ሌሚሶ ማጻፋ 4

ኣ ኤራቴ ጎኣ

1ታ ናይቶ! ኢንቴ ኣዋ ዞሬ ሲዪቴ፤

ዎዚናን ዎ ኤዝጊቴ፤

ኣኬካካ ኢንቴስ ሚሽ ሂስቲቴ።

2ታኒ ኢንቴስ ሎኦ ቲሚርቴ

ኢሚዛ ጊሻስ

ታ ቲሚርቴ ኣጎፍቴ።

3ታኒ ታ ሁኤንካ

ታ ኣዋስ ዬላጋ ና፤

ታ ኣዬይስካ ሜጺ ኢሲ ና።

4ታ ኣዋይ ታና ታማርሲሼ፥

«ታ ቃላ ኩሜ

ዎዚናን ኦይካ፤

ታ ኣዛዞታካ ናጋ፤

ኔ ሂስቲኮ ፓጻ ዴኣና።

5ኣ ኤራቴኔ ኣኬካ ኦይካ፤

ታ ቃላ ዶጎፓ፤

ኢዚፔካ ካሬ ኬዞፓ።

6ኣ ኤራቴ ኣጎፋ፤

ኢዛ ኔስ ጎንዳሌ ጊዳና፤

ኢዞ ሲቃ፤

ኢዛካ ኔና ናጋና።

7ኣ ኤራቴ ባይራ፤

ሄሳ ጊሻስ ኢዞ ዴማ።

ኣኬካይ ኔ ኣቆዛ ኡባ

ኤኪዛ ጊዲኮካ ኢዛ ዴማ።

8ኔኒ ኣ ኤራቴ ቦንቻ፤

ኢዛ ኔና

ቁ ቁ ኦና፤

ኔኒ ኢዞ ኢዲማ፤

ኢዛ ኔና ቦንቻና።

9ኢዛ ኔ ሁኤን

ሳባ ኣኪሊሌ ዎና፤

ቦንቾ ካላቻካ

ኢማና» ጌስ።

10ታ ናዞ! ታ ጊዛይሳ ኤዝጋ፤

ታ ቃላካ

ኔ ዎዚናን ዎ፤

ኔ ላይ ኣዱቃና።

11ታኒ ኔና ኣ ኤራቴ

ኦጌ ካሌና፤

ሱሬ ኦጌካ ቤሳና።

12ኔ ሄሜታሼ ጴታካ፤

ዎጺኮካ ኩንዳካ።

13ታ ቲሚርቴ ሎኤ ኦይካ፤

ኢዞ ዬዶፋ፤

ኢዛ ኔስ ዴኦ ጊዲዳ ጊሻስ

ኢዞ ናጋ።

14ናጋራንቻታ ኦጌ ዬፋ፤

ኢታ ኣሳታ ኦጌንካ ሄሜቶፋ።

15ኢዚፔ ሃካ፤ ኢዚን ሄሜቶፋ፤

ኢዚፔ ጉዬ ሲማ፤

ሂስታዳ ኔ ኦጌይራ ባ።

16ኢስቲ ኢታ ኦንታ ዲሼ

ስኪ ኤሬቴና፤

ኣስ ጴንታ ዲሺን

ስኮይ ኢስታ ኣይፌን ዬና።

17ኢስቲ ኢታቴ ካ ማላ ሜቴስ፤

ጌኔካ ኡሻ ማላ ኡዬቴስ።

18ጺሎታ ኦጌይ ሴታ ጋላስ ጋካናስ

ፖኢ ፖኢ ቢዛ

ማላዶ ጻልቄ ማላ።

19ጊዶ ኣቲን ናጋራንቻታ ኦጌይ

ሳካና ማ ማላ፤

ኢስቲ ኣዛን ጴታናኮካ

ኤሬቴና።

20ታ ናዞ! ታ ጊዛይሳ ኣኬካ፤

ታ ቃላካ ሎኤ ኤዝጋ።

21ኔ ኣይፌ ሲንፌ ሃሶፋ፤

ኔ ዎዚናን ዎ።

22ጋሶይካ ኢስቲ ዴሚዛ ኣሳስ

ዴኦ ኢሜቴስ፤

ኢስቲ ኣሳቴስካ

ፓያቴ ኢሜቴስ።

23ኡባፌካ ቦላራ

ኔኒ ኔ ዎዚና

ሚንዳ ናጋ፤

ኣይስ ጊኮ ዴኦይ ኢዛፔ ፑልቴስ።

24ኔ ዶናፔ ጌኔ ሃሳያ ዲጋ፤

ኢታ ሃሳያ

ኔ ሜቴርሻፌ ሃሳ።

25ኔ ኣይፌቲ ሲቲ ጊዲ

ሲን ጼሌቶ፤

ቲሺ ሂስታዳ

ኔ ሲንን ዲዛይሳ ጼላ።

26ኔ ቶሆስ ኦጌ ጊጊሳ፤

ሱሬ ኦጌ ጻላ ሄሜታ።1

27ኡሻች ሃዲርሲ ጎፓ፤

ኔ ቶሆ ኢታፔ ናጋ።