ጌሻ ማጻፋ
ኣሞጼ ቲንቢቴ 6
ኢስራኤሌ ቃጻዬቴ
ጺዮኔን ባ ጊ ኡቲዳይቶ! ሳማሪያ ዙማ ቦላ ሂርጋይ ባይንዳ ዲዛይቶ! ኢስራኤሌ ኣሳይ ማዶ ኮዪዲ ኢንቴኮ ዪዛይቶ! ኢንቴኖ ዴሬ ሃላቃቶ! ኢንቴስ ኣዬ ኣና! ኣኔ ኢንቴ ጌዴ ካላናሄ ካታማ ቢዲ ጼሊቴ፤ ሄፔካ ኣዲ ሃማቴ ጌቴቲ ጼይጌቲዛ ጊታ ካታማዮኔ ዱጌ ፊሊስጼሜ ካታማ ጌቴ ዎቴ፤ ኢስቲ ኢንቴ ናምኡ ካዎቴታፔ ሎኢዞ? ኢስታ ቢታይ ኢንቴ ቢታፌ ኣኪዜ? ኢንቴ ቃሴ፥ «ኢታ ጋላሲ ኤሌ ጋኬና» ጊዛ ቆፋን ኢንቴ ዳናቴን ጌኔ ኦሶ ኤሶሴታ። ኢንቴ ዳንጋርሳ ዛሌፔ ኦሴቲዳ ኣልጋን ኢቼታ፤ ኦሃላ ላቃ ኣሾኔ ማራ ኣሾ ሚሼ ሶፋ ቦላ ኡቲ ሼምፔታ። ዳዊቴ ማላ ዬ ሚሽ ኢንቴስ ጊግሲዲ ባጋናኒኔ ዱማ ዱማ ማዛሙሬ ዬጺዛይቶ! ዎይኔ ኡሹ ቢሪሌራ ጊዶንታ ኦቶራ ኡዪዛይቶ! ኬሂ ኣልኦ ጊዲዳ ሺቶ ቲዬቲዛይቶ! ኢስራኤሌ ዴራ ቦላ ጋኪዳ ሜቶ ጊሻስ ቃቶንታይቶ ኢንቴና ኣዬ ኣና!
ሄሳ ጊሻስ ሄራ ኣሳፔ
ኮይሮ ኢንቴ ዲኤታና፤
ሄ ዎዴ ኢንቴ ካሴ ኡፋይሳን
ጉፒዛ ጉፋይኔ
ባ ጊ ዲዛ ዱሲ ኣታና።
ጎዳይ ሳሎ ጾሳይ፥
«ኢስራኤሌ ኣሳ ኦቶሬቴ
ታኒ ሃራሴታዲስ፤
ኢስታ ሚጻቲካ
ታና ሹኔቴስ፤
ሄሳ ጊሻስ ታኒ ካታማዮኔ
ኢዚን ዲዛይታ ኡባ
ሞርኬስ ኣ ኢማና» ጊዲ
ባርካ ባናን ጫቂዴስ።
ኢሲ ኬን ታማቲ ኣቲኮ ሄ ኣቲዳይቲካ ሃይቃና። ሃይቂዳይታፔ ኢሳዴስ ማታ ዳቦ ጊዲዳዴይኔ ሞጎ ዎጋ ፖሊዛዴይ ኣሃዛ ኬፌ ኬሲ ኤፋና፤ ሄ ዎዴ ኢዛዴይ ሶን ዲዛ ኢሲ ኣስ ጼይጊዲ፥ «ኔናራ ኣቲዳ ሃራ ኣሲ ዲዜ?» ጊዲ ኢዛ ኦይቻና ሺን ኢዛዴይ ቃሴ፥ «ኣቲዳ ኣሲ ኦኒካ ዴና» ጋና። ኦይቺዛይሲካ ዛሪዲ፥ «ጎዳ ኑ ጾሳ ሱን ጼይጋናስ ቤሶንታ ጊሻስ ጮኡ ጋ!» ጋና።
ጎዳ ኣዛዞን
ዎጋ ኬቲ ላሌታና፤
ጉ ኬቲካ
ላሌቲ ኣታና።
ፓራይ ሹቻ ቦላ ቶጌቲዜ?
ጎሻንቻይ ኣባ ጊዶን
ቦራ ዋጺ ጎያናስ
ዳንዳይዜ?
ኢንቴ ጊዲኮ
ፒርዳ ማርዜን ላሚዴታ፤
ቱማካ ጌዴ ጫሞን ሺርዴታ።
ኢንቴ ሎዲባሬ ካታማ
ጾኒዳ ጊሻስ ኡፋዬቲዴታ፤1
«ቃርናይሜ ካታማዮ
ኑኒ ኑ ዎልቃን ኦይኪዶስ»
ጊዲ ጬቄቴታ።2
ጎዳይ ሳሎ ጾሳይ፥
«ኢስራኤሌ ኣሳዉ!
ታኒ ኢንቴ ቦላ
ሃራ ዎልቃማ ዴሬ ዴንና፤
ሄሲካ ፑዴሃ ባጋፌ
ሃማቴ ፔንጌፌ ዶሚዲ
ዱጌሃ ባጋራ ኣራቤ
ሾባ ጋካናስ ኢንቴና
ኡንኤና» ጌስ።
Source notes (2)
- Footnote ሎዲባሬ ጌቴቲዛይሲ ካታማ ሱን ጊዲሺን ኢብራዌታ ቃላራ ሃዳ ሚሽ ጉሳ።
- Footnote ቃርናይሜ ጌቴቲዛይሲ ጉ ካታማ ሱን፤ ኢብራዌታ ቃላራ ካጬይ ዎልቃ ሌሚሶ ጊዲ ቤቴስ።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.