ጌሻ ማጻፋ
ኣሞጼ ቲንቢቴ 5
ኢስራኤሌ ኣሳ ማሬቴ
ኢስራኤሌ ኣሳዉ! ኢንቴ ጊሻስ
ታ ዚላሊዛ ዚላስ ሲዪቴ።
«ጌላኦያ ኢስራኤሌይ ኩንዳዱስ፤
ናምኣን ዴንዳናስ
ዳንዳዩኩ፤
ኢዞ ማዲ ዴንናይ
ባይንዳ ጊሻስ
ኢዛ ባርካ ባ ዴሬን
ኩንዳ ኣታና።»
ኡባ ሃሪዛ ጎዳይ፥
«ኢስራኤሌ ካታማ ኢሲኔይፔ
1,000 ኦላንቻቲ ኦላስ ባናሺን
ኢስታፌ ሃይቆንታ ፓጻ ኣታናይ
100 ኣሳታ ጻላ ጊዳና፤
ሃራ ካታማፔካ 100
ኦላ ኣሳቲ ኦላስ ባናሺን
ኢስታፌ 10 ኣሲ ጻላ
ሲሚ ያና» ጊዴስ።
ጎዳይ ኢስራኤሌ ኣሳስ፥
«ኢስራኤሌ ኣሳዉ!
ሃ ታኮ ሲሚቴ፤
ኢንቴ ሃይቆንታ ዴኣና።
ኢንቴ ቤርሳቤሄ ቦፒቴ፤
ቤቴሌይ ላሌታዳ
ሙሌራ ያና፤
ጌልጌላን ዲዛ ኣሳይ ዲኤታና፤
ሄሳ ጊሻስ ቤቴሌ ጊዲን
ዎይኮ ጌልጌላ ቦፒቴ» ጊዴስ።
ሃ ጾሳኮ ሲሚቴ፤
ሂስቲኮ ኢንቴ ሼምፖራ
ፓጻ ዴኣና፤
ኣካይ ጊኮ ጾሲ
ታማ ማላ
ኢስራኤሌ ዴራ ማና፤
ቤቴሌን ዲዛይታካ
ታማይ ማና፤
ሄ ታማ ቶይሳናይ
ኢስታስ ቤቴና።
ኢንቴኖ ፒርዳ ጌላሲዛይቶ!
ቱማካ ጌዴ ዎርዶን
ላሚዛይቶ
ኢንቴስ ኣዬ ኣና!
ፒሊያዲሴ ጌቴቲዛ ላፑን
ጾሊንቴታኔ
ኦርዮኔ ጌቴቲዛ
ኢሲ ቦላ ዲዛ
ጾሊንቴታ ሜዳይ
ጋላሳ ኦማርሳን፥
ኦማርሳ ጋላሳን ላሚዛይ፥
ኣባ ሃ ኣዛዚዲ
ቢታ ቦላ ጎጊሲዛይ፥1
ዎልቃማታኔ ኢስታ ሚጻታ
ላሊ ይሲዛይ ኢዛ፤
ኢዛስ ሱንይካ ጾሳ።
ኢንቴ ቃሴ ኢንቴና ፒርዳሶን
ሃንቂዛዴ ኢጼታ፤
ቱሙ ሃሳይዛዴካ ካታ።
ማንቆታ ኡንኤታ፤
ኢስታ ዎልቃራ ካ ጊሪሴታ፤
ኢንቴስ ማሴቲዳ ሹቻፌ
ኬ ኬጺዴታ ሺን
ሄ ኬን ዴኬታ።
ኣራዳ ቢታን ዎይኔ ሚ
ቶኪዴታ ሺን ኢዛፔ
ኣጌቲዳ ዎይኔ ኡሹ ኡዬኬታ።
ኢንቴ ቆሆይ ኣይ ማላ ዳሮኮኔ
ኢንቴ ናጋራይ ኣይ ማላ ዴጾኮ
ታ ኤራይስ፤
ኢንቴ ጺሎ ኣሳታ ኡንኤታ፤
ማታኤ ኤኪዲ ፒርዳሶን
ማንቆታስ ጌላ ፒርዴታ።
ሄሳ ጊሻስ ሄ ዎዴ
ዎዴይ ኢታ ጊዲዳ ጊሻስ
ኣኬካይ ዲዛ ኣሲ ጮኡ ጌስ።
ኢንቴ ሼምፖራ ፓጻ ዴኣና ማላ ሎኦፔ ኣቲን ኢታ ኦፍቴ፤ ኢንቴ ሄሳ ኦኮ ኢንቴ ጊዳ ማላ ጎዳይ ሳሎ ጾሳይ ኢንቴናራ ጊዳና። ኢታ ሚሽ ኢጺቴ፤ ሎኦ ጊዲዳዝ ዶሲቴ፤ ፒርዳ ፒርዲዛሶን ቱሙ ፒርዳ ጌላሶፒቴ። ጎዳይ ሳሎ ጾሳይ ኣቲዳ ኢስራኤሌ ኣሳ ማራናኮ ኦኔ ኤሪዛይ?
