ሌሚሶ ማጻፋ 5

ላይማቴፌ ናጌቴ

1ታ ናዞ! ታ ኣ ኤራቴ

ኔ ዎዚናን ዎ፤

ታኒ ኣኬካን ዮቲዛ ቃላ

ሎኤ ኤዝጋ።

2ሄሲካ ዎዚናማቴ

ኔስ ሚሽ ጊዳና ማላኔ

ኔ ሜቴርሻቲ

ኤራቴ ናጋና ማላሳ።

3ላይማ ማጫሳ ኢንጻርሳፌ

ኤሳ ኢሊሎይ ጾኬስ፤

ኢዚ ሃሳያይ ኦይሳፌካ

ኣ ሹጌስ።

4ጊዶ ኣቲን ኢዛ ዉርሴን

ጎዳሬ ኡ ማላ ጫማዉስ፤

ናምኡ ባጋራ ቃንጺዛ

ቃራ ማሻ ማላ።

5ኢዚ ቶሆቲ ዱጌ ሃይቆሶ ቤቴስ፤

ኢዚ ታንጎይ ሲቲ ሂስቲ

ዱጌ ዱፎን ካሌስ።

6ኢዛ ዴኦ ኦጌስ ዉዱ ጉኩ፤

ኢዚ ኦጌቲ ጌላ፤

ጊዶ ኣቲን ጌላ ጊዲዳይሳካ

ኢዛ ኤሩኩ።

7ታ ናይቶ! ታና ኤዝጊቴ፤

ታ ዮቲዛ ቃላፔ ኬኦፒቴ።

8ኢንቴ ኦጌ ኢዚፔ ሃሲቴ፤

ኢዚ ፔንጌራካ ኣፍቴ።

9ሄሲካ ኢንቴ ኢንቴ

ጎባቴ ሃራታስ፥

ኢንቴ ላይካ ሜንጼ ኢታታስ

ኢንቴ ኢሞንታ ማላሳ።

10ኣላጋቲ ኢንቴ ኣቆታን

ካኦንታ ማላኔ

ኢንቴ ዳቡራንካ ሃራ ኣሳሶይ

ዱሬቶንታ ማላሳ።

11ኢንቴ ኣሾይ ዉሪን፥

ኢንቴ ሜቄ ጊልቂን

ዉርሴ ላይን

ኢንቴ ጎታራና።

12ቃሴካ ኔኒ፥

«ታኒ ኣይስ ሴራ ኢጻዲና!

ታ ዎዚናይካ ዞሬ

ኣይስ ካዴ!

13ታና ታማርሲዛይቲ

ዮቲዳይሳ ኤካቤኬ፤

ታና ዞሪዛይታ

ዞሬዛካ ኤዝጋቤኬ።

14ሄሳ ጊሻስ ታኒ

ሺቂዳ ዱላታ ሲንፌ

ያና ማታዲስ» ጋና።

15ኔኒ ኤሊሲዳ ኔ ፑልቶ ሃፌ

ኡያዳ ኣሊዛ ማላ

ኔ ማቼይስ ኣማኔታዳ

ኢዚ ሲቆን ኣላ።

16ቤታ ቤታ ማጫሲ

ኡዪዛ ፑልቶ ሃ ጊዶፓ።

17ኔናቴ ኔ ማቼይስ ናጋ፤

ሃራ ማጫሳራ ዚንኦፋ።

18ኔ ማቼያ ኔስ

ኣንጄቲዳ ፑልቶ ጊዱ፤

ዬላጋቴን ኔኒ ኤኪዳ

ኔ ማቼይራ ኡፋዬታ።

19ሎኢዛ ጋራ ማላኔ

ኡፋይሲዛ ጌኔሳ ማላ፥

ኢዚ ንቲ ኡባ ዎዴ

ኔና ኣሌቶ፤

ኢዚ ሲቆይ ኔና ኡባቶ ኦይኮ።

20ታ ናዞ!

ላይማ ማጫሳይ ሲቆን

ኣይስ ማታይ?

ሃራ ኣሳ ማቺራ

ኣይስ ቆሜታይ?

21ጋሶይካ ኣሲ ኦዛ ኡባ

ጎዳይ ቤዬስ፤

ኢዚ ሄሜቲዛ ሄሜታ ኡባ

ፒልጊ ጼሌስ።

22ናጋራንቻ ኢዚ ኦዳ

ናጋራይ ዛሪ ኦይኬስ።

ኢዛ ናጋራ ጊቴይ ኢዛ ቃቼስ።

23ኢዚ ባ ኤያቴ ዳሮን

ኦጌ ባላና፤

ባና ሃራና ዳንዳዮንታ

ኣጊዳ ጊሻስ

ኢዚ ሃይቃና።