ሆሴኤ ቲንቢቴ 2

1ሄሳ ጊሻስ ኢንቴ ኢንቴ ኢሻታ ኢስራኤሌ ናይታ፥ «ኣሚ»1 ኢንቴ ሚቼታካ «ኡሩሃማ» ጊ ሱንቴ።

ኣማኔቶንታ ኢጺዳ ኢስራኤሌ ኣሳ ቃጻዬቴ

2«ታ ናይቶ! ኢንቴ ኣዮ ዞሪቴ፤

ሃይሳፌ ጉዬ ኢዛ ታስ

ማቾ ጊዱኩ፤

ታኒካ ኢዚስ ኣዚና ጊዲኬ፤

ባ ሲንፌ ላይማ ሱኬ ሃኖ፥

ባ ዎዲራ ጊዶፌ

ላይማቴ ዲጉ።

3ኢዛ ሲሞንታ ኢጺኮ

ኢዛ ባ ኣዬይ ኡሎፔ

ካሎ ዬሌቲዳ ማላ

ታ ኢዞ ጺሬ ካሎ ኣሻና።

ባዞ ማላኔ ሜላ ቢታ ማላ

ታ ኢዞ ኦና።

ታ ኢዞ ሃ

ሳሞን ዎና።

4ላይማ ማጫሳፌ

ዬሌቲዳ ጊሻስ

ኢዚ ናይታስ ታ ሚሼቲኬ።

5ኢስታ ኣያ ላይማ፤

ካዉሻ ሃኖን ሻራዱስ።

ኢዛ ባ ዶናራ፥

‹ታኒ ታ ላጌታኮ ባይስ፤

ኢስቲ ታስ ካኔ ሃ፥

ሱፌፔኔ ሌኤ ሃሬፔ

ዳዴቲዳ ማይኦ፥

ዎጋራ ዛይቴኔ

ዎይኔ ኡሹ ኢማና› ጋዱስ።

6ሄሳ ጊሻስ ታኒ ኢዚ ኦጌ

ኣጉንራ ጎርዳና፤

ኢዛ ኬዛና ፔንጌ

ዴሞንታ ማላ

ታኒ ጊምቤ ዩሻ

ኣ ጎርዳና።

7ኢዛ ባ ላጌታ

ዴማናስ ዎጻና ሺን

ኢስታኮ ጋካናስ ዳንዳዩኩ።

ኢዛ ኢስታ

ዳሮ ኮያና ሺን ዴሙኩ፤

ሃይሳፌ ጉዬ፥

‹ሃይሳ ሃ ዱሳፌ

ታስ ካሴ ዱሳይ ሎኦ፤

ሄሳ ጊሻስ ቤኒ ታ ኣዚናኮ

ታ ሲማ ባና› ጋና።

8ታኒ ኢዚስ ካሴ ካ፥

ዎይኔ ኡሺኔ

ዎጋራ ዛይቴ ኢሚዳይሳኔ

ቃሴካ ኢዛ ባኣሌ ጌቴቲዛ

ኤቃ ጾሳስ ያርሾ ቢራኔ

ዎርቃ ኢዚስ ዳርሲዳይ

ታና ጊዲዳይሳ

ኢዛ ሻካ ኤራቤኩ።

9ሄሳ ጊሻስ

ካ ካጺዛ ዎዴ

ሃ ካጺዛ ካ፥

ዎይኔ ኣይፌይ ቴሪዛ ዎዴ

ዎይኔ ኡሻ፥

ታኒ ኢዚፔ ዎ ኤካና።

ሄሳካ ኢዛ ባ ካሎቴ

ካሞንታ ማላ ሱፌፔኔ

ሌኤ ሃሬፔ

ዳዴቲዳ ማይኦዛ

ታ ኢዚፔ ቃራ ኤካና።

10ኢዚ ላጌታ ሲንን

ታ ኢዞ ካሎ ኣሻና፤

ኢዞ ታ ኩሼፔ

ኣሻናይ ዴና።

11ኢዛ ባ ኡፋይሳ ባኣሌታ ኡባ፥

ላይን ላይን

ቦንቺዛ ባኣሌታ፥

ኣጊና ጼሮን ጼሮን

ቦንቺዛ ባኣሌታ፥

ሳምባታታኔ ሃራ ኢዛ

ዱማ ዱማ ዶራ

ቦንቺዛ ባኣሌታ

ናምኣን ኦንታ ማላ

ታ ዲጋና።

12ኢዛ ባ ላጌታፔ

ባስ ዋጋ ጋዳ

ኤኪዳ ዎይኔ ሚታኔ

ባላሴ ሚታ ታ ቃላና።

ኢስታካ ዎራ ዶኣቲ ማና።

13ባኣሌ ጌቴቲዛ ኤቃ ጾሳስ

ኤጻኔ ጩዋሳናሲኔ

ሎኦ ጌጼ ዎዳ

ኢዛ ባ ላጌታ ካላዳ

ታና ኣጊዳ ጊሻስ

ታ ኢዞ ቃጻያና።

ጾሲ ባ ዴራ ሲቂዛ ሲቆ

14«ሄሳ ጊሻስ ታ ኢዞ

ማቃዳ ባዞ ኤፋና፤

ሄን ታ ኢዚራ ሲቆ ቃላን

ሃሳይሳና።

15ካሴ ኢዚ ዎይኔ ኣታኪልቴዛ

ታ ኢዚስ ዛራና፤

ሜቶ ሾባ ታ ኢዚስ

ሂዶታ ፔንጌ ሂስታና፤

ሄን ኢዛ ጊብጼፔ ኬዚዳ ጋላስ

ናቴን ዳሼ ዬጺዳ ማላ

ዬጻና።2

16ኢዛ ሄ ጋላሲ ታና፥

‹ታ ኣዚናዞ› ጋ ጼይጋና ኣቲን

ሃይሳፌ ጉዬ፥

‹ባኣሌ› ጌቴቲዛ

ኤቃ ጾሳ ሱንን

ታና ጼይጉኩ።

17ባኣሌ ጌቴቲዛ

ኤቃ ጾሳታ ሱን

ታ ኢዚ ዶናፔ ዲጋና፤

ሃይሳፌ ጉዬ

ኢስታ ሱን ዴንዴና።

18ሄ ዎዴ ዶኣታራ፥

ካፎታራኔ ቢታ ቦላ

ጎሼቲዛ ሜቴ ኡባታራ

ታ ኢንቴ ጊሻስ ጫቄታና።

ኡባይካ ሳሮን ዳና ማላ

ኦላ፥ ቶራኔ፥ ማሻ

ቢታ ቦላፌ ታ ዲጋና።

19ሃኔ ኢስራኤሌ!

ታ ኔና ሜርናስ ታስ ጊጊሳና፤

ታ ኔስ ጺሎቴኒኔ

ሱሬቴን ፒርዳና፤

ኣጎንታ ሲቆኒኔ ቃታን

ታ ኔና ታስ ኦይቻ ጊጊሳና።

20ታኒ ኣማኔታዳ ኔና

ታስ ማቾ ጊጊሳና።

ኔኒካ ታኒ

ጎዳ ጊዲዳይሳ ኤራና።

21«ሄ ጋላስ ታኒ ዛሮ ኢማና፤

ታኒ ሳሎ ኣዛዛና፤

ሳሎይካ ሳኣስ ዛሮ ኢማና።

22ቢታይ ካ፥ ዎይኔ ኡሹኔ

ዛይቴ ኢማና፤

ኢስቲካ ኢዝራኤሌስ ዛሮ ጊዳና።

23ታኒ ታ ዴሬዮ ቢታ ቦላ ቶካና።

‹ማሮቴ ባይንዳሮ› ጌቴቲዳሮ

ታ ዛራዳ ማራና፤

‹ታ ማሪኬ› ጊዳይሳካ

ዛራ ማራና፤

‹ኢንቴ ታ ዴሬ ዴኬታ›

ጌቴቲዴታ።

‹ታ ዴሬታ› ጋዳ

ታ ጼይጋና ጋና፤

ኢስቲካ ታና፥

‹ኔኒ ኑ ጾሳ› ጋና» ጌስ።3