ሄሳ ጊሻስ ጎዳይ ሳሎ ጾሳይ፥
«ኦጌ ቦላኔ ዱቡሻይ ዲዛሶን
ኡባን ዋሶይኔ ዬሆይ
ሲዬታና፤
ጎሻንቻቲ ኮይሳስ
ዚላሊዛይቲ ዬሆስ ጼይጌታና።
ዎይኔ ሚ ቶኬቲዛሶን
ኡባን ዬሆ ጻላ ጊዳና፤
ሄሲካ ዉሪ ሃናናይ ታ ኢንቴ
ጊዶራ ኣዛ ጊሻሳ» ጌስ።
ጾሳ ፒርዳ ጋላሳ
ኢንቴኖ ጎዳ ጋላስ ናጊዛይቶ!
ኢንቴስ ኣዬ ኣና!
ሄ ጋላሳይ ማፔ ኣቲን
ፖኦ ጋላስ ጊዶንታ ጊሻስ
ኢንቴ ኣይስ ሄ ጋላሳ ኮዬቲ?
ሄ ጋላሳይ ኣሲ ጋሞፌ ኣታናስ
ቆቴቲሼ ዛርዶራ ጋጊዛ ማላ
ዎይኮ ኬሲ ኤኪ ባሶ ጌሊዲ
ባ ኩሼን ኬ ጎዳ ኦይኪን
ሾሺ ዱኪዳ ማላ ሃናና።
ጎዳይ ፒርዲዛ ጋላሳይ
ኢንቴስ ማፔ ኣቲን
ፖኦ ጊዴና፤
ሄ ጋላሳይ ኢዛን
ኣይኮ ፖኦይካ ባይንዳ
ጊርዲ ጊዳ ማ ጊዳና።
«ታኒ ኢንቴ ላይን
ላይን ቦንቺዛ
ባኣሌዛ ካይሲኔ ኢጻይስ፤
ኢንቴ ጎይኖስ ሺቂዛ ሺቆይካ
ታና ኡፋይሴና።
ታማን ጹጌቲዛ ያርሾኔ
ካ ያርሾ
ኢንቴ ታስ ሺሺኮካ
ታ ሄሳ ኢንቴፌ ኤኪኬ፤
ኬቲዳ ኢንቴ ሜሄታፔ
ኢንቴ ታስ ኢሲፌቴ
ያርሾስ ሺሺኮ
ታ ኢዛ ኣይፌንካ ጼሊኬ።2
ኢንቴ ዬጺሼ
ታ ሃይን ካጮፍቴ፤
ኢንቴ ዲ ጊሪስ
ታ ሲያናስ ኮይኬ።
ጊዶ ኣቲን ቱሙ ፒርዳይ
ጎጊዛ ሃ ማላ፤
ጺሎቴካ ሚጮንታ
ፑልቶ ማላ ጎጎ።
«ኢስራኤሌ ኣሳዉ!
ቱማፔ ኢንቴ ኦይዱ ታሙ
ላይ ባዞ ቢታን ዲዛ ዎዴ
ቱሙ ያርሾኔ ካ ጼራ
ታስ ሺሺዴቲ?3
ኢንቴ ኢንቴስ ኦዳ፥
‹ካዎ ዛኩቴ› ጌቴቲዛ
ኤቃ ጾሳዛ፤
ቃሴካ፥ ‹ኬዌኔ› ጌቴቲዛ
ኢንቴ ሜ ኬሲዳ ጾሊንቴ
ሚሳቲዛ ኤቃ ጾሳታ ቶኪዴታ።
ታኒ ኢንቴና ዳማስቆፌ ጌዴ ሃሳ ጎዳና» ጌስ ጎዳይ ሳሎ ጾሳይ።
Source notes (3)
- Cross-reference ኢዮ 9፡9፤ 38፡31
- Cross-reference ኢሳ 1፡11-14
- Cross-reference ሃዋ 7፡42-43
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.