परमेश्वरन सत्य वचन
1 यहुन्ना 5
संसार पर जय हासिल करने
जेरो यो विश्वास छे कि ईशु ही मसीह छे, वो यहोवा–भगवान छे पैदा हुयो छे; आरू जो काही पैदा करनेवावा छे मोंग राखता छे, वो ओको छे भी मोंग राखता छे जो ओका सी पैदा हुयो छे। जव हामु यहोवा–भगवान छे मोंग राखता छे आरू ओकी हुकुम क मानता छे, तो इनी छे हामु जानता छे कि हामु यहोवा–भगवान की अवलियादो छे मोंग राखता छे। 1काहकि यहोवा–भगवान छे मोंग राखनो यो छे कि हामु ओकी हुकुम क मानु; आरू ओकी हुकुम वातड़ो नी। काहकि जो काही यहोवा–भगवान छे पैदा हुयो छे वो संसार पर जय हासिल करता छे; आरू वो विजय जिना छे संसार पर जय हासिल होयती छे आमरो विश्वास छे। संसार पर जय देखनेवावा कुन छे? केवल वो जेरो यो विश्वास छे कि ईशु, यहोवा–भगवान क पोर्य छे।
ईशु मसीह क विषय मा गवा
योही छे जो पानी आरू लुहूय क द्वारा आश हुता, मतलब ईशु मसीह: वो नी केवल पानी क द्वारा वरना पानी आरू लुहूय दुय क द्वारा नी सच्चा हुता। आरू जो गवा देता छे, वो आत्मा छे; काहकि आत्मा सच्चाई छे। गवा देनेवावा तीन छे, आत्मा, आरू पानी, आरू लुहूय; आरू तीनु एक ही वात पर सहमत छे। जव हामु मानुस की गवा मान लेता छे, तो यहोवा–भगवान की गवा तो ओका सी बढ़ीन छे; आरू यहोवा–भगवान की गवा यो छे कि त्यो आपसा पोर्या क विषय मा गवा देदी छे। जो यहोवा–भगवान क पोर्या पर विश्वास करता छे वो आपसा ही मा गवा राखता छे। जो यहोवा–भगवान पर विश्वास नी कर्या त्यो ओको झूठा ठेराया, काहकि त्यो ओको गवा पर विश्वास नी कर्या जो यहोवा–भगवान ने आपसा पोर्या क विषय मा दिदो छे। 2आरू वो गवा यो छे कि यहोवा–भगवान ने हामु अमरकाय जीवन आप्य छे, आरू यो जीवन ओका पोर्या मा छे। ओका साथे पोर्य छे, ओका साथे जीवन छे; आरू ओका साथे यहोवा–भगवान क पोर्य नी, ओका साथे जीवन भी नी छे।
अमरकाय जीवन
हाव ने तुमू जो यहोवा–भगवान क पोर्या क नाव पर विश्वास करता होय, एरकरीन लिख्या छे कि तुमू जानु कि अमरकाय जीवन तुमरो छे। आरू हामु ओका सामने जो हियाव होयतो छे, वो यो छे; कि यदि हामु ओकी मरजी क अनसारे काही मांगता छे, तो वो हामरी सोमवता छे। जव हामु जानता छे कि जो काही हामु मांगता छे वो हामरी सोमवतो छे, तो यो भी जानता छे कि जो काही हामु ने ओका सी मांग्या, वो देख्या छे।
यदि काही आपने भाईस आरू क ओसो पाप करता देखु जीनुन फव मरनो नी होय, तो रावन्या करे, आरू यहोवा–भगवान ओको तिनून करता, जो ओसू पाप करिया छे जीनान फव मोरनो नी होय, जीवन आपसे। पाप असो भी हुयो छे जिनाक फव मोरनो छे ओका विषय मा हाव रावन्या करने क करता नी कयतो। सब प्रकार क अन्याय तो पाप छे, पुन ओसो पाप भी छे जेरो फोव मरला नी।
हामु जानता छे, कि जो काही यहोवा–भगवान छे पैदा होया छे, वो पाप नी करता; पर जो यहोवा–भगवान छे पैदा होया ओको वो वाचाड़ राखता छे, वो शैतान ओको धर नी सके।
हामु जानता छे कि हामू यहोवा–भगवान छे, आरू सब संसार ओको शैतान क वंश मा पड़्या छे।
हामु यो भी जानता छे कि यहोवा–भगवान क पोर्य आय गयो छे आरू त्यो हामु समझ देदी छे कि हामु ओको सच्चा मन क उळखने; आरू हामु ओकामा जो सच्चाई छे, मतलब ओका पोर्य ईशु मसीह मा रयता छे। सच्चा यहोवा–भगवान आरू अमरकाय जीवन योही छे।
हे पोर्या–पारी, तुमू मुरतीया सी वाचीन रयजो।
Source notes (2)
- Cross-reference यहुन्ना 14:15
- Cross-reference यहुन्ना 3:36
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.