परमेश्वरन सत्य वचन
योहेजकेल 22
योरुसालेम सोहरोन गुनान नियाव
पोरबु योहोवान यो बुल मारे यां पुग्यो: हे मानसोन ओवलियाद, काय तु हेना खुनी सोहोरोन नियाव नी कोरीस? काय तु हेरो नियाव नी कोरीस? हेनुक हेरा आखा भुंनला कामे देखाड़ दे, आरु सोहोरोक कोव, परमेश्वर योहोवा ओसु कोवे: हे योरुसालेम, तु आपसा इचमा खुन कोरे जेरेसी तारो टेम आयो, आरु आपसा जुन नुकसानी कोरने आरु विटोळ होयने कोरीन मुरतिया बोनावे। जो तुमु खुन कोरला छे, तेरेसी तु गुनाकु कोहायीस, आरु जे मुरतीया तु बोनावलो छे, हेंदरे कारण तु विटोळ होय गोयला छे; तु आपसा चेहला दाहड़ाक साते कोर लेदो, आरु आपसा पोछला सालोम लोगुन पुग गोलया छे। एना कारन हांव तुसे देस देसोन मानसो भेनी सी नाव निंदा, आरु आखा देसोक हासनेन कारण कोर देदलु छे। हे बोदनाव्या सोहोर! हे आयेड़न्या सोहोर, जो देस तारे साते छे, आरु जो तारे सी छेटो छे, चे आखा तारा वायकेड़ा उड़ावसे।
देस, इसराएलोन डाहला मानसे आपसा ताकोतोन ओनसारे तुमरेम खुनी होयला छे। तुमरे पुठी रोहन्या आपसा आसी-बसान इजुत नी कोरे। तारे इचमा पारका काजे वेला पाड़्या। आरु विखा वाळा आरु रोन्डायलाक तुमरेम नियाव नी जोड़्यो। जी वात मारी निंगा मा चुखली छे, तारा रोहन्या हेनुक ओसात जान्या। हुये मारा आरामोन दाहड़ाक विटोळ कोरे। तुमरेम लुच्चा मानसे मारने कोरीन ओगोळ रोहे, आरु तारा मानसे बोयड़ा पोर खानो खादला; तारे इचमा मोटलो पाप कोरला छे। योरुसालेम मा मानसे आपसा बासोण लाड़ी पुठी सुया। योरुसालेम मा मानसे दुर होयला बायरा पुठी भी सुया छे। काहनला ते आपसा धोड़े वाळान लाड़ी काजे धोर्या; आरु काहनला आपसी उहड़ीस काजे धोर्या ने मोटलो पाप कोर्या; आरु काहनला आपसी बोहनीस काजे धोर्या, आपसी पुराय काजे बिगाड़ देदा। तुमरेम मारने कोरीन हुये रिश्वोत लेदा; तु ते इयाजता आपे आरु इयाज ली लेये। हुये आपसा धोड़े वावाक वेला पाड़्या ने ठोगु आरु तुमु मेसे विसरी गोया, पोरबु योहोवान यो बुल छे।
ओतरान कोरीन देख, जु नोफु तु गुंडाय कोरीन कोर्यु आरु आपसा इचमा मा खुन कोरलु छे, तेरसी मारी रिस भोड़की गोयली छे, आरु हांव तार पोर हात उठाड़ीस। ऐने जेने दाहड़े हांव तारो नियाव कोरो, काय तेन दाहड़े तारो काळजो वातड़ो आरु तारा हात एक जागे रोय सोकसे? हांव योहोवा ओसु कोवलु छे, आरु ओसोत कोरीस। हांव तारा मानसोक मुलुक मुलुक मा रिवन्या तिवन्या कोरीस, आरु देस देस मा वेरवी दिस, आरु तारी विटोळ काजे तारेम सी सार दिस। तु जाती जातीन देखता आपसी निंगा मा विटोळ कोवायीस; तोत्यार तु जान लिस की हांव योहोवा छे।
परमेश्वरन रीस
