परमेश्वरन सत्य वचन
इफिसियो 1
पौलुस न तरफ सी जो ईशु मसीह क कागळीयो छे तिनु चुखलो आरू मसीह ईशु मा
विश्वास मानसे क नाव जो इफिसुस मा छे
हामरा पिता यहोवा–भगवान आरू पोरबु ईशु मसीह कि तरप छे तुमके दया आरू शांती जोड़ती रये।
मसीह मा आत्मिक बरकत
हामरा पोरबु ईशु क आरू यहोवा–भगवान आरू पिता क धन्यवाद हुयो कि वाँ हामुक मसीह मा सोरग न धरती मा आखी भातिन बरकत दीयों छे। जोसो त्यो हामुक जगत न उबजने छे पेहल मोंग सी हामुक तिनाम निवाड़ लेदो कि हामु ओकी नजर मा त्योखो आरू निर्दोष हो। आरू मोंग मा वो आपसी मरजी क भले मेहनत क लारे हामुक आपसा जुगे पेहल सी ठहरावलो कि ईशु मसीह क द्वारा हामु ओको लेपालक बेटा होयजे, जो आपसा एक खुळिया पोर्यान क लारे कि ओको तिनी दयान महिमा कि बढ़ाई होय, जिनाक वो हामुक आपसा पोर्या मोंग क द्बारा फुकट मा दिदो। 2हामुक तिनामा ओको लुहूय यो क द्वारा छुटकारू, मतलब गुणान कि माफी ओको तिनी दया क धन क अनसारे मिल्यो छे, जिनाक वो पुरे गियान आरू समझ क सात हामु पर घोणा करियों। काहकि वो आपसी मरजी क भेद तिना भला मेहनत क अनसारे बताड़्यों, जिनाक वो आपसा मा ठान लेदो हूतो। कि टेम क पुरो हुयने क ओसो तयारी हुयो कि जो काय सोरगदूत मा छव आरू जो काय धरती पर छे, आखो काय तौ मसीह मा एखटो करे।
तिना मा जोकाम हामु भी ओकी मनसा छे जो आपसी मरजी क मत क अनसारे सब काय करतो छे, पेहल सी ठहरायो जाईन मीरास बने। की हामु, जिनने पेहल सी मसीह पर आश राखला हुता, ओकी महिमा कि बढ़ाई क कारण हुयो।
आरू तिना मा तुमरे पर भी जव तुमू सच वचन सुन्या जो तुमरे छुटकारा क खुश खबर छे आरू जिना पर तुमू विश्वास करिया, वायदो करला चुखली आत्मा क छापो लाग्या। वो उका मुववी लेदला क छुटकारू क सिएन हामरी मीरास क बनायों छे, कि ओकी महिमा की बढ़ाई हुयो।
पौलुस की प्रार्थना
इना कारण, हाव भी तिना मा मोंग आरू विश्वास क खबर समवीन जो तुम लोगहन मा पोरबु ईशु पर छे आरू आखा चुखलो लोगहन पर देखाये, तुमरे जुगे धन्यवाद करनो नीहि छुड़ो आरू मारी प्रार्थना मा तुमूके फोम करिया करो कि हामरा पोरबु ईशु मसीह क यहोवा–भगवान जो महिमा क बास छे, तुममक आपसी उळखन मा गियान आरू प्रकाश कि आत्मा आपे, आरू तुमरा मन न डुवा विजावो हुयो कि तुमू जान लेदो कि ओकी बुलावने की आश काय छे, आरू चुखलो लोगहन मा ओकी मीरास की महिमा क धन कसो छे, आरू ओकी शक्ति हामरे मा जो विश्वास करता छे, कतरी मोटी छे, ओकी शक्ति क शक्ति क तिना काम क अनसारे जो वो मसीह मा कर्यो कि उको मरला मा सी जीवाड़िन सोरग धरती मा आपसे जेवड़े तरफ आखी भातिन प्रधानता हक आरू शक्ति, आरू पोरबुता क आरू आखा नाव क उपर जो नी ते इना धरती मा पर आवने वाळा धरती मा भी लेदो जाछे, बठाड़्यों; 3आरू आखो काय ओको पाय तळे कर दियों; आरू ओको आखी चीजों पर होकदार ठेहरावीन मंडळी क दे दियों, यी उको डिल छे, आरू ओकी भरपुरी छे जो आखाम आखो पुरो करतो छे।
Source notes (3)
- Cross-reference प्रेरितन 18:19-21; 19:1
- Cross-reference कुलुस्सियो 1:14
- Cross-reference कुलुस्सियो 1:18
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.