परमेश्वरन सत्य वचन
1 यहुन्ना 4
आत्मा क पारखु
हे मोंगावु, हर एक आत्मा की प्रतिती नी करू, वरना आत्मा क पारखु कि वो यहोवा–भगवान की आरू छे कि नी; काहकि घोणा छे झुठा भविष्यवक्ता धरती मा निकवीन उबा होया छे। यहोवा–भगवान क आत्मा तुमू इनीये रीति छे उवखी सकता होय: जो आत्मा मान लेती छे कि ईशु मसीह डील मा हईन आश छे वो यहोवा–भगवान की आरू छे। आरू जो आत्मा ईशु क नी मानती, वो यहोवा–भगवान की आरू छे; आरू चो तो मसीह विरोधी आत्मा छे जेरो चर्चा तुमू सोमवी त्योक्या होय कि वो आवनेवाळो छे, आरू हिमी भी धरती मा छे।
हे पोर्या, तुमू यहोवा–भगवान क होय, आरू तुमू ने तींदरा पर जय देख छे; काहकि जो तुमू मा छे ओको छे जो संसार मा रयन महान छे। वो संसार क छे, इन कारण वो संसार की वात बुलता छे, आरू इन्दरी सोमवता छे। हामु यहोवा–भगवान क छे। जो यहोवा–भगवान क जानता छे वो हामरी सोमवता छे; जो यहोवा–भगवान क नी जानता वो हामरी नी सोमवता। इन प्रकार हामु सच्चाई की आत्मा आरू भ्रम आत्मा क उवख लेता छे।
यहोवा–भगवान मोंगावु छे
हे मोंगावु, हामु आपस मा मोंग राखु; काहकि मोंग यहोवा–भगवान छे। जो काही मोंग करता छे, वो यहोवा–भगवान छे पैदा छे आरू यहोवा–भगवान क जानता छे। जो मोंग नी राखता वो यहोवा–भगवान क नी जानता, काहकि यहोवा–भगवान मोंग छे। जो मोंग हामु छे राखता छे, वो इन छे प्रगट होया कि यहोवा–भगवान ने आपनो एकखुळीया पोर्य क धरती मा मुकल्या छे कि हामु ओका द्वारा जीवन देखसु। मोंग इनीये मा नी कि हामु ने यहोवा–भगवान छे मोंग कर्या, पर इनीये मा छे कि त्यो हामु छे मोंग कर्या हामरा पाप क माफ करने करीन आपसा पोर्या क मुकल्यो।
हे मोंगावु, जव यहोवा–भगवान ने हामु छे ओसो मोंग कामो, तो हामु क भी आपस मा मोंग राखनो जुवे। 1यहोवा–भगवान क किही काही ने नी देख्या; यदि हामु आपस मा मोंग राखसु, तो यहोवा–भगवान हामु मा बना रयता छे आरू ओको मोंग हामु मा सिध्द होय गया छे।
इनी छे हामु जानता छे कि हामु ओकामा बन्या रयता छे, आरू वो हामु मा; काहकि त्यो आपने आत्मा मा छे हामु आपियो छे। हामु ने देख भी लेदा आरू गवा देता छे कि बास ने पोर्या क धरती क उध्दारकरता करीन मुकल्या छे। जो काही यो मान लेता छे कि ईशु यहोवा–भगवान क पोर्य छे, यहोवा–भगवान उनमा बना रयता छे, आरू वो यहोवा–भगवान मा। जो मोंग यहोवा–भगवान हामु छे राखता छे, ओको हामु जान गया आरू ओका विश्वास छे। यहोवा–भगवान मोंग छे, आरू जो मोंग मा बना रयता छे वो यहोवा–भगवान मा बना रयता छे, आरू यहोवा–भगवान उनमा बना रयता छे। इनी छे मोंग हामु मा सिध्द होया कि हामु न्याय क दाहड़ो हेम्मत होय; काहकि जोसो वो छे वोसो ही संसार मा हामु भी छे। मोंग बीक नी हुयसे, वरना सिध्द मोंग भय क दूर कर देता छे; काहकि भय क सम्बन्ध दण्ड छे हुयसे छे, आरू जो भय करता छे वो मोंग मा सिध्द नी होया।
हामु अतरान करीन मोंग करता छे, कि पेहल त्यो हामु छे मोंग कामो। यदि काही कये, “हाव यहोवा–भगवान छे मोंग राखता छे” आरू आपने भाईस्यो छे बैर राखे तो वो झूठा छे; काहकि जो आपने भाईस्यो छे जिनाक त्यो देख्या छे मोंग नी देखा मोंग नी राखता सकता। आरू उका रईन यी हुकुम मीवी छे। कि जु कोय आपसा यहोवा–भगवान न से मोंग राखता छे, चाँ आपसा भाईस्यो साथे मोंगावु राखे।
Source notes (1)
- Cross-reference यहुन्ना 1:18
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.