ሆሴኤ ቲንቢቴ

ሆሴኤ ቲንቢቴ

ጊዶ ቆፋ

ናቤ ሆሴኤይ ኪርስቶሲ ዬሌታናፔ ካሴ 721 ላይን ሳማሪያ ካታማያ ላሌታናፔ ካሴ ዲዛ ናቤ። ሄ ዎዴ ሜቶይ ኩሚዳ ኢታ ዎዴዛን ናቤ ኣሞጼፔ ጉዬ ፑዴሃ ባጋራ ዲዛ ኢስራኤሌ ካዎቴ ጋርሳን ቲንቢቴ ዴራስ ዮቲዴስ። ሆሴኤይ ዴሬዚ ኤቃ ጾስ ጎይኒዛይሳኔ ጎዳን ኣማኔቴ ፓጪሲዳይሳ ቆንጪሲ ዮቲዴስ። ሆሴኤይ ሄሳ ዴሬዚ ጎዳን ኣማኔቶንታይሳ ኣሳ ኤሪሳናስ ኣማኔቶንታ ማቾ ኤኪዲ ኢስታስ ሌሚሶ ጊዲዲ ኢስታ ታማርሴስ፤ ኢዛ ማቼያ ጎሜራ ኢዛስ ኣማኔቶንታይሳካ ዴሬዚ ጎዳ ባ ጾሳ ኣጋጊዴስ፤ ሄሳ ጋሶን ፒርዳይ ኢስራኤሌ ቦላ ያና ጌስ፤ ጊዶ ኣቲን ዉርሴን ጎዳይ ባ ዴሬዛ ኬሂ ሲቂዛ ጊሻስ ባኮ ዛሪዲ ባሲኔ ዴራስ ጊዶን ዲዛ ኢሲፌቴ ኦራጺሲዴስ፤ ሄ ጊታ ሲቆዚ ሃይሳፌ ካሊ ዲዛ ቃላን ቆንጪዴስ፤ «ኢስራኤሌ ኣሳዉ! ታ ኔና ዎስታ ኣጋጎ? ታ ኔና ዎስታ ሃራስ ኣ ኢሞ? ታ ኔና ሲቂዛ ሲቆይ ኬሂ ጊታ ጊዲዳ ጊሻስ ሄሳ ኡባ ኦናስ ታ ዎዚናይ ኮዬና።» [11፡8]

ሃ ማጻፋይ ኦይኪዳ ኩሜ ቆፋ

ሆሴኤ ሶ ኣሳይ ኣማኖይ ባይንዳይታስ ሌሚሶ ጊዴ

ጎዳይ ኢስራኤሌ፥ ዩሁዳኔ ኢስታ ካሌዛይታ ዋላሴ

ዴሬዚ ጎዳኮ ሲሚዳ ሚሳቲሶ

ጎዳን ኣማኔቶንታ ኢጺዳ ኢስራኤሌ ዴራ

ኢስራኤሌ ዴሬዚ ባስ ቤሲዛ ቂጻቴ ኤኮ

ኢስራኤሌ ዴራስ ዮቲዳ ሚኖ ቆፊሶ

ጎዳይ ዴራ ሲቂዛ ሲቆ

ጎዳይ ዴራ ቦላ ዬዲዳ ፒርዳ

ናጋራፔ ማሬቴኔ ኣንጆ ሂዶታ