ሌሚሶ ማጻፋ 3

ጎዳን ኣማኔቴ

1ታ ናዞ!

ታኒ ኔና ታማርሲዛይሳ

ዶጎፓ፤

ታ ኣዛዞታካ

ኔ ዎዚናን ዎ።

2ኢስቲ ኔ ላይ ኣዱሳና፤

ኢሻሎ ዴኦኔ

ሳሮቴ ኔስ ጉጃና።

3ሲቆይኔ ቱማቴ

ኔፔ ሃኮፌቶ፤

ኢስታ ኔ ቆን ቃቻ፤

ኔ ዎዚናንካ ጻፋ።

4ሂስቲኮ ኔኒ ጾሳ ሲንኒኔ

ኣሳ ሲንን ሳቤታናኔ

ሎኦ ሱን ዴማና።1

5ኔኒ ፖሎ ዎዚናን

ጎዳን ኣማኔታ፤

ኔኒ ኔ ኣኬካን ዜምፖፋ።

6ኔኒ ቢዛ ኦጌ ኡባን

ኢዛ ሲንሳ፤

ኢዚካ ኔ ቢዛ ኦጌ ሱሪሳና።

7ኔርካ ኔና

ኣ ኤራንቻ ጎፓ፤

ጎዳስ ያያ፤

ኢታፔካ ሃካ።2

8ሄሲ ኔ ቦላ ፓያ ዎና፤

ኔ ሜቄታካ ጻሊሳና።

9ጎዳ ኔ ኣቆታን ቦንቻ፤

ቢታይ ኔስ ኢሚዛ ኣይፌ ኡባፌ

ጼራ ኢዛስ ኢሞን ቦንቻ።

10ኔ ሄሳ ኦኮ

ኔ ጎታራቲ ኩሚ ፓላሃና፤

ኔኒ ዎይኔ ኡሹ ኣጊዛሶቲ

ጪፒ ጊ ኩማና።

11ታ ናዞ!

ጎዳ ሴራ ካፓ፤

ኢዚ ኔና ሃንቂዛ

ዎዴካ ላንጮፋ።3

12ኣዋይ ባ ሲቂዛ ና

ሴሪዛይሳ

ጎዳይካ ባ ዶሲዛ

ና ሴሬስ።45

13ኣ ኤራቴ ዴማናስ

ዎጺዛ ኣሲ፥

ኣኬካካ ባስ ሚሼ

ኦዛ ኣሲ ኣንጄቲዳዴ።

14ጋሶይካ ኢዚፔ ዴሚዛ ጎኣይ

ቢራፔ ዴሚዛ

ጎኣፔ ኣስ፤

ኢዚፔ ቤቲዛ ጎኣይ

ዎርቃፌ ቤቲዛ ጎኣፔ ኣስ።

15ኣ ኤራቴ ዞኦ ኢንቁፌ

ኬሂ ኣልኦ፤

ኔኒ ዴማናስ ኣሞቲዛ ኡባይ

ኢዚራ ጊናቴና።

16ኢዛ ኡሻቻ ኩሼን ኣዱሳ ላይ፥

ሃዲርሳ ኩሼን ኣቆታኔ

ቦንቾ ኦይካዱስ።

17ኢዚ ኦጌቲ ኡፋይሲዛ ኦጌታ፤

ኢዛ ሄሜቲዛ ኦጌ ኡባይካ ሳሮ።

18ኢዛ ባና ኢዲሚዛይታስ

ዴኦ ሚ፤

ኢዞ ኦይኪዛይቲካ ኣንጄታና።

19ጎዳይ ባ ኣ ኤራቴን

ሳኣ ሜዴስ፤

ባ ኣኬካንካ ሳሎታ

ኢስቲ ዲዛሶን ሚንዴስ።

20ሻፋቲ ኢዛ ኤራቴን ጎጌቴስ፤

ሻራቲ ኢራ ኢሜቴስ።

21ታ ናዞ! ሱሬ ፒርዳኔ

ሻኪ ኤሮ ናጋ፤

ኢስቲ ኔ ሲንፌ ሃኮፌቶ።

22ኢስቲ ኔስ ዴኦ ጊዳና፤

ኔ ቆስካ ኣሌቆ ጊዳና።

23ሄ ዎዴ ኔኒ ኦጌን

ሂርጋይ ባይንዳ ሄሜታና፤

ኔ ቶሆይካ ጴቴና።

24ኔኒ ኢቺዳ ዎዴ ባባካ፤

ኢቻዳካ

ማልኦ ስኮ ስካና።

25ኣኬኮንታ ጋኪዛ ሜቶኔ

ኢታታ ቦላ ጋኪዛ

ይሳስ ባባካ።

26ኣይስ ጊኮ ጎዳይ ኔስ

ኣማኔቲዛዴ ጊዳና፤

ኔ ቶሆይ

ዎጺማዴን ኦይኬቶንታ ማላ

ኢዚ ኔና ናጋና።

27ኔስ ማዳና ዎልቃይ ዲሺን

ማዶ ቤሲዛይታስ

ሎኦ ኦሶ ኣጎፋ።

28ሃኢ ኔስ ዲሺን ኔ ሾሮዛስ፥

«ሲማዳ ያ፤

ታኒ ኔስ ዎንቶ ኢማና» ጎፓ።

29ኔናን ኣማኔቲዲ ኔ ማታን ዲሺን

ኔ ሾሮዛ ቦላ

ኢታ ሚሽ ኦናስ ሃልቾፋ።

30ኔና ቆሆንታ ኣስ

ጋሶይ ባይንዳ ጮ ሞቶፓ።

31ጌኔ ኦዛ ኣሳታ ቁሎፋ፤

ኢስታ ኢታ ኦጌካ ካሎፋ።

32ጋሶይካ ጎዳይ

ኢታ ኦዛይታ ኢጼስ፤

ጊዶ ኣቲን ሱሬታስ ኢዚ

ባ ዎዚና ቆፋ ቆንጪሴስ።

33ጎዳ ቃንጌ

ኢታ ኦዛይታ ኬና፤

ጊዶ ኣቲን

ኢዛ ኣንጆይ ጺሎታሶና።

34ኦቶሬቴን ቂልጪዛይታ ቦላ

ጎዳይካ ቂልጬስ፤

ጊዶ ኣቲን ባንታና

ካዉሺዛይታ ቦንቼስ።6

35ኣ ኤራንቻቲ

ቦንቾ ላታና፤

ኤያቲ ጊዲኮ ካዉሻቴስ

ኣ ኢሜታና።