ዬ ማጻፋ 46

ጌላኦ ናይታ ኤዶ ጌቴቲዛ ዬን ቆሬ ናይቲ ዛማሬታ ካቦስ ዬጺዳ ማዛሙሬ

1ጾሲ ኑኒ ሺቂ ኣቲዛሶኔ

ኑስ ዎልቃ፤

ኑና ሜቶይ ጋኪዛ ዎዴ

ማዳናስ ኢዚ ኡባቶ

ማታን ዴስ።

2ሄሳ ጊሻስ ቢታይ ቃጺኮ፥

ዙማቲካ ዱጌ ኣባን ጌሊኮ

ኑኒ ያዮኮ።

3ኣባ ዳምባላይካ

ጉሚዲ ሆሞቲኮ፥

ኢዛ ዎልቃማ ሃኖን

ዙማቲ ኮኮርኮካ

ኑኒ ዳጋሞኮ።

4ጾሳ ካታማን፥

ኡባፌ ቃ ጾሳይ ዲዛሶን

ኡፋይሲዛ ሻፋቲ ዴቴስ።

5ጾሲ ኢዚ ጊዶን ዲዛ ጊሻስ

ሄ ካታማያ ቃጹኩ፤

ዎንታ ማላዶራ ጾሲ

ኢዞ ማዳና።

6ካዎቴቲ ማካላን ዴንዲዳ፤

ካዎቲካ ኩንዲዳ፤

ኢዚ ባ ቃላ

ቁ ሂስቲ ሲሲዴስ፤

ቢታይካ ሴሪዴስ።

7ኡባፌ ዎልቃማ ጎዳይ

ኑናራ ዴስ፤

ያቆቤ ጾሲ

ኑ ቆቴቲ ኣቲዛ ቆልኣ።

8ሃ ዪቴ፤ ጎዳ ኦሶ ጼሊቴ፤

ኢዚ ሳኣ ዎስቲ

ቡላሲዳኮ ቤኢቴ።

9ኢዚ ሳኣ ጋጻፔ ጋጻ ጋካናስ

ዲዛ ኦላ ቴቄስ፤

ዎንዳፌኔ ቶራ ሜንስ፤

ጎንዳሌካ ታማን ጹጌስ።1

10ሼምፒ ኡቲቴ፤

ታኒ ጾስ ጊዲዳይሳ ኤሪቴ፤

ካዎቴታ ቦላ

ታ ቁ ቁ ጋና፤

ቢታ ቦላካ ታ ቁ ቁ ጋና።

11ኡባፌ ዎልቃማ ጎዳይ

ኑናራ ዴስ፤

ያቆቤ ጾሲ

ኑ ቆቴቲ ኣቲዛ ቆልኣ።