ሆሴኤ ቲንቢቴ 14

ኣሳይ ማሬታና ማላ ኣዋጄቲዳ ኣዋጃ

1ኢስራኤሌ ዴሬዞ!

ኢንቴ ኢንቴ ናጋራ ጋሶን

ኩንዲዳ ጊሻስ

ጎዳ ኢንቴ ጾሳኮ ሲሚቴ።

2ፓጼ ቃላ ኤኪ

ጎዳኮ ሲሚዲ፥

«ኑ ናጋራ ኡባ ኣቶ ጋ፤

ኑኒ ኑ ዶናፔ ጋላታ

ሺሻና ማላ

ኔ ማሮቴን ኑና ኤካ።

3ኣሶሬይ ኑና ኣሼና፤

ኑኒ ኦላ ፓራታንካ

ኣማኔቶኮ፤

ሃይሳፌ ጉዬ ኑኒ

ኑ ኩሼን ሜዳ

ኤቃ ጾሳታ፥

‹ሃይቲ ኑ ጾሳታ› ጎኮ።

ማንቆቲ ኔፔ ቃቴ

ዴሜቴስ» ጊቴ።

ኦራ ዴኦስ ሂዶታይ ኢሜቲዴስ

4ጎዳይ፥ «ታ ሃንቆይ

ኢስታ ቦላፌ ሲሚዳ ጊሻስ

ታስ ኣማኔቶንታ ኢጺዳ

ታ ዴራ

ታ ፓና፤

ታ ኢስታ ጮ ሜላ ሲቃና።

5ታኒ ኢስራኤሌ ኣሳስ

ፑሴ ኢራ ማላ ጊዳና፤

ኢስቲካ ሎኦ ጪሻ ማላ ጪያና፤

ሊባኖሴ ዚጋ ማላ

ጻጶ ዬዳና።

6ኢስታ ሃጋይ ዲጫና፤

ዎጋራ ሚ ማላ

ኢስቲ ሎኣና፤ ሊባኖሴ ዚጋ ማላ

ሎኦ ሳዎ ሳዋና።

7ኢስቲ ሲሚዲ

ታ ኩዋ ጋርሳን ኡታና፤

ጫሬቻ ካ ማላ

ኢስቲ ጪሊላና፤

ዎይኔ ሚ ማላ ኢስቲ ጪያና።

ኢስታ ሱን ሊባኖሴ

ዴሬ ዎይኔ

ኡሻ ማላ ኡባሶን ኤሬታና።

8ኤፍሬሜ! ታሲኔ ኤቃ ጾሳታስ

ኣይ ጋይቶቴ ዲዜ?

ኔ ዎሳ ሲዪዛይኔ

ኔና ናጊዛይ ታና፤

ታኒ ኡባ ዎዴ ጪሊሊ ኡቲዳ

ሚ ማላ፤

ኔ ኣይፊዛይ

ታፔ ዴንዲዳይሳና» ጌስ።

ኩሻ ቃላ

9ኣ ኤራንቻይ

ሃ ዮኦታ ኣኬካና።

ኣኬኪዛዴይ ሃ ዮኦታ ኤራና፤

ጎዳ ኦጌይ ሱሬ፤

ጺሎቲ ኢዛን ሄሜቴቴስ።

ናጋራንቻቲ ጊዲኮ

ኢዛን ጴቴቴስ።