ሌሚሶ ማጻፋ 6

ሃቻስ ሃቻስ ቤሲዛ ዞሬ

1ታ ናዞ! ኔኒ ኔ ሾሮዛስ

ዋሴ ጌሊዳ ጊዲኮ፥

ሃራ ኣሳ ጊሻስ ኔኒ

ኩሼ ባቃ ጫቂዳ ጊዲኮ፥

2ኔኒ ጌሊዳ ቃላን

ኦይኬቲዳ ጊዲኮ፥

ኔ ዶናፔ ኬኢዳ ቃላን

ኔ ኦይኬቲዳ ጊዲኮ፥

3ታ ናዞ! ኔኒ ኔ ሾሮዛ

ኩሼን ኩንዲዳ ጊሻስ

ኔና ኣሻናስ ባዳ

ኢዛ ሲንን ኩንዳ፤

ኔ ሾሮዛኮ ባዳ ሾባ።

4ሄሳ ኦንታ

ዳሼ ስኮፋ፤

ኔ ሲጲንቲ ሊጶፔቶ።

5ሻንካንቻታፔ ጌኔሲ

ኬሲ ኤኪ ኣቲዛ ማላ፥

ያርዴን ኦይኬቶንታ ኣቲዳ

ካፎ ማላ ኔና ኣሻ።

6ኔኖ ኣዛላዞ!

ጩንጫሌታኮ ባ፤

ሂስታዳ ኢስታፌ ታማራዳ

ኣ ኤራንቻ ጊዳ።

7ጩንጫሌታስ ኣዛዚዛይ ዴና፤

ኢስታ ሃሪዛይ ዴና።

8ጊዶ ኣቲን ባንታስ ማና ሚሽ

ቦኔ ሺሼቴስ፤

ካ ሺሺዛ ዎዴ

ባንታስ ካ ሺሼቴስ።

9ኔኖ ኣዛላዞ!

ኔኒ ኣዉዴ ጋካናስ

ስካኔ?

ስኮፌካ

ኔ ኣዉዴ ቤጋኔ?

10«ታኒ ጉራ ስካ ኤካና፤

ጉራ ሊጳ ዴንዳና፤

ታ ኩሼ ቦርኮታዳ

ጉራ ሼምፓ ኤካና»

ኔ ጊሺን፥

11ሄ ዎዴ ማንቆቴ

ፓንጋ ማላ፥

ፓጬይ ኦላ ሚሻ

ኦይኪዳ ኣሳ ማላ

ኔ ቦላ ፑቱ ጋና።1

12ዎማሌይኔ ሜንጼ ኢታ ኣሲ

ዩዪ ዩዪዲ

ኢታ ቃላ ሃሳይዛይ፥

13ባ ኣይፌራ ቂምኦቲዛይ፥

ባ ቶሆን ቤሲዛይ፥

ባ ቢራታንካ ማላቲዛይ፥

14ባ ዎዚናን ኢታ ሚሽ

ዎ ዴን ቆፒዛይ

ኣይ ዎዴካ ኦሽ ዴንስ።

15ሄሳ ጋሶን ባሺ ኣኬኮንታ

ኢዛ ቦላ ያና፤

ኢዚ ሃሳኣይ ባይንዳ ሜቃና፤

ሜቂዲካ ፓጼና።

16ጎዳይ ኢጺዛ ኡሱፑን

ዮኦቲ ዴቴስ፤

ላፑንዛ

ኬሂ ሃራሴቴስ።

17ኦቶሬቴን ጼሊዛ ኣይፌ፥

ዎርዶቲዛ ኢንጻርስ፥

ጺሎ ኣሳታ ዎዛ ኩሼ፥

18ኢታ ሚሽ ቆፒዛ ዎዚና፥

ኢታሶ ኤሶቲዛ ቶሆታ፥

19ዎርዶ ቦላ ዎርዶ ጉጂ ጉጂዲ

ዮቲዛ ዎርዶ ማርካ፥

ኢሻንታ ጊዶን

ኦሽ ሜዛ ኣሳ።

ላይማፔ ሃኮ

20ታ ናዞ! ኔ ኣዋ ኣዛዞ ፖላ፤

ኔ ኣያ ታማርሲዳይሳካ ኣጎፋ።

21ኢስታ ኡባቶ ኔ ዎዚናን ኦይካ፤

ኔ ቆንካ ቃቻ።

22ኔኒ ሄሜቲዛ ዎዴ

ኢስቲ ኔና ካሌና፤

ኔኒ ኢቺዛ ዎዴ

ኢስቲ ኔና ናጋና፤

ኔኒ ቤጎቲዛ ዎዴካ

ኢስቲ ኔና ዞራና።

23ኣይስ ጊኮ ሃ ኣዛዞቲ ኔስ ጾምፔ፤

ቲሚርቴቲካ ፖኦ፤

ቃሴ ሴራይካ

ዴኦኮ ኤፊዛ ኦጌ።

24ሃ ኣዛዞቲ ኢታ ማጫሳፌ

ኔና ናጋና፤

ዶናን ጪሚዛ ሃዉሻ

ማጫሳፌካ ናጋና።

25ኢዚ ሎኤቴ

ኔ ዎዚናን ኣሞቶፋ፤

ኢዚ ቂምኦቴን ኦይኬቶፋ።

26ኢሲ ኣዴይ

ባና ባይዛ ዲዛ ማጫሳዮ

ጉ ሚሻን

ዴማናስ ዳንዳዬስ፤

ኣሳ ማቺ ጌዶ ካሎይ

ኔስ ሼምፖ ይሳና።

27ኢሲ ኣሲ ታማ ኢዲሚን

ኢዛ ማይኦይ

ሜቴቶንታ ኣታናስ ዳንዳይዜ?

28ኢሲ ኣሲ ቦንቆ ታማ ዬ ቢሺን

ኢዛ ቶሆይ

ጹጌቶንታ ኣታና ዳንዳይዜ?

29ኣሳ ማቾ ላጌዛ ኣሲ

ሄሳ ማላ፤

ኢዞ ቦቺዛ ኡባይ

ቃጻዬቶንታ ኣቴና።

30ካይሶይ ጋፋ ኣታናስ ካይሲኮ

ኣሳይ ኢዛ ካና።

31ጊዶ ኣቲን ኢዛስ ዲዛ ኣቆታ

ኡባ ኦይቺኮካ

ኢዚ ኦይኬቲዳ ጊዲኮ

ላፑን ኩሼ ቃንጻና ቤሴስ።

32ላይማ ላይማቲዛ ኣሳስ

ዎዚናይ ፓጬ፤

ሄሳዴይ ባርካ

ባ ሼምፖ ይሴስ።

33ቡካይኔ ካዉሻቴ ኢዛስ ቃዳ፤

ዬላቴ ኢዛፔ

ሙሌካ ቁጬቴና።

34ቃናቴይ ኣዚና ሃንቄታና ማላ ዴንስ፤

ኢዚ ሃሎ ኬሲዛ ዎዴ

ኢዛስ ቃቴና።

35ኢዚ ኣይ ኤዳካ ኤኬና፤

ኣይ ኬና ኢሞታይካ

ኢዛ ሃንቆ ዶሺሴና።