परमेश्वरन सत्य वचन
योहेजकेल 23
दुय व्यभिचार कोरनाय बोहनीस
पोरबु योहोवान यो बुल मारे यां पुग्यो: हे मानसोन ओवलियाद, दुय बायरा होता, ची दुय सोग्गी बोहनीस होती। हुये आपसु नानला होता तीहीन छिनावान धुंदु कोरती होती। हुये मिसर देसम छिनावो कोरतेली। चांत होयी छोल्लान टेमेत् ची कुवारली नी रोवी। मोटली बोहनीसोन नाव ओहोला आरु नानली बोहनीसोन नाव ओहोलीबा हुतो। हांव हेनु दुयो बोहोनस्यु काजे आवरी लेदु। हेरा पुर्या पारी पोयदा होया। ओहोला ते सोमरोन नावोन ओनसारे सामरी सोहोर ती योरुसालेम ओहोलीबा छे। जोत्यार ओहोला मारी होती तोत्यार वी होयी छिनावान काम कोरी। हुयी आपसे धोड़े ओस्सुरी लोड़ान्यान वाये लाग गोय, जी तेरेसी वात कोरतेली। हुये त आखा की आखा निळ्वा छिंदरा पेहेरनेवाळा गोंहोंय जाय ओसा जुवान डाहला, आरु आदिकारी हुता, आरु घुल्ला पोर सोवार होयतेला। ओतरान कोरीन हुयी तिंदरे पुठी छिनावो कोरी जो आखो आखो वारुमा वारु ओस्सुरी लोड़ायन्या हुता; आरु जिना कुदान वाये लागी तेनु मुरतिया पुठी आपसा काजे विटोळ कोर लेदी। जो छिनावो होयी मिसर देसम सिकी। तिनाक वी होयी नी छुड़ी; काहाकी होये नानला होता ती मानसे हेंदरे पुठी सुया आरु हेंदरी छाती चिमाय गोय, आरु हेरे पुठी सुवीन होर भांज लेतला। ओतरान कोरीन हांव ओस्सुरी दुसतीदार पुठी वात कोरन्यान हातोम आप देदु। जेरे वाये होयी लागली होती। हुये हेनु काजे धोर्या। हुये हेंदरा पुर्या लेदा आरु हुये तोलवार चालाड़्या आरु मार नाख्या। हुये हेनुक डोन आप्या आरु बायरा हेमी लोगुन हेरी वात कोरे।
ओहोलान बोहनीस ओहोलीबा आपसी बोहनीसन विनास देखी, ती वी होयी वाये लागीन आपसी बोहनीस सी जादा छिनावो कोरी। होयी आपसी बोहनीस सी एक डोंग जादा होय गोय। होयी ओस्सुरी आदिकारी आरु सेनापती पोर मोन लागाड़ लेदी। घुल्ला चालाड़न्यान वाये लाग गोय। ये आखा जुवान होता। हांव देख्यो कि होयी विटोळ होय गोयली छे। होयी दुयु बोहनीस एक सारकी चाल होती।
पुन ओहोलीबा जादा छिनावो कोरती गोय; जोत्यार होयी भितड़ा पोर सेंदुर सी रेगटा बोनला ओसा कोसदि मानसोन चितरा देखी होये बासन कोड़ीया मा पेटारा बांदला होता आरु हेंदरा मुनका पोर नांबी पागड़ि होती। हुये आखा घुल्ला गाड़ा आदाकारीन जोसा देखायतला। हुये बेबीलोन मा रोहने वावा ओसो लागतेलो।
ओहोलीबा हेनुक देखी आरु होयी हेंदरे वाये लाग गोय। होयी बेबीलोन यां नेवतो मुकली। बेबीलोनन मानसे हेरे पुठी खाटला पोर आया, आरु हेरे पुठी सुवीन हेनीक विटोळ कोर्या; आरु जोत्यार होयी विटोळ होय गोय, तोत्यार हेरो मोन हेंदरे सी फिर गोयो।
जोत्यार होयी उजेन्ती छिनावो कोरने लाग गोय, आरु आपसो डील आखा ओगोळ उगाड़ने लागी, तोत्यार हांव घाड़ाय सि हेंदरे भेनी सी मुय फेरवी लेदु, जोसो हांव हेरी बोहनीस सी मुय फिरवी लेदु। ओळी वी दाहड़ी दाहड़ी छिनावो कोरती रोवी। होयी आपसी नानली होती ती चे दाहड़ा फोम कोरती होती, जोत्यार होयी मिसर देसोम छिनावो कोरती होती। होंया रखेल ओसा मानसोन वाये लाग गोयली, जिंदरो लिंग गोदड़ान तोसो, आरु घुल्ला बीजो सारको होतो। ओहोलीबा, तु आपसी नानली होती ती छिनावान काम पोछी कोरे, जोत्यार मिसर देसोन रोवन्या तारा छोल्ला पेटो पोर हात फिरवे, जोत्या हुये तारी छोल्ली छातीक दोड़ेबता होता।
नानली बोहनीस काजे परमेश्वरन दण्ड
ओहोलीबा, पोरबु योहोवा ओसु कोवे: तु जिंदरे वाये लागली होती घाड़ाय कोरने लाग गोय। पुन हांव तेनुक यां लावीस। चे तुसेक घेरवी लेसे। बेबीलोनोन रोहन्या कोसदि सिपायड़ा, पोकोद, शो आरु कोआ कोबिलान सिपायड़ा आरु हेंदरे पुठी आखा ओस्सुरीया सिपायड़ा, गोंहवे ओसा जुवान, आदिकारी, सेनापती, नायक आरु योद्धा। ये आखा घुल्ला पोर सोवार होयसे। हुये होतियार, रोथ, छोकड़ा आरु देस देसोन मानसे टुवा लीन तार भेनी चोड़ाय कोरसे; आरु ढाळ आरु फोरियां आरु टोप पेहरीन तारे विरुद् च्यारु मेर सी एकठा होयसे; आरु हांव हेंदरा हातोम नियावोन काम आप दोम, आरु हुये आपने आपने नेमोन ओनसारे तारो नियाव कोरसे। हांव तुमुक देखाड़ो की हांव कोतरु रीसावु छे। हुये बेसका रिस कोरीन होयसे तुमुक कुटसे। हुये तुमरा नाक आरु तुमरा कानटा काट लेसे। हुये तोलवार चालाड़से आरु तुमुक मार नाखसे। तोत्यार हुये तुमरा पुर्याक ली जासे आरु तुमरो जो काहिन वाच रोयो होये तिनाक धोपाड़ देसे। हुये तारा छिंदरा वी निकावीन तारा घाटाळा घाटाळा गोहना हापकी ली जासे। इनी रिते हांव तारो मोटलो पाप आरु जो छिनावान काम तु मिसर देस मा सिखली, तेरेसी वी तुसेक छुड़ाय लीस, यां लोगुन कि तु आपसा डुळा हेंदरे भेनी नी लागाड़े आरु नी मिसर देसन ओळी फोम कोरीस।
काहकी पोरबु योहोवा तार सी ओसो कोवे: देख, हांव हेंदरा हातोक कोर दीस जेरेसी तु घाड़ाय राखे आरु जेरेसी तारो मोन फिर गोयो; आरु हुये तार सी घाड़ाय सी वेवहार कोरसे, आरु तारी आखी कोमाय काजे हुचली लेसे, आरु विगुर छिन्दरान कोरीन छुड़ देसे, आरु तारा डिलोक उगाड़ देने सी तारो छिनावो आरु मोटलो पाप उजेनतो होय जासे। यो काम तार सी एने रिते कोरसे काहकी तु दिसरा मुलुको पोछोळ वेवविचारीन जोसा होय गोया, आरु हेंदरी मुरती पुजीन विटोळ होय गोया। तु आपसी बोहनीसुन वाटो पोर चाली, एने हांव तारा हातोम हेरो वाटको कोर दिस।
पोरबु योहोवा ओसु कोवे:
आपसी बोहनीसुन वाटकाम गोथो तुसेक पीनो पोड़से
जो उंडो आरु चोवड़ो छे;
मानसे तार पोर हाससे आरु वायकेड़ा कोरसे,
काहकी हेना वाटकाम बेस काहिन सोमाये।
तु मोंदो सी आरु पीड़ा सी छाक जायीस।
तु आपसी बोहनीस सोमरोनोन वाटकाक,
विनास आरु उजाड़ काजे पीन छाक जायीस।
