Desiya Bible
ଇତପଦେସ 30
ଆଗୁରର୍ କାତା
ଜାକିରର୍ ପିଲା ଆଗୁରର୍ କାତାର୍ ଅରତର୍ ବିସଇ । ସେ ନର୍ଲକ୍ ଇତିଏଲ୍କେ, କଇବାକେ ଗାଲେ ଇତିଏଲ୍ ଆରି ଉକଲ୍କେ କଇସି, କଇବାକେ ଗାଲେ ମୁଇଁ ଗଟେକ୍ ନର୍ଲକର୍ ବିତ୍ରେ ଅନି ଗଟେକ୍ ବୁଦି ନଇଁଲା ଲକ୍ ପାରା, ଆରି ମକେ ନର୍ଲକର୍ ପାରା ବୁଜ୍ବା ସକ୍ତି ନାଇଁ । ମୁଇଁ କାଇ ବୁଦି ଗିଆନ୍ ସିକି ନାଇଁ, କି କାଇ ଦରମ୍ ବିସଇରେ ମୁଇଁ ସିକି ନାଇଁ । କେ ସର୍ଗେ ଜାଇ କରି ଉତ୍ରି ଆଇଲା ଆଚେ ? କେ ନିଜର୍ ଆତ୍ ମୁଟାଇ ପବନ୍କେ ଦାରିଆଚେ ? କେ ନିଜର୍ ଲୁଗା ସଙ୍ଗେ ପାନିକେ ବାନ୍ଦି ରକି ଆଚେ କି ? କେ ପୁର୍ତିବିକେ ସନ୍ଦିକରି ଆଚେ? ତାର୍ ନାଉଁ କାଇ ନାଉଁ? ଆରି ତାର୍ ପିଲାର୍ ନାଉଁ କାଇ ନାଉଁ ? ଜଦି ଜାନୁସ୍ ତେବେ କଅ! ପର୍ମେସରର୍ ସବୁ ବାକିଅକେ ପରିକା କରି ସିଦ୍ ଅଇଲା ଆଚେ; ଜନ୍ ଲକ୍ମନ୍ ତାକେ ଆସା ବର୍ସା କର୍ବାଇ, ସେ ସେମନର୍ ଆଡ୍ନା ପାରା । ମାପ୍ରୁର୍ ବାକିଅତେଇ କାଇଟା ମିସା ମିସାଆ ନାଇଁ, ମିସାଇଲେ ସେ ତମ୍କେ ନିନ୍ଦା କର୍ସି, ଆରି ତମେ ମିଚ୍ କାତା କଇବା ଲକ୍ ବଲିକରି ଜାନା ପଡ୍ସା । ମୁଇଁ ତମର୍ ଲଗେ ଏ ଦୁଇଟା ବର୍ ମାଙ୍ଗିଆଚି, ମୁଇଁ ମର୍ବା ଆଗ୍ତୁ ମକେ ସେଟା ଦେବାକେ ମନା କର୍ନାଇଁ । କାରାପ୍ କାତା ଆରି ମିଚ୍ କାତା କଇବାକେ ମର୍ ଟଣ୍ଡେ ଦେଏ ନାଇଁ; ମକେ ବେସି ଗରିବ୍ କି ସାଉକାର୍ କର୍ ନାଇଁ, ମର୍ ବାଗେ ଜେତ୍କି ଆଚେ, ସେତ୍କି ଦେଇକରି ପର୍ତି ପାଲନ୍ କର୍। ଜଦି ଦନ୍ ଅଦିକ୍ ଅଇଲେ ତକେ ପାସ୍ରି ଜାଇକରି, ସବୁବେଲର୍ ମାପ୍ରୁ କେ? ବଲିକରି କଇବି ଆରି ଗରିବ୍ ଅଇଲେ ଚରି କର୍ବି ଆରି ମର୍ ପର୍ମେସରର୍ ନାଉଁକେ ମିଚ୍ ବଲିକରି କଇବି । କନ୍ ମିସା ଦାସ୍କେ ମାଲିକର୍ ମୁଆଁଟେ କାଇବଲିକରି କୁଆ ନାଇଁ, ନଇଁଲେ ତମ୍କେ ଅବିସାପ୍ ଦେଇସି ଆରି ତମେ ଦସି ବଲାଇ ଅଇସା । ଜେ ନିଜର୍ ବାବାକେ ଅବିସାପ୍ ଦେଇସି, ଆରି ନିଜର୍ ଆୟାକେ ଆସିର୍ବାଦ୍ ନ କରତ୍, ଏ ରକାମ୍ କେତେ ଲକ୍ମନ୍ ଆଚତ୍ । ନିଜେ ଦେକ୍ବା ଇସାବ୍ରେ ନିକ, ଏ ରକାମ୍ ଗଟେକ୍ ବଁସ୍ ଆଚତ୍, ଏବ୍କେ ଜାକ ସେମନ୍ ନିଜର୍ ମୁର୍କିକେ ଦଇ ଅଅତ୍ ନାଇଁ । ଏ ରକାମ୍ ଗଟେକ୍ ବଁସ୍ ଆଚତ୍, ସେମନ୍ ନିଜର୍ ଇସାବ୍ରେ ବେସି ବଡ୍ ବଲିକରି ବାବ୍ବାଇ ! ଆରି ସେମନ୍ ଅଲ୍ଗା ଲକ୍ମନ୍କେ ଆଁକି ବଡ୍ ବଡ୍ କରି ଦେକ୍ଲାଇନି । ପୁର୍ତିବିର୍ ତେଇ ଜେନ୍ତି ଲକ୍ମନ୍ ଆଚତ୍ ଦୁକିସୁକି ଲକ୍ମନ୍କେ ମରାଇବାକେ, ଜନ୍ ଲକ୍ମନର୍ ଦାନ୍ତ୍ ବିସ୍ ରକାମ୍ ଆରି ତିପ୍ତିପା କାଟ୍ରା ପାରା, ଏ ରକାମ୍ ବଁସ୍ ଆଚତ୍ । ଜଁକ୍କେ ଦୁଇଟା ଟକି ଆଚତ୍, ସେମନ୍ କଇବାଇ ଦିଆ, ଦିଆ ବଲିକରି । ଏନ୍ତାରି ତିନ୍ଟା ଜିନିସ୍ ଆଚତ୍, କେବେ ମିସା ସାନ୍ତିନାଇଁ, ଆରି ଚାର୍ଟା ଜିନିସ୍ କେବେ ମିସା ନ କଅତ୍, ବେସି ଅଇଲା ବଲିକରି । ମସନ୍ ଆରି ବାଞ୍ଜିମାଇଜି ସାନ୍ତିରେ ରଇ ନାପାରତ୍; ସୁକ୍ଲା ବୁଏଁ ଜେତେକ୍ ପାନି ରକଇଲେ ମିସା ଆରି ଜୟ୍, ନ କଏ, ବେସି ଅଇଲା ବଲିକରି। ଜନ୍ ଆଁକି ନିଜର୍ ବାବାକେ ଇଜତ୍ ଜିକ୍ସି ଆରି ଆୟାର୍ କାତାକେ ନ ମାନେ, ତାକେ କୁଆମନ୍ ଆସି କାଇ ପାକାଇବାଇ ଆରି ଗିଦଲ୍ ଚଡଇପିଲାମନ୍ ସେମନ୍କେ କାଇ ପାକାଇବାଇ । ତିନ୍ଟା କାତାକେ ମକେ କାବା ଲାଗି ଗାଲା, ମାତର୍ ଚାର୍ଟା କାତାକେ ମୁଇଁ ଜାନି ନାପାର୍ଲି; ଆକାସେ ଗିଦଲ୍ ଚଡଇ ପାରା ଉଡ୍ବାଟା, ପାକ୍ନା ବିତ୍ରେ ସାଁପ୍ ପୁର୍ବାଟା, ସମ୍ଦୁରେ ଜାଆଜ୍ ଜିବାଟା, ଦାଙ୍ଗ୍ଡି ଟକିର୍ ଲଗେ ଦାଙ୍ଗ୍ଡାମନ୍ ଜିବାଟା । ସେ ରକାମ୍ ଦାରି ମାଇଁଜିର୍ କାମ୍, ସେ କାଇ କରି ମୁଁ ପୁଚି ଦେଇ କରି କଇସି, ମୁଇଁ କାଇ ମିସା କାରାପ୍ କାମ୍ କରି ନାଇଁ । ତିନ୍ଟା ବିସଇର୍ ଅଜନ୍ରେ ପୁର୍ତିବି ଦୁଲ୍ଦୁଲି ଜାଇସି, ଆରି ଚାର୍ଟା ବିସଇର୍ ବଜ୍କେ ମିସା, ସେ ସମାଲି ନାପାରେ; ଗଟେ ଦାଙ୍ଗ୍ଡା ରାଜା ଅଇଲେ ତାର୍ ଦାଇତ୍ ସମାଲି ନାପାରେ ଆରି ଗଟେକ୍ ମୁର୍କ କାଦି କାଇ କରି ସାନ୍ତି ରଇ ନାପାରେ; ଗଟେକ୍ ଇଚା ନଇଲା ମାଇଜିକେ ବିବା ଅଇଲେ ମିସା ସେନ୍ତାରି ସେ ତାର୍ ବଜ୍; ଦାସି ମାଲିକ୍ନି ଅଇସି ଏଟା ତାର୍ କାମ୍ । ପୁର୍ତିବି ତେଇ ଚାର୍ଟା ଜିବ୍ଜନ୍ତୁ ଆଚତ୍ ସେମନ୍ ବେସି ଗିଆନି । ଚାଟିମନ୍ ଦୁର୍ବଲ୍ଟା ମନ୍, ଅଇଲେ ମିସା ଜେଟ୍ବେଲେ କାଦି ଟୁଲିଆଇବାଇ । ସିମା ମୁସା ବପୁ ନାଇଁ, ଅଇଲେ ମିସା ସେମନ୍ ପାକ୍ନା ତେଇ ନିଜର୍ ନିଜର୍ ଗର୍ ତିଆର୍ କର୍ବାଇ । ଚିଟ୍କାମନର୍ ରାଜା ନାଇଁ, ଅଇଲେ ମିସା ମାନ୍ଦା ମାନ୍ଦା ଅଇ ଜିବାଇ । ଜିଟିପିଟିକେ ଆତ୍ ସଙ୍ଗ୍ ଦାରି ଅଇସି, ଅଇଲେ ମିସା ସେ ରାଜାର୍ ମେଡ୍ ଗରେ ବାସା ଅଇ ରଇସି । ଆରି ତିନ୍ଟା ଜିବ୍ଜନ୍ତୁ ସୁନ୍ଦର୍ ବାବ୍ରେ ଇଣ୍ଡ୍ବାଇ, ଆରି ଚାର୍ଟା ପସୁ ମିସା ସୁନ୍ଦର୍ ସଙ୍ଗେ ଇଣ୍ଡ୍ବାଇ; ସିଅଁ ସବୁ ପସୁ ମନର୍ ବିତ୍ରେ ଅନି ବେସି ବପୁ ସେଟାର୍ ପାଇଁ ସେ କାକେ ମିସା ନ ଡରେ । ଗାଲି ଗାଞ୍ଜା; ଚେଲି ଆରି ରାଜା, କାର୍ ବିରଦ୍ରେ ମିସା ନ ଉଟତ୍ । କେବେ ଜଦି ତମେ ବଡ୍ ଅଇବାକେ କାରାପ୍ କାମ୍ କର୍ତେ ରଇସା, ନଇଲେ ଅଲ୍ଗା ଲକ୍କେ କାରାପ୍ ବାବ୍ତେ ରଇସା, ସେନ୍ତାର୍ ଆଲେ ତମର୍ ଟଣ୍ଡ୍କେ ଚୁପ୍ କରି ଦିଆସ୍ । କାଇକେବଇଲେ ଜେନ୍ତିକି ଦୁଦ୍କେ ଆଁଟାଲେ କିର୍ସା ବାରଇସି ଆରି ନାକ୍କେ ରେତ୍ଲେ ବନି ବାରଇସି, ସେ ରକାମ୍ ରିସା ଲକ୍କେ ରିସା କଲେ ଲାଗାଜଡା କରାଇସି ।
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.