ओळी पोरबु योहोवान यो बुल मारे यां पुग्यो: हे मानसोन ओवलियाद, इसराएलोन घोराना मा मारी निंगा सी लुहड़ान मोयोव होय गोयलो चे; हुये आखा की आखा भोट्टीन इचमा पितोळ आरु रांगाक आरु लुहड़ा आरु सिसान सारका बोन गोया; हुये चाँदीन मोयोव सारका होय गोयला छे। इने रिते पोरबु योहोवा हेनु सी ओसु कोवे: ओतरान कोरीन कि तुमु आखा की आखा लुहड़ान मोयोव सारका बोन गोया, एने देखु, हांव तुमुक योरुसालेमोन धोड़े एकठा कोरनेम छे। जोसा मानसे चाँदी, पीतोळ, लुहड़ाक, सीसाक, आरु रांगाक ओतरा जुगु भोट्टीन धोड़े एकठा कोरीन मेके की हेनुक आगठो लागाड़ीन पिघवी जाय, तोसोत हांव तुमुक मारी रिसोन आरु जोलजलाहट सी एकठा कोरीन होयात मेकीन पिघवाड़ दिस। हांव तुमुक होंया तेना आगठाम नाखीस आरु हांव मारी रीसोन आगठाक फुक दीस आरु तुमरो पिघेवनो सुरु होय जासे। जोसा चाँदी भोट्टीन इचमा पिघवाड़े, तोसात तुमु हेरे इचमा पिघवाड़्या जासु; तोत्यार तुमु जान लेसु कि जु आमरे पोर आपसी जोलजलाहट भोड़कावलो छे, चो योहोवा छे।
इसराएलोन ओगोववान्यान पाप
ओळी पोरबु योहोवा यो बुल मारे यां पुग्यो: हे मानसोन ओवलियाद, हेना देस सी कोव, तु ओसो देस छे जो चुखो नी होयो, आरु रीसोन दाहड़ाम तार पोर पानी पोड़्यु। तारा कागळीया तारेम राजमा लोड़ाय विचार कोर्या, हुये आयेड़न्या नाहरो जोसा शिकार धोर्या आरु मानसोक खाय लेदा; हुये किमती धोन हापकी लेदा, आरु हुये सोहरोन बायरा काजे रोंडाड़ देदला छे। हेरा पुजारा मारा नेमोन मोतलोब हापकी हापकीन लागाड़ला छे, आरु मारी चुखली चिजोक विटोळ कोरला छे; हुये चुखलो-विटोळ मा काय फोरोक नी जान्या, आरु नी दिसराक चुखलो ने विटोळोन वात सिखाड़्या, आरु हुये मारा आरामोन दाहड़ान वाराम विनफिकरिया रोया, तेरेसी हांव हेनका इचमा विटोळ कोवायु। योरुसालेमोन डाहला तेनु लेंडिया जोसा छे जे आपसा धोरला जोनवार काजे खाय रोया होय। हुये डाहला पाका बोनने कोरीन होमलु कोरे आरु मानसोक मार नाखे। ऐ योरुसालेम, तारा कागळीया मानसो जुगु मानु झुट काजे खोरली कोवाड़े। हुये झुटा दोरसोन देखे, आरु हेंदरे जुगु झुटा दोरसोन विचारे। नीपने वाळा मारा नाव सी झुट मेके, कि हांव पोरबु परमेश्वर ओसु कोयु, पुन हांव हेनुसी ओसो काय वी नी कोवो। सुदला मानसे एक दिसरान फायदु कोरे। हुये एक दिसराक धुकु आपे आरु चुरी कोरे। हुये गोरब्याक आरु विन आसर्या मानसो पुठी ओसो वेवहार कोरे। हुये पारकाक वी धुकु आपे, जोसा हेंदरे विरुद् काहनो वी नेम नी होय। हांव हेनुम ओसा मानसोक हेरनो चाहयु जु वाड़ाक सुदारे आरु देसोन खास नाका मा मारे ओगोव ओसो उबा होये कि मेसे हेरो नास कोरनो नी पोड़े, पुन ओसो कुदु नी जोड़्यो। एने रिते हां हेनु पोर मारी रिस देखाड़ीस, हांव हेनुक आखो सार दिस, हांव हेनुक हेंदरा भुंनला कामोन कोरता डोन आपीस जेनुक हुये कोरला छे। यो आखु हेंदरु गुनु छे। परमेश्वर योहोवान यो बुल छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.