परमेश्वरन सत्य वचन
इफिसियो 2
मोत छे जीवन भुणी
वो तुमक भी जीवाड़्यो, जो आपसा गुणेहगार आरू पापोन क कारण मरला हबता। जेकाम तुमू पेहल इन संसार न रीति पर, आरू आकाश क हकदार मतलब तिनी आत्मा क अनसारे चालता हूता, जो हांय भी हुकूम नी मानने वावा मा काम करता छे। इनु मा हामु भी आखा पेहल आपसा डील न लालस मा दाहड़ा निकावत्ला हूता, आरू ड़िल, आरू मन की मनसा पुरी करता हूता, आरू दिसरा लोगहन क सारका स्वभाव छे रीस क अवलियाद हूता।
बाकीन यहोवा–भगवान जो दया क धनी छे; आपसा मोटा मोंग क कारण जिना सी वो हामरे छे मोंग करियो, जव हामु पाप क कारण मर गया हूता, ती हामुक मसीह क सात मा जीवाड़्यों; दया छे ही तुमरो छुटकारो हुयलों छे, आरू मसीह ईशु मा ओको सात झेलीयो आरू सोरग धरती मा बठाड़्यों कि त्यों आपसी तिनी दया सी जो मसीह ईशु मा हामरे पर, छे आवने वावा टेहाव मा आपसी दया असीम दन देखाड़े। काहकि विश्वास न लारे दया सी तुमरो छुटकारो होयलों छे, आरू यो तुमरे तरफ रयन नीहि, पर यहोवा भगवान क दान छे; आरू नी कामो क कारण, ओसो नी हुयो कि कोय डाहळाय करे काहकि हामु यहोवा–भगवान की रचना छे; आरू मसीह ईशु मा तिनु वारला काम क करता बनाड़े गया जिनाक यहोवा–भगवान पेहल छे ही हामरे करने क तियार करियो।
मसीह मा एक
एका सी फोम करो, तुमू जो डील न रीति छे गैरयहुदी छे, आरू जो लोगहन डील मा हात क काम क करला खतना सी खतना वाळा कहवायता छे, चे तुहूंक काजे खतनारहित कयता छे, तुमू तिनी टेहाव मा मसीह छे अलग आरू इस्राएल नी प्रजा क पद सी अलग करला, आरू प्रतिज्ञा की वाचा क भागीदार नी हूता, आरू विन आश आरू दूनीया मा यहोवा–भगवानन बिना रवता हूता। पर हिमी मसीह ईशु मा तुमू जो पेहल दूर हूता, मसीहन लुहूय यो छे साते होय गिया। काहकि हयो आमरो हावल छे, जो यहूदि यो आरू गैरयहुदी क एक कर दियों आरू अलग करने वाळा भितड़ा क जो विच ना हूतों ढुळ्वी दियों। 2आरू आपसा डिलो मा दुस्मन मतलब ची व्यवस्था जेरो हुकुम विधि न रीति पर हूती, मिटाय दियों कि दूय छे आपसा मा एक नवली जाती बनावीन हावल कराय देय, 3आरू कुरूस पर दुस्मन क खतम करिन एका सी दूयन क एक डिल बनावीन यहोवा भगवान छे भेवाड़। आरू चो आवीन तुमूक जो दूर हूता, आरू ओको जो साते हूता, दूयन क हावळती क खुश खबर समवाड़ियों। काहकि हेरे लारे हामु दूयन आत्मा मा बास क साते हुयो।
एका करता तुमू हिमी बाहर देशी आरू अनजानिया नीहि रया, पर चुखलो लोगहन क साती स्वदेशी आरू यहोवा–भगवान न घर क हुय गया छे। आरू दासो आरू कागळीयान क निंव क कुना क दगड़ो मसीह आपसु बन गयों छे, बनाड़े गयला छे। जेकाम आखो बनलो हाववीन पोरबु मा एक त्योखों मंदिर बनतो जाय, जिना मा तुमू भी आत्मा क लारे यहोवा–भगवान क रयने क जागो बन जाय।
Source notes (3)
- Cross-reference कुलुस्सियो 2:13
- Cross-reference कुलुस्सियो 2:14
- Cross-reference कुलुस्सियो 1:20
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.