ጌሻ ማጻፋ
ኣሞጼ ቲንቢቴ 3
ኢስራኤሌ ኣሳ ቦላ ጋካና ሃንቆ
ኢስራኤሌ ኣሳዉ! ጊብጼፔ ኬዚዳ ኢስራኤሌ ኣሳስ ኢንቴስ ጎዳይ ዮቲዳ ቃላ ሃይሳ ሲዪቴ።
ጾሳይ፥ «ኩሜ ኣላሜን ዲዛ ዴሬ
ኡባፌ ታ ኢንቴና ጻላ ዶራዲስ፤
ኢንቴ ኦዛ
ናጋራ ኡባ ጊሻስ
ታ ኢንቴና ቃጻያይስ» ጌስ።
ናምኡ ኣሳቲ ኦጌ ኢሲፌ ባና ጊዲ
ቃቾንታ ኣጊኮ
ኢሲፌ ባናስ ዳንዳይዞ?
ጋሞይ ዎራ ጊዶን
ኣይኮ ሚዛ ሚሽ
ሻንካቲ ዴሞንታ ዲሼ
ጮ ሜላ ጻጊ ኤሪዜ?
ዎዳላ ጋሞይ
ኣይኮ ሚዛ ሚሽ
ዴሞንታ ዲሼ ባ ዲዛሶን
ጮ ሜላ ባ ቃላ ሲሲ ኤሪዜ?
ያርዴይ ዎይኮ ጊቴይ ባይንዳሶን
ጮ ሜላ ጋዴን
ካፎይ ኦይኬቲ ኤሪዜ?
ዎይኮ ዲዛይ ኢሲ ሚሺ ባና
ቦቾንታ ዲሺን
ጮ ሜላ ፒሪ ኤሪዜ?
ካታማ ጊዶን ኦላስ
ዛዬይ ፑኔቲሺን
ባቦን ኮኮሮንታ ኣሲ ዲ ኤሪዜ?
ጎዳ ሼኔይ ባይንዳ ዲሺን
ካታማ ቦላ ኢታ ሚሺ
ጋኪ ኤሪዜ?
ጎዳይ ባ ጹራ ባ ኦሳንቻ
ናቤታስ ኮይሮቲ ዮቶንታ ዲሼ
ኣይኮካ ኦና።
ጋሞይ ጻጊን ሲዪዲ
ዳጋሞንታይ ኦኔ?
ጎዳይ ባ ጹራ ኢዛስ ዮቲን
ቲንቢቴ ሃሳዮንታይ ኦኔ?
ሳማሪያ ኩንዴ
ኣሽዶዴኒኔ ጊብጼን ዲዛ
ሚጻታን ዲዛ ኡባስ፥
«ሳማሪያ ዙማታ ቦላ ሺቂቴ፤
ሄን ኢስታን ኦሴቲዛ
ጌኔ ኦሶኔ
ቡልኣኬቲዛይሳ ጼሊቴ»
ጊ ኣዋጂቴ።
ጎዳይ፥ «ሃይቲ ዴሬቲ ሎኦ
ኦሶ ኤሬቴና።
ማካላኒኔ
ጌኔን ኤኪዳ ሚሻን
ባ ሚጻ ኩንቴስ።
ሄሳ ጊሻስ ኢንቴ ዴሬ
ሞርኬይ ዎራጃና፤
ኢንቴ ሚጻታ ላሊዲ
ኢንቴ ኬካ ቦንቃና» ጌስ።
ጎዳይ፥ «ሄንንቻይ
ጋሞ ዶናፔ
ዶርስ ዎ ኤኪዛ ዎዴ
ዶርሳስ ናምኡ ጌዳታ ዎይኮ
ዱጻ ሃይታ
ዎ ኤኪዛ ማላ
ሳማሪያ ቢታን ኢሻሎን ኡቲዳ
ኢስራኤሌ ኣሳፔ ጉቲ
ጻላ ኣታና» ጌስ።
ሳሎ ጎዳይ፥
«ሄኮ ኣኔ ሃይሳ ሲዪቴ!
ያቆቤ ዜሬ ቦላ
ማርካቲቴ።
ኢስቲ ኦዳ ናጋራ ጊሻስ
ታኒ ኢስራኤሌ
ኣሳ ቃጻዪዛ ዎዴ
ቤቴሌን ዲዛ
ያርሾ ያርሺዛሶሆታ
ታኒ ላላና፤
ያርሺዛሶሆታ ቦላ ዲዛ
ካጬቲ ሜቄሬቲ ኩንዳና።1
ኢስቲ ኢዛን ቦኔኔ ባልጎ ዲዛ
ኬታ ኡባ
ታ ላላ ይሳና፤
ዳንጋርሳ ዛሌን
ሎኤ ኣሌቂሲዳ
ኬቲ ዉሪካ ላሌታና፤
ጊታ ኬቲ
ዉሪካ ያና» ጌስ።
Source notes (1)
- Cross-reference 2ካዎ 23፡15
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.