परमेश्वरन सत्य वचन
1 यहुन्ना 3
देखु बास ने हामु छे कोसो मोंग कर्या छे कि हामु यहोवा–भगवान की अवलियाद कोवायता; आरू हामु छे भी। इनीये कारण संसार हामु नी जानता, काहकि त्यो ओको भी नी जान्या। हे मोंगावु, हिमी हामु यहोवा–भगवान की अवलियाद छे, आरू हिमी तक यो प्रगट नी होया की हामु काय काही होयछे! ओतरा जानता छे कि जव वो प्रगट होयसर तो हामु ओका समान होयसु, काहकि ओको वोसो ही देखछे जोसो वो छे। आरू जो काही ओको पर यो आश राखता छे, वो आपने आप क वोसो ही चुखलो करता छे जोसो वो चुखलो छे।
जो काही पाप करता छे, वो व्यवस्था क विरोध करता छे; आरू पाप तो व्यवस्था क विरोध छे। 2तुमू जानता होय कि वो एरकरीन प्रगट होया कि पाप क हर ली जाय; आरू ओका स्वभाव मा पाप नी। जो काही उनमा बन्या रयता छे, वो पाप नी करता, जो काही पाप करता छे, त्यो नी तो ओको देख्या छे आरू नी ओको जाने छे।
हे पोर्या काही क भरमाने मा नी आवने। जो न्याय क काम करता छे, चो ओको क समान न्यायी छे। जो काही पाप करता छे शैतान की आरू छे, काहकि शैतान शुरू ही छे पाप करता आश छे। यहोवा–भगवान क पोर्या एरकरीन प्रगट होया कि शैतान क काम क नाश करे।
जो काही यहोवा–भगवान छे पैदा छे वो पाप नी करता; काहकि ओका स्वभाव ओकामा बन्या रयता छे, आरू वो पाप करीन ही नी सकता काहकि यहोवा–भगवान छे पैदा छे। इनी छे यहोवा–भगवान की अवलियाद आरू शैतान की अवलियाद जाने जाता छे; जो काही न्यायपन क काम नी करता वो यहोवा–भगवान छे नी, आरू नी वो जो आपने भाईस छे मोंग नी राखता।
एक दिसरा छे मोंग राखु
काहकि जो खबर तु ने शुरू छे सोमव्या, वो यो छे कि हामु एक दिसरा छे मोंग राखसु; आरू कैन क समान नी बने जो ओको शैतान छे हुता आरू जो आपने भाईस क घात कर्या। आरू ओको काही कारण घात कर्या? इनीये कारण कि ओका काम बुरा हुता, आरू ओका भाईस क काम न्यायी हुता।
हे भाईस, आरू बहनीस यदि संसार तुमू छे बैर करता छे तो भोंगलाय गयो नी करने। 4हामु जानता छे कि हामु मरला छे पार हईन जीवन मा पुच्या छे; काहकि हामु भाईस आरू बहनीस छे मोंग राखता छे। जो मोंग नी राखता वो मरला की दशा मा रयता छे। जो काही आपने भाईस छे बैर राखता छे, वो हत्यारा छे; आरू तुमू जानता होय कि काही हत्यार मा अमरकाय जीवन नी रयता। हामु ने मोंग इनी छे जान्या कि त्यो हामरे करता आपनो जीव देय दिया; आरू हामु भी भाईस क करता जीव देना जूवे। पर जिना काही क साथे संसार क धन होय आरू वो आपसा भाईस क गरीब देखीन ओको पर तरस खाने नी जूवे, तो उनमा यहोवा–भगवान क मोंग क बन्या रया सकता छे? हे पोर्या, हामु वचन आरू जीभ ही छे नी, पर काम आरू सच्चाई क द्वारा भी मोंग करे।
यहोवा–भगवान क सामने हेम्मत
इनी छे हामु जागसु कि हामु सच्चाई क छे; आरू जिना वात मा हामरा मन हामु दोष देसे, ओको विषय मा हामु ओको सामने आपसा–आपसा मन क ढाढ़स दी सकछे। काहकि यहोवा–भगवान हामरे मन छे मोट छे, आरू सब काही जानता छे। हे मोंगावु, यदि हामरा मन हामु दोष नी देता, तो हामु यहोवा–भगवान क सामने हेम्मत करता छे। आरू जो काही हामु मांगता छे, वो हामु ओको जड़से काहकि हामु ओकी हुकुम क मानता छे आरू जो ओको भाता छे चो करता छे। 5ओकी हुकुम यो छे कि हामु ओको पोर्य ईशु मसीह क नाव पर विश्वास करे, आरू जो ओको ने हामु हुकुम देदी छे तीनी क लारे आपस मा मोंग राखे। जो ओकी हुकुम क मानता छे, वो उनमा आरू वो उन मा बना रयता छे: आरू इनी छे, मतलब उना आत्मा छे जो ओको ने हामु दिया छे, हामु जानता छे की वो हामु मा बन्यो रयतो।
Source notes (5)
- Cross-reference यहुन्ना 1:12
- Cross-reference यहुन्ना 1:29
- Cross-reference यहुन्ना 13:34
- Cross-reference यहुन्ना 5:24
- Cross-reference यहुन्ना 13:34; 15:12,17
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.