ጌሻ ማጻፋ
ኣሞጼ ቲንቢቴ 2
ጎዳይ ሞኣቤስ፥
«ሞኣቤ ኣሳይ ዛሪ ዛሪዲ
ኦዳ ናጋራ ጊሻስ
ታ ኢስታ ቃጻዮንታ ኣጊኬ፤
ኢስቲ ኤዶሜ ካዎ ሜቄ
ቢዲን ጊዳና ጋካናስ ጹጊዳ።1
ሄሳ ጊሻስ ታኒ ሞኣቤ ቦላ
ታማ ዬዳና፤
ሄ ታማይ ቂሪያቴ
ሚጻታ ማና።
ኦላንቻቲ ማጉል፥
ዋሶኔ ዛዬ ጊሪስ ሲሲሼ
ሞኣቤ ኣሳ ዎ ዉርሳና።
ታኒ ኢስታ ሃሪዛ ካዎዛኔ
ዳናታ ኡባ ይሳና» ጌስ።
ጎዳይ ዩሁዳ፥ «ዩሁዳ ኣሳይ
ዛሪ ዛሪዲ
ኦዳ ናጋራ ጊሻስ
ታ ኢስታ ቃጻዮንታ ኣጊኬ፤
ኢስቲ ታ ዎጋ ካዳ፤
ታ ኣዛዞታካ ናጎንታ ኢጺዳ፤
ካሴ ኢስታ ኣዋቲ ጎይኒዳ ኤቃ
ጾሳታ ካሊዲ ኢስቲ ባሌቲዳ።
ሄሳ ጊሻስ ታኒ ዩሁዳ ቦላ
ታማ ዬዳና፤
ሄ ታማይ ዬሩሳላሜ
ሚጻታ ማና» ጌስ።
ጎዳይ ኢስራኤሌስ፥
«ኢስራኤሌ ኣሳይ
ዛሪ ዛሪዲ ኦዳ
ናጋራ ጊሻስ
ታ ኢስታ ቃጻዮንታ ኣጊኬ።
ጺሎ ኣሳታ ቢራስ፥
ሜቶቲዳይሳ ቶሆ
ጫማስ ባይዚዳ።
ኢስቲ ማንቆታ ጉዱላ ቦላ
ጌንዴሪሲዲ ኢስታ
ሁኤ ዬቴቴስ፤
ቆሄቲዳይታስ ጌላ ፒርዴቴስ፤
ኣዋይኔ ናይ
ኢሲ ማጫሳይራ ላይማቴቴስ፤
ኢስቲ ሄሳ ኦ ኦዲ
ታ ሱን ቱኒሴቴስ።
ኣሳፔ ኦይሶ ኤኬቲዳ
ማይኦ ሂጺዲ
ያርሾ ያርሺዛሶዛ
ጋርሳን ኣቄቴስ፤
ኢስቲ ባንታ ጾሳ ኬን
ኤዳሲ ኤኪዲ ዎይኔ ኡሹ
ኢዛን ኡዬቴስ።
«ኢስታስ ኣዱሳቴይ
ዚጋ ሚ ማላ፤
ሚኖቴይካ ጺዳ ማላ
ጊዲዳ ኣሞሬ ኣሳ ታኒ
ኢንቴ ሲንፌ ይሳዲስ፤
ኣይፎንታ ማላ
ጻጶፔ ሾዳ ዲጋዲስ።2
ታኒ ኢንቴስ ኣሞሬ ዴሬ
ቢታ ኢማናስ
ኢንቴና ጊብጼፔ ኬሳዲስ፤
ኦይዱ ታሙ ላይ ኩሜ
ባዞራ ካሌ
ኤሃዳ ላቲሳዲስ።
ቃሴካ ታኒ ኢንቴ
ኣቱማ ናይታ ጋርሳፌ ናቤታ፥
ናቴታ ጊዶፌ
ናዚራዌታ ዴንዲስ።
ኢስራኤሌ ዴሬዞ!
ሄሲ ቱሙ ጊዴኔ?» ጌስ።
ጾሳይ፥ «ኢንቴ ጊዲኮ ናዚራዌታ
ዎይኔ ኡሹ ኡሺዴታ፤
ናቤታካ ቲንቢቴ
ዮቶንታ ማላ ኣዛዚዴታ።
ቤኢቴ ዳሮ ካ ዴጼቲ
ጫኔቲዳ ጋሬይ
ጋርሳራ ዲዛ ሚሽ ሊቂሲዛ ማላ
ታኒካ ኢንቴና ሊቂሳና።
ፒላታ ኣሲ ኬሲ ኤኪ ኣቴና፤
ሚኖይካ ባ ሚኖቴን
ማዴቴና፤
ዎልቃማይካ
ባ ሼምፖ ኣሼና።
ዎንዳፌ ኦይኪዳዴይ ባ ዲዛሶን
ሚኒ ኤቂዲ ኦላ ዛሬና፤
ፒላታ ኦላንቻይካ
ዎጺ ኣቴና፤
ቶጋንቻይካ ባ ሼምፖ ኣሼና።
ኦላ ቃራቲካ ሄ ጋላስ
ጎሮ ካሎ ባቃታና» ጌስ።
Source notes (2)
- Cross-reference ኢሳ 15፡1—16፡14፤ 25፡10-12፤ ኤር 48፡1-47፤ ሂዚ 25፡8-11፤ ሶፎ 2፡8-11
- Cross-reference ዛሬ 3፡8-11
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.