphettidi kundana.

3Morkke tooray

tana dooddizaakkoka

ta wozinay yayyenna;

olay ta bolla worajjidaakkoka,

tani GODAAN ammanettays.

4Tani GODAA issi miish oychchays;

hessika tani

ta de7o layth ubbaan

GODAA keeththan de7anaassa;

tani GODAA bonchcho

lo7oteththa be7anaassa;

iza Keeththankka

iza koyashe de7anaassa.

5Hessa gishshas meto gallas

izi tana ba dizason genththana;

ba dunkaanen

tana qotti ashshana;

dhoqqa zaalla bollaka

izi tana essana.

6He wode tana dooddida

ta morkketappe bollara

dhoqqu dhoqqu gaana;

tani iza Dunkaaneza sinththan

ufayssa yarsho yarshana;

tani GODAAS diixxananne

yexxana.

7Abeet GODAWU!

Tani nena xeygiza wode

neni taas koya;

taas qadhetta; tana siya.

8Neni, «Ta sinththa

koyite» gida wode,

ta wozinay,

«Abeet GODAWU! Eeno;

tani ne sinththa koyana» gides.

9Abeet tana ashshiza ta Xoossawu!

Neni tana maaddizaade;

Ne sinththa taappe genththofa;

tana ne aylle hanqettada

neeppe haassofa.

Tana oloppanne aggofa.

10Ta aawaynne

ta aaya tana aggikokka

GODAY tana shiishshi ekkana.

11Abeet GODAWU!

Ne oge tana tamaarsa;

ta morkketa gishshas

tana suure ogera kaaleththa.

12Wordo markkati

ta bolla makkallateththan

dendida;

hessa gishshas ne tana

istta iita amos aaththa immofa.

13Tani shemppora paxa dashe

GODAA kiyateth beyanayssa

hidota ooththays.

14GODAAN ammanetta;

minna, hidota qanxxofa,

GODAAN ammanetta.