हेरेम सी तु चाट चाटीन पीस,
आरु हेरा टाहराक वी चावीस आरु आपसी छातीक घायेल कोरीस;
काहकी हांव ओसो कोवलु छे,
पोरबु योहोवान यो बुल छे।
पोरबु योहोवा यो बुल छे, तु जो मुसेक विसराड़ देदी, आरु आपसो मुय मार सी फेरवी लेदी, ओतरान कोरीन तु आपसोत मोटला पाप आरु छिनावान भार भुकोत।
ओहोला आरु ओहोलीबाक डोन
पोरबु योहोवा मार सी कोवे: हे मानसोन ओवलियाद, काय तु ओहोला आरु ओहोलीबान नियाव कोरीस? ती ओळी हेरा भुंनला काम हेनुक देखाड़ दे। काहकी हुये वेवविचार कोरला छे, आरु हेंदरा हातोम लुहुय लागलो छे; होये आपसी बोनावली मुरतिया पुठी वेवविचार कोर्या, आरु आपसा पुर्याक जे मार सी उबेजला, हेनु मुरतोन ओगोळ बादा होयने जुगु चोड़ाया। ओळी होये मार सी ओसो वेवहार कोर्या की हेरे पुठी मारा चुखला जागाक विटोळ कोर्या आरु आरामोन दाहड़ाक विटोळ कोरला छे। हुये आपसा पुर्याक आपसी बोनावली मुरतियान ओगोळ बादा चोड़ावीन तेने दाहड़े मारा चुखला जागाक विटोळ कोरने कोरीन हेरेम भोराया। देख, होये एने रीते काम कोरीन भवन मा माहाय भोरायला छे।
होयी नांबे गोथी मानसोक बुलाय मुकली, आरु होया आय वी लाग्या। हेंदरे जुगु ते उंगवी ले, डुळा मा काजोळ लागाड़, गोहना पेहेर; घाटाळी खाटली पोर बोठली रोवी, आरु तारे ओगोळ एक टेबल आथेरली होती, जेरे पोर तु मारे धुप आरु मारो तेल मेकलो होतो। तोत्यार हेंदरे पुठी बेफिकरीया मानसोन गोड़दीन गोगलु सोमवायी, आरु हेनु साधाराण मानसो जुळ जोंगोल सी बुलावला छाकला मानसे वी होता; होये हेनु दुयु बोहोनस्युन हातो कावय्या पेहराया, आरु हेंदरा मुनका पोर घाटाळो देखायो ओसो मुकुट मेक्या। तोत्यार छिनावो कोरता कोरता डाळा होय गोया, हेरे वाराम हांव कोय पोड़्यु, हेमी ते हुये हेरे पुठी छिनावो कोरसे। काहकी हुये तेरेंचा ओसा गोया जोसा मानसे छिनावायीन चा जाय। तोसात हुये ओहोला आरु ओहोलीबा नावोन मोटला पापी बायरान चा गोया। धोरमी मानसे वेवविचारी आरु खुनीन तोसा हेरो नियाव कोरे; काहकी हुये वेवविचारनी छे, आरु हेंदरा हातोम लुहुय लागलो छे।
कोरीन परमेश्वर योहोवा ओसु कोवे: हांव एक गोड़दी सी हेंदरे पोर चोढ़ाई कोरावीन हेनुक ओसो कोरीस कि हुये मोरी मोरी फिरसे आरु लुटाय जासे। हेनी गोड़दीन मानसे हेनु काजे दोगड़ाटीन हेनुक आपसी तोलवार सी काट नाखसे; तोत्यार हुय हेंदरा पुर्या पोरायटाक मारिन हेंदरा घोरोक वी आगठो लागाड़ीन फुंक देसे। इने रीते हांव मोटला पापी देस मा गोथु छेटु कोरीस, आरु आखा बायरा सोमजीन तुमरे जोसा मोटला पाप कोरने सी वाचला रोहसे। तुमरा मोटला पाप तुमरा मुनका पोरुत पोड़से; आरु तुमु छाचीन आपसी मुरतियान पुजान पापोन भार हुचलसु; आरु तोत्यार जान जासु की हांव परमेश्वर योहोवा छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.