परमेश्वरन सत्य वचन
1 यहुन्ना 2
मसीह आमरो सहायक
हे मारा पोर्या, हाव या वात तुमूक एरकरीन लिखता छे कि तुमू पाप नी करू; आरू यदि काही पाप करे, तो बास क साथे आमरो एक सहायक छे, मतलब न्यायी ईशु मसीह। आरू वो हामरे पाप क माफ करता छे, आरू केवल हामरे ही नी वरना सारी धरती क पाप क भी माफ करता छे।
यदि हामु ओकी हुकुम क मानसु, तो इनासे हामु जान लेसु कि हामु ओको जान गया छे। जो काही यो कयता छे, “हाव ओको जान लेदु छे” आरू ओकी हुकुम क नी मानता, वो झूठ छे आरू ओको मा सच्चाई नी पर जो काही ओको वचन पर चाले, उनमा सचमुच यहोवा–भगवान क मोंग सिध्द होया छे। इनी छे हामु जानता छे कि हामु उनमा छे। जो काही यो कयता छे कि हाव उनमा बना रयता छे, ओको जुवे कि आप भी वोसो ही चाले जोसो वो चालतो हुता।
नोवली हुकुम
हे मोंगावु, हाव तुमूक काही नोवली हुकुम नी लिखता, पर चो जुनली हुकुम जो शुरू छे तुमूक मिवी छे; यो जुनली हुकुम वो वचन छे जिनाक तुमू ने सोमव्या छे। पछु भी हाव तुमूक नोवली हुकुम लिखता छे, आरू यो उनमा आरू तुमू मा सच्ची ठेरायती छे; काहकि आँधारलो मिटतो जातो छे आरू सच्चाई क दिया हिमी चमकने लाग्यो छे।
जो काही यो कयता छे कि हाव दिवा मा छे आरू आपसा भाईस छे बैर राखता छे, वो हिमी तक आंधारला ही मा छे। जो काही आपसा भाईस छे मोंग राखता छे वो दिवा मा रयता छे, आरू ठुकर नी खाय सकता। पर जो काही आपने भाईस छे बैर राखता छे वो आंधारला मा छे आरू आंधारला मा चालता छे, आरू नी जानता कि काँ जाता छे, काहकि आँधारलो ने ओकी डुवा आंधळी कर देदी छे।
हे पोर्या, हाव तुमूक एरकरीन लिखता छे कि ओका नाव छे तुमरा पाप माफ हुयो छे। हे पितरो, हाव तुमूक एरकरीन लिखता छे कि जो शुरू छे तुमू ओको जानता होय। हे जुवान्या, हाव तुमूक एरकरीन लिखता छे कि तुमू ने ओको शैतान पर जय देख्या छे। हे पोर्या हाव ने तुमूक एरकरीन लिख्यो छे कि तुमू बास क जान गया होय।
पितरो, हाव ने तुमूक एरकरीन लिख्या छे जो शुरू छे तुमू ओको जान गया होय। हे जुवान्या, हाव ने तुमूक एरकरीन लिख्या छे कि तुमू बलवन्त होय, आरू यहोवा–भगवान क वचन तुमू मा बना रयता छे, आरू तुमू ने ओको शैतान पर जय देख्या छे।
संसार छे मोंग करू
तुमू नी तो संसार छे आरू नी संसार मा की समान छे मोंग राखु। यदि काही संसार छे मोंग राखता छे, तो उनमा बास क मोंग नी छे। काहकि जो काही संसार मा छे, मतलब डील की लालोच आरू डुवा की लालोच आरू जीविका क डाहळाय, वो बास की आरू छे नी पुन संसार ही की आरू छे। संसार आरू ओकी लालुच दुय मिटती जाता छे, पर जो यहोवा–भगवान की मरजी पर चालता छे वो सर्वदा बन रोवछे।
मसीह विरोधी
हे पोर्या, यो आखरी टेहाव छे; आरू जोसो तुमू ने सोमव्या छे कि मसीह क विरोधी आवनेवाळा छे, ओको लारे हिमी भी घोणा छे मसीह विरोधी उठ उबा होया छे; इनासे हामु जानता छे कि यो आखरी टेहाव छे। वो निकव तो हामु ही मा छे, पर हामु मा क हुता नी; काहकि यदि वो हामु मा क हुयसे, तो हामरे साथे रयता; पर निकवता एरकरीन गया कि यो प्रगट होय कि वो सब हामु मा रयन नी छे।
पुन तुमरा तो ओको चुखलो छे अभिषेक हुयो छे, आरू तुमू सब काही जानता होय। हाव ने तुमूक एरकरीन नी लिख्या कि तुमू सच्चाई क नी जानता, पर एरकरीन की ओको जानता होय, आरू एरकरीन कि काही झूठ सच्चाई की आरू छे नी।
झूठा कुन छे? केवल वो जो ईशु क मसीह हुयने छे मना करता छे; आरू मसीह विरोधी चो छे जो बास क आरू पोर्या क मना करता छे। जो काही पोर्या क मना करता छे ओको साथे बास भी नी जो पोर्या क मान लेता छे, ओको साथे बास भी छे।
जो काही तुमू ने शुरू छे सोमव्या छे, चो तुमू मा बन रये तो तुमू भी तो तुमू पोर्या मा आरू बास मा बन्या रवु। आरू जेरी ओको हामरे सी प्रतिज्ञा करी वो अमरकाय जीवन छे।
हाव ने यो वात तुमूक उन क विषय मा लिखी छे, जो तुमूक भरमाते छे: पुन तुमरा वो अभिषेक जो ओकी आरू छे कर्या गया, तुमू मा बन्या रयता छे: आरू तुमू इनाक योजना नी कि काही तुमूक सिखाड्या, वरना जोसो वो अभिषेक जो ओकी आरू छे कर्या गया तुमूक सब वात सिखाड़ता छे, आरू यो सची छे आरू झूठ नी; आरू जोसो त्यो तुमूक सिखाड्या छे वोसो ही तुमू उको बन्या रयता होय।
यहोवा–भगवान की अवलियाद
शेवली कावा हे पोर्या, बन्या रवु कि जव वो प्रगट होय तो हामु हियाव होय, आरू ओको आवने पर ओको सामने लज्जित नी होय। यदि तुमू जानता होय, कि वो न्यायी छे, तो यो भी जानता होय कि जो काही न्याय क काम करता छे वो ओको छे पैदा छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.